Pa 8 April 2024, kukachita kadamsana mu vigaŵa vinyake ku North America. Ŵanthu ŵakimilira mu malo ghakupambanapambana kuti ŵawone ivi ndipo ŵanyake ŵakenda mtunda utali kufika ku malo agha. Pakanozgeka ndondomeko ya upharazgi wapadera mu vigaŵa vyakujumpha 24 umo ŵanthu ŵakiza kuti ŵazakawone umo dazi likuwonekera. Ŵakaboni ŵa Yehova ŵakufumira ku Canada, Mexico, na ku United States ŵakachitako upharazgi wapadera uwu mwakugwiliskira ntchito mashelufu agho pakaŵa mabuku gha viyowoyero 15.

Ku Carbondale, chigaŵa cha Illinois, U.S.A ŵana ŵaŵiri ŵa ku koleji ŵakiza pa kashelufu. Yumoza mwa ŵadumbu ŵithu wakamba kudumbiskana nawo mwakugwiliskira ntchito fumbo ilo likaŵa pa kashelufu lakuti, “Kasi Vyamoyo Vikachita Kulengeka? Mukati mwachidumbirano, munyamata yumoza wakafumba kuti: “Usange Chiuta waliko ndipo wakutitemwa, chifukwa wuli wakuzomerezga masuzgo?” Mudumbu wakamulongora umo wangagwiliskira jw.org kuti wasange zgoro. Ŵanyamata wose ŵaŵiri ŵakakhorwa ŵati ŵawonelera vidiyo iyo yikazgora fumbo lawo ndipo ŵakayowoya kuti ŵakukhumba kumanya vinandi kweniso kuphalira ŵanyawo ivyo ŵasambira.

Munyamata munyake uyo wakuyowoya chiyowoyero cha Chipunjabi ku Sherbrooke, mu chigaŵa cha Quebec, ku Canada, wakazizwa chomene kupulika mudumbu uyo wakaŵa na kashelufu wakumutawuzga mu chiyowoyero chake. Monire uwu ukapangiska kuti ŵambe kudumbiskana ndipo mudumbu wakamulongora umo tikusambilira Baibolo na ŵanthu mwakugwiliskira ntchito burosha la Mungakondwa na Umoyo Kwamuyirayira! Munyamata uyu wakakondwa kupulika kuti wangasambira Baibolo pa nyengo na malo agho iyo wangatemwa kusazgapo na pa videoconference wuwo. Mudumbu wakanozga kuti mubali munyake wasambirenge Baibolo na munthu uyu.

Mudumbu munyake uyo wakaŵa pa kashelufu ku Evansville, chigaŵa cha Indiana, ku U.S.A wakamba kudumbiskana na mwanakazi munyake uyo wakayowoya kuti wakasamira ku malo agha kuti wazakapwelelere ŵamama ŵake awo ŵakalwaranga. Mudumbu withu wakalongosora kuti nayo wakapweleleranga ŵamama ŵake awo ŵakalwaranga ndipo wakughamanya makora masuzgo agho ghakuŵapo para ukupwelelera mulwari. Kufuma apo mudumbu withu wakaŵazgira mwanakazi uyu mazgu ghakupembuzga agho ghakusangika pa Yesaya 33:24 na Chivumbuzi 21:4. Chifukwa chakukhwaskika na malayizgo gha mu Baibolo agha, mwanakazi uyu wakapempha mudumbu kuti waŵazgeso mavesi agha. Ivi vikapangiska kuti paŵe chidumbirano chiwemi chomene ndipo pamanyuma ŵakapangana kuti ŵazakalutilire kudumbiskana nkhani za mu Baibolo nyengo yinyake.

Tili ŵakukondwa kuti ŵabali ŵithu ku North America ŵakasangirapo mwaŵi pa chakuchitika chapadera ichi kusambizga ŵanthu vyakukhwaskana na ‘Mlengi withu Mukuru’ kweniso malayizgo ghake ghakukondweska.—Mupharazgi 12:1, 2.