Pa December 28, 2022, Ŵalaraŵalara ŵa Tawuni ya Ramapo ŵakazomerezga pempho lithu pa nkhani ya malo agho tizengengepo maofesi ghithu ku Ramapo. a Pakuti ŵali kuzomera pempho lithu, vyatipa mwaŵi wakuti pa malo agha tizengepo maofesi, malo ghakujambulirako mavidiyo na vinyake vyakutegherezga waka, kweniso nyumba zakugonamo ŵabali na ŵadumbu. Kweniso ivi vyapeleka mwaŵi wakuti tambepo kudumura makuni pa malo agha apo tikulindilira kuti ŵalaraŵalara ŵa Tawuni ya Ramapo ŵazomerezgeso pempho lithu linyake lakukhwaskana na ntchito yithu yakuzenga iyo panji yingamba mu 2023. Ndipo ivi viwovwirenge kuti ntchito yithu yichitike mwaluŵiro.

Mubali David Soto, uyo ngwa mu Komiti ya Vyakuzenga wakayowoya kuti: “Tili ŵakukondwa kuti ŵali kutizomerezga. Nangauli pachali vinyake vyakuti vichitike pambere tindambe ntchito yakuzenga, kweni tikumanya kuti Yehova watumbikenge kuyezgayezga kwithu.”

1. October 5, 2019

   Wupu Wakulongozga ukapharazga vya mapulani kuti maofesi ghakukhwaskana na vinthu vyakujamburajambura ghaŵe pa malo ghamoza ku Ramapo, New York

2. June 26, 2020

   Tikapeleka makalata ku Ŵalaraŵalara ŵa Tawuni ya Ramapo

3. July 8, 2020

   Tikadumbiskana kakwamba na Ŵalaraŵalara ŵa Tawuni ya Ramapo

4. March 31, 2021

   Chikalata chikapelekeka chakulongosora umo vinthu vinyake vya chilengiwa vikhwaskikirenge

5. March 8, 2022

   Ŵalaraŵalara ŵakuwona vya mapulani ŵa tawuni ya Tuxedo ŵakazomerezga kusanuzga na kunozga msewu wakulutira ku Ramapo

6. March 12, 2022

   Chikalata chaumaliro chakulongosora umo vyachilengiwa vikhwaskikirenge chikazomerezgeka

7. November 9, 2022

   Ŵalaraŵalara ŵa Tawuni ya Ramapo ŵakazomerezga dango liphya ilo likatizomerezga kuti pa malo agha tingazengapo maofesi na nyumba zakugonamo

8. December 28, 2022

   Ŵalaraŵalara ŵa Tawuni ya Ramapo ŵakatizomerezga mwapadera na kutigaŵira mphaka za malo ghithu ndiposo kuti tingambako kusengura pa malo agha

9. Ivyo Tikulindizga

   Kuti ŵatizomerezge vyose ivyo tikukhumba kuchita