Pa November 10, 2020 Khoti Lakuwona vya Wanangwa wa Ŵanthu ku Europe likeruzga kuti boma la Bulgaria likaswa wanangwa wa kusopa wa ŵabali ŵithu. Apa ndikuti ŵalaraŵalara ŵa boma ŵakwenera kuzomerezga kuti ntchito ya kuzenga Nyumba ya Ufumu mu msumba wa Varna, Bulgaria yilutilire. Ŵabali ŵithu ŵatondeka kumalizga ntchito iyi kwa vyaka 10 sono, chifukwa cha ŵanthu ŵakususka. Chinyake ntchakuti, Khoti Lakuwona vya Wanangwa wa Ŵanthu ku Europe lati boma la Bulgaria liŵalipire ŵabali ŵithu na ndalama zakukwana madora 11,500 gha ku America.

Nkhani iyo yikakanjira mu khoti ili yikaŵa yakukhwaskana na kuzenga Nyumba ya Ufumu pa malo agho ŵabali ŵithu ŵakagura mu January 2006. Ŵalaraŵalara ŵa boma ku Varna ŵakazomerezga ntchito yakuzenga iyi mu May 2007, ndipo ŵabali ŵithu ŵakachedwa yayi kwambapo kuzenga. Kweni mu July chaka chenechicho, Meya wakalekeska ntchito yakuzenga, chifukwa wakatenge kuti ŵabali ŵithu ŵakazenganga mu nthowa yambura kuzomerezgeka. Mu mwezi wenewuwo, chipani chinyake cha ndyali icho chikumanyikwa chomene ku Bulgaria, chikaŵika mapositala pa malo agho ŵabali ŵithu ŵakazenganga ndipo ŵanthu ŵanandi ŵakiza kuzakachita viwoneskero kuti ntchito yakuzenga yilekeke.

Mu cheruzgo icho Khoti Lakuwona vya Wanangwa wa Ŵanthu ku Europe likapeleka, likati apa ndikuti ŵalaraŵalara ŵa boma ku Varna ŵakaŵavya nawo ntchito Ŵakaboni ŵa Yehova ndipo “ŵakalongolerathu kuti ŵakukolerana na awo ŵakachitanga viwoneskero.” Meya nayo wakalongora kuti wakukolerana na ŵanthu awo ŵakachitanga viwoneskero.

Nangauli vikalongolerathu kuti meya na ŵalaraŵalara ŵanyake ŵa boma ŵali na sankho, kweni iwo ŵakatenge ŵakukanizga ntchito yithu chifukwa chakuti yikachitikanga pa malo ghambura kuzomerezgeka na dango.

Ŵabali ŵithu ŵakakamangara ku makhoti ghanandi ku Bulgaria, ŵakakafika nanga nkhu Khoti Likuru, kweni ŵakaphurako kanthu yayi. Panyengo iyi ndikuti mpingo ukachitanga renti pa malo ghanyake kuti uchitenge maungano.

Khoti Lakuwona vya Wanangwa wa Ŵanthu ku Europe likati ŵalaraŵalara ŵa boma ŵalije vifukwa vyakupulikikwa ivyo ŵakachitiranga nthena. Ŵeruzgi 6 ŵakazomerezga kuti ivyo ŵalaraŵalara ŵa boma ŵakachita pakukanizga kuzenga Nyumba ya Ufumu ku Varna, ŵakaswa “wanangwa wakuti munthu wayowoyenge maghanoghano ghake, wanangwa wakulondezga njuŵi na chisopa kuyana na dango 9 na 11 la European Convention on Human Rights.

Ŵabali ŵithu ŵali na chigomezgo chose kuti ŵalaraŵalara ŵa mu msumba ŵalondezgenge ivyo Khoti Lakuwona vya Wanangwa wa Ŵanthu ku Europe ladumura. Ndiposo ŵakugomezga kuti ŵaŵazomerezgenge kumalizga ntchito yawo yakuzenga malo ghawo ghakusoperapo agho ghawovwirenge ŵanthu mu msumba wa Varna kweniso kupeleka uchindami ku zina la Yehova. Tikuwonga chomene Yehova Chifukwa nyengo zose wakutovwira.—Salimo 54:4.