Muliri wa coronavirus (COVID-19) wapangiska vinthu kuti visinthe chomene pa umoyo wa Ŵakaboni ŵa Yehova ŵanandi. Iwo ŵakuchita chilichose icho ŵangafiska kuti ŵapulikire ivyo ŵamazaza ŵakuyowoya kweniso kuti ŵalutilire kusopa. Mu vigaŵa vinandi umo nthenda iyi yathandazgika chomene, ŵabali na ŵadumbu ŵithu ŵakulutilira kupharazga mwakugwiliskira ntchito nthowa zinyake.

Mubali munyake ku Pisa, Italy, wakati: “Upharazgi ukwenda makora chomene chifukwa pasono ŵanthu ŵanandi ŵakuŵa pa nyumba. Ine na muwoli wane tikaweleramo manambara gha foni agho tili nagho mu mafoni ghithu, ndipo tikanozga vyakupharazgira ŵanthu aŵa kwizira pa kompyuta. Tili na ŵanthu ŵanandi awo tikusambira nawo Baibolo kweniso awo tikuwelerako. Tikumalira nyengo yinandi kupharazgira ŵanthu, ndipo ŵanandi wakukondwa kudumbiskana nawo.”

Ku South Korea, muliri uwu wapangiska ŵapharazgi ŵanandi kuti ŵagwiliskirenge ntchito chomene webusayiti yithu ya jw.org kweniso JW Library app. Mwachiyelezgero, mubali munyake mwamabuchi wakapokera meseji pa foni yake kufuma kwa munthu uyo wakaleka kusambira nayo Baibolo vyaka vitatu ivyo vyajumpha. Munthu uyu wakati muliri wamupangiska kughanaghana vya chimanyikwiro cha mazuŵa ghaumaliro. Mubali wakamutumizgira linki ya pa foni ya nkhani yakuyowoya vya mazuŵa gha umaliro iyo yikusangika pa JW Library app. Mubali uyu wakuti “ntchakukhozga chomene kuti chimanyikwiro cha mazuŵa ghaumaliro ichi, chapangiska ŵanthu kukhumba kumanya vinandi vya Chiuta kweniso Baibolo.”

Malipoti ghanandi ghakufuma mu maofesi gha minthavi pa charu chose ghakulongora kuti ŵabali na ŵadumbu ŵithu ŵakutemwa chomene kupharazga. Ntchakukondweska chomene kuwona umo “vinjeru vyenecho” vikuŵawovwilira kupharazga makani ghawemi.—Mika 6:9.