Mpingo wa Iqaluit wa Ŵakaboni ŵa Yehova ku Iqaluit, Nunavut, Canada, sono uli na Nyumba yake ya Ufumu. Pa October 14, 2022, ŵabali ŵakujipeleka pa mulimo wakuzenga ŵakamalizga kuzenga Nyumba ya Ufumu iyo yili na malo ghakukwana mipando 50. Malo ghaphya ghakuwunganapo agha, ghali kumpoto chomene kwa charu cha Canada. Mpingo wa Iqaluit ukamba mu 2010 ndipo kumasinda uku ukawungananga mu chinyumba icho ŵakupangirangamo maseŵero ghakupambanapambana pa sukulu yinyake.

Ntchito yakuzenga yikaŵa yakusuzga chomene kweniso yikatchedwa na vyaka viŵiri chifukwa cha muliri. Lizgu lakuti Iqaluit, likung’anamura “malo gha somba zinandi,” ndipo malo agha ghali ku Frobisher Bay, pa Chilwa cha Baffin. Kuti munthu ukafikeko ukwenera kukwera ndege panji boti. Kweniso katundu wakuzengera wakusangika yayi ku malo agha. Ichi chikung’anamura kuti katundu wakeneranga kunyamulika pa boti m’paka wakafike ku malo agha. Ndiposo chifukwa cha nyengo ya ku malo agha, ntchito yakuzenga Nyumba ya Ufumu yikeneranga kuchitika mu mwezi wa August mpaka October.

Matani 127 gha katundu wakuzengera ŵakaghakhizgira pa Malo gha Ungano ku Ontario. Katundu uyu ukendaso pa sitima ndipo ŵakamukhizgira pa jiti kufupi na Montreal, Quebec. Kufuma apo, ŵakenda nayo mu sitima m’paka kukafika ku St. Lawrence Seaway, cha kufupi na Nyanja ya Atlantic, ndipo paumaliro ŵakafika pa Frobisher Bay. Pakuti pa malo agha mphakuti pangima sitima zikuruzikuru yayi, katundu uyu ŵakawukwezga pa maboti ghanyake agho ghakunyamura katundu. Maboti agho ghakuguguza maboti ghakunyamura katundu agha, ghakwendanga kwakunyang’amira chomene yayi. Ntheura para majigha ghachepa nkhongono, ŵakakhizganga dankha mabokosi gha katundu na kwiza nagho pa mtunda mumphepete mwa nyanja.

Nyumba ya Ufumu iyi ŵali kuyizenga mu nthowa yakuti yiŵe na vinthu vyakovwira kuti yithukirenge mu nyengo yakuzizima chomene, kweniso kuti para kwawotcha chomene yizizimenge, chifukwa ku Iqaluit kanandi kukuzizima kufika pa madigiri -30.

Pafupifupi ŵanthu 40 awo ŵakajipeleka pa mulimo wa vyakuzenga ŵakafuma mu vigaŵa vyakupambanapambana 6 kuti ŵakawovwirepo pa mulimo uwu. Mubali Jason McGregor, uyoso wakajipeleka pa ntchito iyi wakati: “Tikasangana na suzgo pa nkhani ya vinthu vyakukhumbikwa pakuzenga, kweniso ghanyake agho ghakizanga mwamabuchi, kweni chakukondweska ntchakuti palije icho chingamutonda Yehova. Tikakhozgekanga chomene para tikuwona kuti ntchito yikwenda zuŵa lililose.”

Tikukondwa pamoza na ŵabali ŵithu ku Canada chifukwa cha kuŵa na Nyumba yawo yiphya ya Ufumu, pa “malo gha somba zinandi” apo ŵakulutilira kuchita mulimo wakuzirwa wakuŵa “ŵalovi ŵa ŵanthu.”—Mateyu 4:19.