Kwamba pa April 1, 2022, Ŵakaboni ŵa Yehova ŵakambaso kuchita maungano maso na maso. Kwenjerwa kose uko ŵabali na ŵadumbu ŵithu ŵakaŵa nako kukamara mwaluŵiro, m’malo mwake ŵakasekanga, kuthiska masozi gha chimwemwe na kwimba sumu za Ufumu mwakukondwa.

Kwa ŵanyake, aka kakaŵa kakwamba kwiza pa Nyumba ya Ufumu

Mubali Krzysztof Hoszowski wa ku Poland wakuti: “Aka nkhakwamba kuti nisangikepo pa maungano maso na maso, pa Nyumba ya Ufumu. Nkhasambira unenesko kwizira pa pulogiramu ya pa kompyuta, ndipo apo nkhabatizikanga ŵanthu ŵakachita kuwonelera pa Zoom. Nkhamanyanga umo vikuŵira para uli pa maungano maso na maso, kwizira waka mu mavidiyo. Nkhaŵa wakukondwa chomene kuwona chitemwa cha paubali, chimwemwe, na lusungu.”

Muliri wa COVID-19 wati wakhwaska charu chose mu March 2020, Ŵakaboni wa Yehova ŵakamba kuchita maungano kwizira pa videoconference. Kuchita maungano munthowa iyi kuchalipo kwa awo ŵangafiska yayi kuchita maungano maso na maso.

Mubali Neil Campbell wa ku Edinburgh, Scotland wakuti: “Apo sumu yikambanga nkhamba kwimba uku nakhwaskika chomene mu mtima, pakuwona waka kuti niliso lumoza na ŵabali pamanyuma pa vyaka viŵiri.”

Tikuwonga Yehova chifukwa cha kutitumbika apo tambaso kuchita maungano maso na maso.—Salimo 84:10.