Kwamba pa September 1 m’paka 4, 2022, Ŵakaboni ŵa Yehova ŵakachemeka kuti nawo ŵakaŵepo pa ungano wa mu 2022 uwo ukachitiskika na wupu wa International Trade Fair on Rehabilitation, Inclusion and Accessibility Technologies (Reatech) ndipo ukachitikira ku São Paulo, Brazil. Wupu uwu ngwakuzirwa chomene chifukwa ukovwira ŵanthu awo ŵali na masuzgo ghanyake kumanya vinthu vya tekinoloje ivyo nawoso ŵangavigwiliskira ntchito ku Latin America. Ŵanthu ŵakujumpha 46,000 ŵakaŵapo pa ungano uwu.

Pa ungano uwu, ŵabali ŵithu ŵakayikapo kanyumba kakukolerapo waka umo ŵakalongoranga vinthu vya pa jw.org, JW Library na JW Library Sign Language app. Mu kanyumba aka mukaŵaso vinthu vya tekinoloje ivyo ŵanthu ŵakayezgelerangapo umo ŵangavigwiliskira ntchito. Ŵapharazgi ŵambura kuwona na awo ŵali na suzgo la maso nawo ŵakaŵapo kuti ŵayelezgere umo vinthu vyakupambanapambana vya pa webusayiti yithu vikugwilira ntchito.

Mulara munyake wa awo ŵakuwona vya ŵanthu ŵakupendera wakiza pa kanyumba aka na kuyowoya kuti: “Ntchakukhozga chomene kuwona kuti gulu la chisopa likuŵikapo mtima chomene kovwira ŵanthu awo mbakupendera.” Munthu munyakeso wakati: “Apa mwalongora pakweru kuti mukutemwera yayi!”

Ŵimiliri ŵa wupu wa National Organization of the Blind in Brazil (ONCB) nawo ŵakaŵapo pa ungano uwu. Iwo ŵakapharazganga pa wayilesi vinthu ivyo vikachitikanga. Mu mazuŵa agho ŵakambiranga ungano uwu kweniso apo ukamaranga, ŵabali awo ŵakaŵa ku malo agha ŵakafumbika mafumbo ghakukhwaskana na ntchito iyo ŵakuchita. Ŵabali ŵakalongosora umo Ŵakaboni ŵa Yehova ku Brazil kweniso pa charu chose ŵakovwilira ŵanthu ŵambura kuwona, awo ŵali na suzgo la maso, na awo mbakumangwa. Nakuti yumoza mwa ŵimiliri ŵa wupu wa ONCB, wati wachezga na mubali withu, wakati pa jw.org pali vinthu viwemi chomene vya chiyowoyero cha mawoko ndipo wandaviwoneposo kunyake.

Kufuma waka mu nyengo yakale, Yehova wakulongora kuti wakuŵaghanaghanira ŵanthu wose awo ŵali na masuzgo ghanyake. (Levitiko 19:14) Tikugomezga kuti wakukondwa chomene kuwona Ŵakaboni ŵake ŵakumuyezga pa nkhani ya chitemwa. Tikukhazga waka nyengo iyo “maso gha ŵachibulumutira ghazamujulika, makutu gha ŵakumangwa ghazamupulika.”—Yesaya 35:5.