Pa October 27, 2023, ŵalara ŵaboma ŵakatizomerezga kuti tingazenga maofesi ghaphya pa Beteli mu tawuni ya Fishkill, New York, U.S.A. Pakuti ŵalara ŵaboma ŵatizomerezga, ichi chikung’anamura kuti sono tingambako kuchita mulimo uwu pa malo agha.

Beteli ya Fishkill yili pa mtunda wa makilomita 64 kumpoto kwa Likuru la Ŵakaboni ŵa Yehova ku Warwick, New York, U.S.A. Ŵabali na ŵadumbu awo ŵakuteŵetera ku Fishkill ŵakovwira pa milimo yakukhwaskana na makompyuta na milimo yinyake.

Maofesi ghaphya ghazengekenge pa malo ghakuru ghakukwana maekara 57. Pa maofesi agha paŵenge nyumba yakudikanya kaŵiri iyo utali wake yizamuŵa masikweya mita 4,366, paŵengeso nyumba yinyake yakusungako na kunozgerako ivyo vyanangika ukuru wake masikweya mita 1,393, na yinyake yakuchitiramo maseŵera ghakukhozga thupi iyo ukuru wake yamuŵa masikweya mita 1,393. Kweniso pakunozgekaso malo ghanyake gha pawaro ghakuchitirako maseŵera ghakukhozga thupi. Ŵabali ŵakaŵikako mahara chomene umo ŵangazengera pa malo agha kuti ivyo ŵazengenge vileke kunanga chilengiwa.

Nangauli ntchito yikuru yichitikenge na ŵabali yayi, kweni ŵabali ŵachoko waka awo ŵakuteŵetera pa Beteli ndiwo ŵalaŵilirenge ntchito iyi. Tikukhazga kuti ntchito yose iyi yizamumara mu October 2025.

Mubali Jason Kahle, uyo wakuteŵetera ku Beteli ya Fishkill wakayowoya kuti: “Beteli ya ku Fishkill yili waka na malo ghakugona, yilije malo ghakuti ŵabali na ŵadumbu ŵangasangana na kugwilira pamoza ntchito. Kweni maofesi ghaphya agha ghaŵenge na malo ghakuti tose tingasangana pamoza na kugwilira lumoza ntchito. Tikulindilira mwakunweka nyengo apo ntchito yakuzenga maofesi iyi yizamumalira.”

Tili ŵakukondwa chomene na ntchito iyo yichitikenge pa malo agha iyo yiwovwirenge kuti wose awo ŵakuteŵetera ku Beteli ya Fishkill ŵaŵe ŵakukolerana. Nase tikulombera nawo lumoza ŵabali aŵa kuti Yehova waŵawovwire pa ntchito yakukondweska iyi.—Salimo 127:1.