Kufuma pa March 1 m’paka pa June 30, 2024, Ŵakaboni ŵa Yehova ŵakujumpha 1,000 ŵakachitako upharazgi wapadera uwu mu charu chose cha Brazil. Upharazgi wapadera uwu ukanozgeka kuti vikolerane na buku ilo lili kufumiskika mwasonosono la Mungakondwa na Umoyo Kwamuyirayira! mu viyowoyero 11 vya mu charu ichi. Ivi vikapangiska kuti ŵanthu pafupifupi 300 ŵapemphe kuti ŵasambirenge Baibolo.

Apo ŵakadumbiskananga, mwanakazi munyake uyo wakuyowoya Chixavante ku Campinápolis wakafumba ŵapharazgi kuti: “Kasi ndimwe mukupanga mavidiyo mu chiyowoyero chane? Nkhamba ni kale kumupenjani mwaŵanthu imwe. Mwahuno namusangani!” Mwanakazi uyu wakayowoya kuti pakwamba wakasambiranga Baibolo na Ŵakaboni ŵa Yehova, kweni wakaleka chifukwa chakuti wakapulikanga yayi Chiphwitikizi. Kweni wakati wamanya kuti mabuku ghithu ghakulongosora Baibolo ghamba kusangika mu Chixavante, wakamba kupenja Ŵakaboni ŵa Yehova. Pasono wali kwambaso kusambira Baibolo.

Ku Santa Maria de Jetibá, mudumbu wakadumbiskana na mwanakazi munyake wakunweka uyo wakuyowoya chiyowoyero cha Chipomeraniya kwa maulendo ghatatu. Pa ulendo wachitatu apo mudumbu uyu wakadumbiskananga nayo, mwanakazi uyu wakayowoya kuti wakalombanga kwa Chiuta pambere ŵandasangane kakwamba kuti Chiuta wamusambizge umo wangamusopera munthowa yakwenelera. Mwakukondwa wakazomera kuti ŵasambirenge nayo Baibolo.

Mu muzi unyake uchoko cha kumwera kwa Brazil, ŵabali ŵithu ŵakasangana na mwanakazi munyake uyo wakayowoyanga Chikaingang uyo wakaŵamanyanga makora yayi Ŵakaboni ŵa Yehova. Ŵabali ŵakamuŵerengera lemba la Salimo 83:18 na kumuphalira kuti Yehova ndilo zina la Chiuta. Iyo wakakhwaskika chomene ndipo wakati palije uyo wali kumuphalirapo kuti Chiuta wali na zina. Nyengo yeneyiyo wakazomera kuti ŵasambirenge nayo Baibolo.

Nase pamoza na ŵabali kweniso ŵadumbu withu ku Brazil, tikukondwa kuti ŵanthu ŵanandi ŵakusambira “makani ghawemi ghamuyirayira” agho ghakusangika mu Mazgu gha Chiuta mwakuti nawo ŵachindike Yehova.—Chivumbuzi 14:6, 7.