Ntchito yikuru yakunozga ofesi yili mukati ku ofesi ya munthavi ya Brazil, iyo yili pa mtunda wa makilomita 140 kumanjiliro gha dazi kwa msumba wa São Paulo. Chilato chikuru ntchakusintha ofesi iyi kuti yiwonekenge makora. Pakuŵanga masuzgo pa ntchito yakunozgaso maofesi. Ntchito yikwenera kupangika makora pulani kuti yileke kutimbanizgaso ntchito zinyake izo zikuchitika pa ofesi ya munthavi. Mwachiyelezgero, awo ŵakukhala pa Beteli ŵakwenera kusama dankha na kukhala mu vipinda vyakukolerapo waka apo vipinda vyawo vyenecho ŵakuvinozga dankha. Ntchito iyi yikwenera kuzakamara mu vyaka 5.

Ŵabali ŵanozgenge malo pafupifupi masikweya mita 75,000, kusazgapo na maofesi ghose na vipinda vyakugona 650. Ntchito iyi yiwovwirenge kuti chiŵe chipusu kusintha maofesi. Mwachiyelezgero, ghazamuŵa na viliŵa vyakuti ŵangakhura mwakuti mu ofesi ŵachitiremoso milimo yinyake. Mu chipinda chilichose chakugona muzamuŵaso malo ghachoko waka ghakuphikapo, na malo ghakuchapirapo. Muzamuŵikikaso mashini ghambura kunanga chilengiwa agho ghazamovwiranga kuti maji na nkhongono ya magesi vileke kusakazika.

Ŵabali na ŵadumbu awo ŵajipeleka kugwira ntchito iyi ŵazamukhala dankha mu vipinda vyakukolerapo waka ivyo vili pa ofesi ya munthavi. Mwachiyelezgero chipinda icho ŵakasungirangamo katundu ŵali kuchigaŵa mu tuvipinda kuti ndimo muzakakhalenge awo ŵazamugwiranga ntchito. Chinyake ntchakuti, makontena 91 ghakunyamulira katundu ŵali kughasintha kuti ghazakaŵe malo ghakukhala ghakukolerapo waka agho ghali pafupi na munda wa ofesi ya munthavi uwo uli pafupi waka.

Mubali Joel Grigor, uyo wakuchita mulimo wakuzenga, wakuti: “Tajiwonera tekha umo gulu la Yehova likulutiskira panthazi ntchito iyi kweniso kusambizga ŵanthu kuti ŵazakachiteko mulimo uwu. Ŵanadi mwa awo ŵali pano pakwamba ŵakamanyanga vichoko panji ŵakamanyanga chilichose yayi pa mulimo wakuzenga, kweni sono nawo ŵakusambizga ŵanyawo.”

Tili na chigomezgo chose kuti Yehova waŵatumbikenge chomene ŵanthu ŵake apo ‘ŵakujipeleka na mtima wose’ pa mulimo uwu na ntchito zinyake zakuzenga izo zikuchitika mu gulu la Yehova.—Salimo 110:3.