Mubali Jean-Yves na muwoli wake, Vasthie Mudaheranwa, ŵakovwira ŵanthu awo ŵakulwara matenda gha coronavirus ku Montreal, Canada. Mubali Mudaheranwa ni dokotala pa chipatala chinyake, ndipo Mudumbu Mudaheranwa ni nesi pa chipatala cha ŵanthu awo ŵali na matenda gha COVID-19. Pa nyengo yakusuzga iyi, Mubali na Mudumbu Mudaheranwa, ŵakuthemba chomene Yehova kuti waŵape nkhongono na kuŵawovwira kuti ŵaŵe ‘ŵakukondwa mu mtima.’—Yesaya 65:14.

Mubali Mudaheranwa wakuti: “Nkhakwamba kuwona madokotala ghanyane ghanandi kuŵa na wofi ukuru nthena.” Mudumbu Mudaheranwa wakuti: “kusambira Baibolo pawekha nkhwakovwira chomene. Tikughanaghanira vya chimanyikwiro cha mazuŵa ghaumaliro, ndipo tikukumbuka kuti Yehova wali nase, watilekenge tekha yayi. Lurombo lukutovwiraso chomene. Pambere nindalute ku ntchito, nkhulomba kwa Yehova ndipo nkhuŵa na mtende.”

Mubali Mudaheranwa wakuti: “Ndine wa ku Rwanda, ndipo nkhapona pa nkhondo iyo ŵanthu ŵakakomekanga chifukwa cha kusankhana mtundu. Kuno ku Canada, tindaviwonepo ivyo tikawona kukwithu. Ntheura ntchipusu kuluwa kuti tili mu mazuŵa ghaumaliro. Nakuti unenesko ngwakuti, nanga ndine nkhawonanga kuti zuŵa la Yehova lichali kutali chomene nkhanira. So nthenda iyi yapangiska kuti nigomezge chomene kuti tili nadi mu mazuŵa ghaumaliro, ndiposo vyanovwira kuti nigomezgenge chomene Baibolo na mauchimi agho ghali mu Baibolo.”

Ŵanthu ŵa Yehova pa charu chose chapasi, ŵali na chipulikano chakuyana waka na cha Mubali na Mudumbu Mudaheranwa, ndipo ŵakulutilira kuŵa na mtende pa nyengo yakusuzga iyi.—Yesaya 48:18.