Pa June 23, 1947, Ŵakaboni ŵa Yehova ŵakalembeska ku boma wupu wa Sociedade Torre de Vigia de Bíblias e Tratados (Watch Tower Bible and Tract Society) ku Brazil. Uwu ni wupu wakwambilira wakuzomerezgeka na dango uwo tawugwiliskira ntchito ku Brazil kwa vyaka vyakujumpha 75. Ŵabali ŵithu ŵakazizipizga kwa vyaka vinandi kuti ŵafike pakuzomerezgeka na dango.

Pa October 13, 1945, ŵapharazgi ku Brazil ŵakapempha ŵanthu kuti ŵasayine chikalata kuti boma lizomerezge wupu wa Ŵakaboni ŵa Yehova. Mu charu chose ichi, ŵapharazgi pafupifupi 400 ŵakafiska kusayiniska ŵanthu 44,411 pa chikalata cha kupempha ku boma. Kufuma apo ŵakatumizga chikalata ichi kwa pulezidenti kweni ŵakapokera zgoro lililose yayi.

Mu 1946, boma la Brazil likamba kugwiliskira ntchito malango ghanyake. Malango agha ghakawovwira kuti wupu wa Watch Tower Bible and Tract Society uzomerezgeke na dango. Mu chaka ichi, ŵapharazgi 442 ndiwo ŵakachitanga mulimo wakupharazga mu charu ichi.

Ŵaliska ŵa visopa ŵakakondwa yayi kuti tazomerezgeka na dango. Pati pajumpha vyaka vitatu, pa November 3, 1949, ŵaliska aŵa ŵakachichizga pulezidenti wa charu cha Brazil kusayina chikalata chakukanizga wupu wa Watch Tower Society. Ŵabali ŵakaluta nayo ku khoti nkhani iyi. Mulandu ukalutilira m’paka pa April 8, 1957, apo pulezidenti uyo wakaŵapo pa nyengo iyo wakaŵikira kumanyuma wupu wa Watch Tower Bible and Tract Society.

Apo ŵabali ŵakazizipizganga masuzgo ghose agha, Yehova wakalutilira kutumbika ntchito yawo yakupharazga. Mubali Djalma Mendes Souto, uyo wakabatizika mu 1941 ndipo wakaŵa yumoza mwa ŵabali ŵakwambilira mu wupu wa Watch Tower Society ku Brazil, wakati: “Chipulikano, mwamphu, na chigomezgo chithu mwa Yehova vikawelera nyuma yayi, ndipo ivi vikawovwira kuti chiŵelengero cha ŵapharazgi chilutilire kusazgikira. Tikakondwa chomene apo mu 1947, tikaŵa na ŵapharazgi ŵakujumpha 1,000 mu charu ichi.”

Kufuma waka pa nyengo iyi, chiŵelengero cha Ŵakaboni ŵa Yehova ku Brazil chasazgikira chomene. Mu 2021, chiŵelengero cha ŵapharazgi ku Brazil chikafika pa 913,479, ndipo ŵanthu 2,184,856 ŵakachitako Chikumbusko cha Nyifwa ya Khristu. Ungano wa Chigaŵa wa 2021 wakuti ‘Chipulikano Chikutipa Nkhongono!’ ukang’anamulika mu viyowoyero 15, kusazgapo na viyowoyero 10 ivyo vili na ŵanthu ŵachoko waka.

Tikukhozgeka chomene kuwona kuti Yehova wakulutilira kutumbika ntchito yithu yakupharazga ku Brazil. Kuzizipizga uko ŵabali ŵithu ŵakalongora nangauli ŵakasangana na masuzgo ghanandi, kukulongora pakweru fundo yakuti Yehova wakuponoska awo ŵakugomezga mwa iyo.—Yesaya 25:9.