Nangauli tikuyezgayezga kuti tijivikilire ise taŵene kweniso ŵanyithu ku muliri wa coronavirus, kweni ŵabali na ŵadumbu ŵithu ŵanyake ŵali kufwa na nthenda iyi. (Mupharazgi 9:11) Chachitima ntchakuti pasono ŵabali na ŵadumbu ŵithu ŵakukwana 872 pa charu chose ŵali kufwa na nthenda ya COVID-19. Ŵakhristu ŵanyithu ŵakachitapo kanthu mwaluŵiro kuti ŵapembuzge awo ŵabali ŵawo ŵafwa. (1 Ŵakorinte 12:26) Chakuzirwa chomene ntchakuti tose tikuthemba Yehova uyo nyengo zose wakufiska ivyo wali kulayizga pa Ŵafilipi 4:7 kuti watipenge ‘mtende wake.’

Mudumbu munyake uyo gulu la Yehova likumovwira ni Hannchen Unnützer, uyo wakuchita upayiniya wapadera ku Bolzano, kumpoto kwa Italy. Chachitima ntchakuti mfumu wake Manfred Unnützer, wali kufwa pa March 28, 2020, na nthenda ya coronavirus. Mubali Unnützer wachita uteŵeti wanyengozose pafupifupi vyaka 58, ndipo wakachitira lumoza uteŵeti na muwoli wake vyaka 54. Mubali uyu wakendera dera pamoza na muwoli wake kwa vyaka 25. Ŵabali na ŵadumbu pafupifupi 1,000 kufuma mu vyaru vyakupambanapambana, ŵakawonelera nkhani ya nyifwa ya mubali uyu pa pulogiramu yinyake ya pa kompyuta.

Mudumbu Unnützer wakuti: “Nkhuwonga chomene ŵabali na ŵadumbu. Ŵakanileka nekha yayi, nanga mphanyengo yichoko waka. Nkhawona kuti ŵakunitemwa chomene. Ŵakanikhozga, kunipembuzga kweniso kunipwelelera mwauzimu na mwakuthupi. Nkhuŵatemwa ŵabali na ŵadumbu wose.”

Ŵabali ŵithu ŵakupembuzgaso Maria Jose Moncada na mfumu wake Darwin. Iwo ŵakuteŵetera ku chigaŵa cha mapiri uko ŵakuyowoya chiyowoyero cha Chiquichua ku Ecuador. Tili na chitima kuti ŵapapi ŵa Mudumbu Moncada ŵali kufwa. Amama ŵake a Fabiola Santana Jordan, ŵa vyaka 56, ŵakaŵa mupayiniya wanyengozose. Ndipo adada ŵake a Ricardo Jordan, ŵa vyaka 60 ŵakaŵa muteŵeti wakovwira mu Mpingo wa Praderas ku Guayaquil. Ndipo ŵadumbu ŵake ŵaŵiri ŵa Mudumbu Moncada nawo ŵakalwara nthenda ya COVID-19 kweni ŵali kuchira.

Chifukwa chakuti wakaŵa na chitima chomene, Mudumbu Moncada wakakhumbanga kuti walute kuti wakaŵepo panyengo yakusuzga iyi kweniso kuti wakawovwirepo pa nyifwa. Kweni iyo na mfumu wake ŵati ŵalomba, ŵakawona kuti ntchiwemi yayi kuti ŵalute ku Guayaquil. M’malo mwake ŵakadumbiskana waka na ŵachibali kwizira pa pulogiramu yinyake ya pa kompyuta. Mudumbu Moncada wakulongosora kuti: “Kuŵa pamoza na ŵachibali ŵithu panyengo iyi, kukatenge kuŵikenge umoyo withu pangozi kweniso wa ŵanthu ŵanyake.”

Mudumbu Moncada wakati “vikamuŵinya chomene kweniso wakafipanga mtima. Ndipouli, iyo na mfumu wake ŵakalutilira kuchita vinthu vyauzimu ndipo ŵakaleka yayi kumuŵeyelera Yehova kuti waŵalongozge.” Banja ili likalutilira kunozgekera Chikumbusko cha nyifwa ya Yesu, na kuchemerako masambiro ghawo gha Baibolo. Kweniso ŵakaŵazganga mavesi gha mu Baibolo ghakulongosora vyakuchitika vyaumaliro vya umoyo wa Yesu pa charu chapasi. Ŵakapharazganga mwakulemba makalata kweniso kuwungana mwakugwiliskira ntchito pulogiramu yinyake ya pa kompyuta. Ŵabali ŵa Mudumbu Moncada ŵakukwana 9 ŵakategherezga nkhani ya Chikumbusko mu Chisipanishi.

Mudumbu Moncada wakati “Tikakhozgeka chomene kuwona kuti ŵanthu awo tikusambira nawo Baibolo ŵakachitapo kanthu kuti ŵajoyine na kuwonelera nkhani ya Chikumbusko, nangauli chikaŵa chipusu yayi kwa iwo.” Kweniso wakati: “Nkhakondwaso chomene kuti ŵamubanja lakwithu ŵakajoyina na kuwonelera nkhani ya Chikumbusko iyi, nangauli ŵakukhala ku vyaru vinyake.”

Mudumbu Moncada wakalutilizga kuyowoya kuti: “Kulutilira kuchita vinthu vyauzimu panyengo yakusuzga vikovwira kuti wamunthu uluweko vyakuŵinya. Yehova wakutitumbika para tikulutilira kumuteŵetera nangauli tingakumana na masuzgo.”

Ŵabali ŵithu pa charu chose ŵakulira na awo ŵabali ŵawo ŵali kufwa na muliri wa coronavirus. Ndipo tilutilirenge kuŵalombera awo ŵakulira. Tikulindilira mwakunweka nyengo iyo Yehova wazamufumiskapo vinthu vyose viheni, nga ni matenda ghakwambukira. Ndiposo wazamuwuska ŵateŵeti ŵake wose ŵakugomezgeka awo ŵali kufwa.—1 Ŵakorinte 15:21, 22.