Na mtima wose, pa September 1, 2022, Ŵakaboni ŵa Yehova pa charu chose ŵali kwambaso mulimo uwo ŵakumanyikwa nawo chomene wa kupharazga nyumba na nyumba. Ntchakukondweska kuti mu mwezi wa September wenewuwu tili na upharazgi wapadera wakwambiska masambiro gha Baibolo. Ku ŵabali na ŵadumbu ŵithu ŵanyake, tingati ŵakawelera ku nthowa yakupharazgira iyo ŵali kuyizgoŵera kale ndipo ŵakuyitemwa chomene. Kweni ku ŵabali na ŵadumbu ŵithu ŵanyake, kakaŵa kakwamba kuluta ku nyumba za ŵanthu na kukaŵapharazgira uthenga wa mu Baibolo. Wonani vyakukondweska ivyo vyachitika pa charu chose ivyo vikulongora kuti mulimo wakupharazga nyumba na nyumba mu chaka cha uteŵeti cha 2023 wamba makora.

Pa September 2, 2022, Nicole na Tina, ŵadumbu ŵithu ŵaŵiri ku Petershagen North Rhine-Westphalia, ŵakapharazganga nyumba na nyumba. Ŵati ŵaluta pa nyumba yinyake, ŵakasangapo waliyose yayi. Apo ŵakawukangapo pa malo agha, ŵakapulika mama munyake wachisungwana wakuŵachema. Mama uyu wakayowoya kuti wangutondeka kuŵajulira ku mulyango apo ŵadumbu aŵa ŵagogodanga, kweni wakaŵapempha kuti ŵawelere kuti ŵadumbiskane nayo Baibolo. Apo ŵadumbu aŵa ŵakanjiranga mu nyumba ya mama uyu, ŵakawona kuti pa thebulu pali Baibolo la Malemba Ghakupatulika mu Mang’anamuliro gha Charu Chiphya. Mama uyu wakayowoya kuti Baibolo ili wakalisanga ku Italy uko wakakhalanga vyaka vitatu ivyo vyajumpha. Kweni chifukwa cha muliri panguŵa pakusuzga kusanganaso na Ŵakaboni ŵa Yehova wati wiza ku Germany. Ntheura ŵadumbu aŵa ŵakapana maadiresi na mama uyu na kumuchemerako ku maungano. Pamanyuma pa mazuŵa ghaŵiri, mama yura pamoza na ŵana ŵake ŵaŵiri ŵakiza ku maungano. Ndipo ŵadumbu aŵa ŵakanozga vyakuti ŵasambirenge Baibolo na mama uyu.

Manuel na Karol Gastelum, awo mbapayiniya ŵapadera mu chigaŵa icho ŵakuyowoya chiyowoyero cha Chimam, ŵakasanga mama munyake walusungu uyo wakaŵachemerako ku nyumba kwake. Mama uyu wakamanyanga yayi kuti Chiuta wali na zina, ntheura ŵakamba kusambira sambiro 04 lakuti “Kasi Chiuta ni Njani?” mu buku la Mungakondwa na Umoyo Kwamuyirayira! Ŵati ŵaŵerenga Yesaya 42:8, mama uyu wakazizwa kuwona zina la Chiuta lakuti Yehova mu Baibolo lake.

Mama uyu wakamba kulira na kuyowoya kuti sono wamanya kuti kuŵa waka na Baibolo ntchakukwana yayi ndipo pasono ngwakukhumbisiska chomene kusambira ivyo Baibolo likuyowoya na kulondezga fundo zake. Ŵakati ŵamara mutu wura ŵakasambiranga, mama uyu wakakondwa chomene na ivyo wakasambira. Wakayowoya kuti ivyo wasambira wazamuphalirakoso mfumu wake. Ntheura mbumba ya Gestelum yanozga vyakuti ŵalutilire kusambira Baibolo na mama uyu.

Apo ŵakapharazganga mu msumba wa Yokohama, Mubali na Mudumbu Nukamori ŵakafika pa nyumba ya munthu munyake na kuyowoya nayo kwizira pa Intakomu. Ŵakapulika mazgu pera gha mama kufuma mu nyumba kuŵatawuzga. Ŵakajilongosora kwa mweneko nyumba, na kujiphara kuti Mbakaboni ŵa Yehova. Mweneko nyumba wakaphalira banja ili kuti limulindilire pawaro penepara. Pati pajumpha kanyengo, mama yura wakajura ku mulyango, na kuyowoya kuti “Nyengo yose iyi nakhazganga apo Ŵakaboni ŵa Yehova ŵizirenge pa nyumba yane.”

Mama uyu wakayowoya kuti wakamba kusambira Baibolo na Ŵakaboni ŵa Yehova ku Nagasaki. Wakasamira ku Yokohama mu nyengo ya muliri iyi, kweni wakulutilira kusambira kwizira pa Zoom. Kukwambilira kwa sabata yira, uyo wakasambiranga nayo wakamuphalira kuti: “Tiŵenge na upharazgi wapadera mu September. Kwambura kukayika nkhumanya kuti Kaboni wa Yehova wizenge ku nyumba yinu. Muzakamupemphe kuti wasambirenge namwe Baibolo maso na maso.” Mweneko nyumba wakakondwa kuti munthu uyo wamusambizgenge Baibolo wasangika luŵiro chomene. Mama uyu wakaŵa wakukhumbisiska kuluta ku maungano ndipo wakaŵa wakunweka kuzakalutizga kusambira ulendo wakulondezgapo.

