Kufuma pa November 1, 2023, kufika pa January 31, 2024, Ŵakaboni ŵa Yehova ŵakujumpha 19,000 ŵakachitako upharazgi wapadera uwo ukachitika ku Bolivia na Colombia. Pa upharazgi wapadera uwu, Ŵakaboni ŵakapharazga uthenga wa mu Baibolo wakupa chigomezgo mu Chispanish na viyowoyero vinyake 18, kusazgapo Chiyowoyero cha mawoko cha ku Bolivia na Colombia.

Mubali munyake uyo wakuyowoya Chispanish wa ku Guadalupe, Colombia, wakazizwa chomene mwanakazi munyake wati wajura chijaro na kuyowoya kuti, “Talindiliranga imwe!” Mwanakazi uyu wakati iyo na mfumu wake ŵakadumbiskananga usange ŵangakondwelerangako maholide ghanyake gha chisopa panji yayi. Mfumu wa mwanakazi uyu wakatiphalira kuti wakawona Ŵakaboni ŵakupharazga pafupi waka. Ndipo wakati wali na chigomezgo chose kuti ŵafikenge pa nyumba pawo kuzakaŵazgora mafumbo ghawo. Ŵabali ŵithu ŵakakondwa kovwira mbumba iyi kumanya ivyo Baibolo likusambizga ndipo ŵakapangana nawo kuti munyake wazakalutilizge kusambira nawo.

Apo ŵadumbu ŵithu ŵaŵiri ŵakapharazganga mu tawuni ya Cuatro Cañadas, ku Bolivia, ŵakasangana na mwanakazi munyake pa sitoro zina lake Miguelina. Ŵati ŵamanya kuti mwanakazi uyu wakutemweka wake wali kutayika, ŵakamuŵazgira lemba la Chivumbuzi 21:3, 4. Miguelina wakati wakukhumba kumanya vinandi ivyo Baibolo likusambizga. Suzgo likaŵa lakuti wakukhala kutali ndipo walije foni. Pati pajumpha mazuŵa, ŵadumbu aŵa ŵakapharazgiranga mwanakazi munyake kuwaro kwa tawuni iyo ŵakapharazgako pakwamba. Mwamabuchi Miguelina wakafuma mu nyumba. Ŵadumbu aŵa ŵakazizwa kumanya kuti uyo ŵakamupharazgiranga wakaŵa mwana wa Miguelina. Wose pamoza ŵakakondwa chomene. Ŵadumbu ŵakanozga vyakuti ŵambe kusambira Baibolo na mbumba yose iyi.

Tili na chigomezgo chose kuti Yehova wakuzirwiska chomene kuyezgayezga uko ŵabali na ŵadumbu ŵakachita panyengo ya upharazgi wapadera. Ndipo walutilirenge kutumbika ŵanthu ŵake apo tikulutilira kupharazga makani ghawemi “mu chilengiwa chose kusi ku mtambo.”—Ŵakolose 1:23.