Komiti ya Ofesi ya Munthavi ya Brazil, yapanga Makomiti 18 Ghakovwira Para Kwachitika Soka kuti ghawovwire ŵapharazgi awo ŵakusuzgika kusanga vyakukhumbikwa pa umoyo chifukwa cha muliri wa coronavirus. Makomiti agha ghakovwira mipingo 12,000 mu charu chose ichi kusazgapo ŵabali na ŵadumbu awo ŵakukhala ku vigaŵa vyakutali vya Mlonga wa Amazon. Kufika pasono, mabanja 131 ku Amazon ghapokera wovwiri uwu.

Komiti Yakovwira Para Kwachitika Soka ku Manaus, msumba ukuru wa Amazonas, yikapakira mu mathumba vinthu vyakukhumbikwa chomene pa umoyo, ivyo vikaŵa vyakuti vingawovwira munthu kwa mwezi umoza. Mu mathumba agha ŵakapakiramo vinthu nga ntchunga, ufu wa kondowore, mpunga, na mkaka wa ufu. Ŵakapakiramoso sopo, matishu, miswachi, na munkhwara wakusukira mino. Ŵabali ŵakatumizga katundu uyu kwizira pa dowoko lapafupi la Manacapuru. Kufuma pa dowoko ili katundu uwu ukenda pa maboti, kuti ukafike ku vigaŵa vinandi vyakutali chomene nga Membeca na Lago do Castanho.

Mudumbu Marinelma, uyo wakukhala ku chigaŵa cha Lago do Castanho, wakati wapokera wovwiri wa chakurya uwu wakati: “Chakwamba, nkhuwonga Yehova chifukwa cha kutipwelelera. Kuno tikakhumbikwiranga chomene wovwiri, chifukwa tikaŵavya ndalama zakugulira chakurya. Nkhuwongaso ŵabali chifukwa cha mtima wawo wakupa kweniso chitemwa icho ŵali nacho. Apo nkhafukuturanga katundu uyu, mwana wane msepuka wa vyaka 6 wakaniwonanga ndipo nkhamuphalira kuti Yehova wagwiliskira ntchito ŵabali kuti watovwire. Mbwenu mwana wane wakati, ‘Amama tingalomba nthena kuti timuwonge Yehova?’”

Mubali Jonas Monteiro, uyo wakukhala mu msumba wa Caapiranga pamoza na mbumba yake, wakalembera kalata Komiti Yakovwira Para kwachitika Soka. Chigaŵa chinyake cha kalata iyi chikaŵa na mazgu ghakuti: “Tikumuwongani chomene chifukwa cha wovwiri uwo mwatipa. Tikuwona chitemwa cha Yehova kwizira mwa imwe. Ni mwaŵi ukuru chomene kuŵa mu mbumba ya pa charu chose iyi.”

Ŵabali ŵa mu Makomiti agha nawo ŵapindura chomene na mulimo uwu. Isaac Emannuel Ramalho de Oliveira, uyo ni mulara ndipo wakuteŵetera mu Komiti Yakovwira Para Kwachitika Soka, wakati: “Zuŵa lililose para nkhugwira ntchito mu komiti iyi, nkhuwona kuti chipulikano chane chikukhora chomene. Nkhugomezga kuti mulimo uwu unovwirenge chomene kuluska umo ine nkhuwovwilira ŵabali.”

Chipulikano chithu chikukhora chomene para tikuwona umo Yehova wakupwelelera ŵanthu ŵake kulikose uko ŵangaŵa mu nyengo ya muliri iyi.—Salimo 94:14.