Banja linyake likapempha kuti lisambirenge Baibolo na mama munyake, kweni mama uyu wakazgora kuti vyaka vinandi kumasinda uku wakasambiranga na Ŵakaboni ŵa Yehova ndiposo wakalutanga ku maungano. Wakaleka kusambira na Ŵakaboni ndipo wakachitanga soni kuti wambeso kusambira chifukwa wakalondezganga yayi fundo za makhaliro ghawemi za mu Baibolo. Pamanyuma pa kuyowoya ivi, mbwe wakamba kulira. Banja ili likamuŵazgira mama yura lemba la Salimo 10:17 na kumuphalira kuti Yehova wandamuluwe yayi. Ŵakamuwongaso mama uyu chifukwa ngwakukhumbisiska kulondezga fundo za Yehova za makhaliro ghawemi. Ntheura wakazomera kusambira Baibolo na kuyowoya kuti mwana wake munyamata wa vyaka 16 nayo wakukhumba kusambira Baibolo.

Banja ili likati lawelerako zuŵa lakulondezgapo, mama uyu pamoza na mwana wake ŵakaŵa kuti ŵakuŵalindilira. Ŵati ŵasambira sambiro 01 mu burosha la Mungakondwa na Umoyo Kwamuyirayira! banja ili likaŵachemerako mama uyu na mwana wake ku maungano ndipo ŵakaluta nadi. Ndipo wose ŵaŵiri mbakunweka kulutilira kusambira Baibolo kweniso kuwungana.

Ramon wakalomba kuti wasange munthu wakuti wamupharazgireko makani ghawemi pa zuŵa lakwamba lakuti wambaso kupharazga nyumba na nyumba. Pa nyumba yakwamba iyo wakafika, mama wa nyumba iyi wakajura chijaro pachoko na kumudodoliska. Ramon wakamutawuzga na kulongosora ivyo wizira. Pambere wandambe chidumbirano chake, mama uyu wakati: “Kuti waka ukumanya yayi kuti nyengo yanthena iyi ndiyo nalindiliranga kumasinda kose uku. Nkhalombanga kuti Kaboni wize pano pa nyumba yane.”

Mama uyu wakati vyaka vya kumasinda uku wakasambirapo na Ŵakaboni ndiposo wakalutanga ku maungano gha mpingo. Kweni wakasama uko wakakhalanga ndipo pakaŵavya mwaŵi wakusanganaso na Kaboni waliyose. Ntheura Ramon wakayowoya kuti kupharazga nyumba na nyumba kukayimiskika dankha chifukwa cha muliri. Pamanyuma Ramon wakamuŵazgira mama uyu lemba la Salimo 37:29 na kumulongora umo tikusambilira Baibolo na ŵanthu. Mama uyu wakazomera kusambira Baibolo. Ramon wakapempha mudumbu kuti wasambirenge na mama uyu.

Pa chakuchitika ichi, Ramon wakayowoya kuti: “Nkhumanya kuti Yehova kweniso ŵangelo ŵakutilongozgera ku ŵanthu awo ŵakukhumba nadi kupulika unenesko.”

Katelyn Thompson wati wafika pa nyumba yinyake ku Kentucky, wakawona kuti pa malo apo ŵakupokelerapo makalata palembeka malemba kweniso pali kachiphambano kakulembeka kuti “Yesu Wakumutemwani.” Katelyn wati wagogoda, mama wakazgora. Katelyn wakajiphara na kuyowoya kuti Ŵakaboni ŵa Yehova ŵatondekanga kwendera ŵabwezi ŵawo maso na maso chifukwa cha muliri wa COVID-19. Wakayowoyaso kuti Ŵakaboni ŵalembanga makalata na kwimba mafoni mu nyengo ya muliri kuti ŵakhozge na kupembuzga ŵanji. Katelyn wakafumba umo vinthu viliri kwa mama uyu kweniso ku mbumba yake. Mama uyu wakalongosora kuti awiske ŵali kufwa mu nyengo ya muliri. Wakayowoya kuti: “Nkhapokeranga makalata kufuma kwa imwe, ndipo nkhajipulikanga kuti Chiuta wakunipa vinthu vyakwenelera nkhanira pa nyengo iyo nkhuvikhumba nadi!” Katelyn wakakhwaskika chomene ndipo wakadumbirana nayo mama uyu sambiro 02 mu burosha la Mungakondwa na Umoyo Kwamuyirayira! Ŵakaŵazga malemba ghose mu sambiro ili, chomene agho ghakuyowoya vya chilindizga cha chiwuka munthazi. Mama uyu wakamba kulira. Wakayowoya kuti sono pajumpha chaka chimoza kufuma apo awiske ŵakafwira. Mama uyu wakapeleka maadiresi ghake kwa Katelyn na kumuphalira kuti wizengeso. Pamanyuma Katelyn wakapokera meseji kufuma kwa mama uyu, yikati: “Nawonga chomene—mwahuno nakhumbanga kukhozgeka nadi!”

Kwambura kukayika, Yehova watumbika chomene mulimo withu apo tambaso kupharazga nyumba na nyumba kweniso apo tili mukati kuchita upharazgi wapadera wa kwambiska masambiro gha Baibolo. Tili muchanya kupulika viwemi vinandi!—Yohane 4:35.