Pa March 19, 2023, Mubali Youssouf Ouedraogo, uyo ngwa mu Komiti ya Munthavi ku Benin wakafumiska Baibolo la Malemba Ghakupatulika mu Mang’anamuliro gha Charu Chiphya mu chiyowoyero cha Chimoore. Wakapharazga vya kufumiskika kwa Baibolo ili pa ungano uwo ukachitikira ku Ouagadougou, mu msumba ukuru wa Burkina Faso. a Ŵanandi ŵa mu vigaŵa vinyake ŵakajoyina pulogiramu iyi. Ŵanthu ŵakujumpha 1,730 ŵakawungana. Pamanyuma pakuti lafuma waka, awo ŵakawungana maso na maso ŵakapokera Baibolo ili ndipo la pa intaneti likamba kusangika kuti ŵanthu ŵachite dawunilodi.

Chimoore chikuyowoyeka chomene ku Burkina Faso na ŵanthu pafupifupi 8 miliyoni. Kweniso chikuyowoyeka na ŵanthu ŵa mu vyaru vyapafupi ku Côte d’Ivoire, Ghana, Mali, Senegal, na Togo.

Aka nkhakwamba kuti Ŵakaboni ŵa Yehova ŵaŵe na Baibolo lose ku Burkina Faso. Nangauli pali Mabaibolo ghanandi mu chiyowoyero cha Chimoore, kweni palije ilo likusangika na zina la Chiuta lakuti Yehova.

Munyake uyo wakang’anamurako wakati: “Mabuku ghanyake agho ghali kulembeka mwa powemu, nga buku la Zintharika na Sumu ya Solomoni, ghakaŵa ghakusuzga kung’anamura chifukwa kalembekero kake mu Chimoore kakupulikikwa makora yayi. Ndipouli tikati taghang’anamura tikazizwa kweniso tikakondwa kuwona kuti uthenga wa mu mabuku agha ukupulikikwa makora chomene.”

Tikukondwa nawo lumoza ŵabali ŵithu awo ŵakuyowoya Chimoore chifukwa cha kuŵa na chawanangwa ichi chakufuma kwa Yehova.—Yakobe 1:17.