Pa June 28, 2023, tikapokera nkhani yakukondweska chomene yakukhwaskana na mulimo wakuzenga ofesi yithu ku Ramapo, New York, U.S.A. Dipatimenti Yakuwona vya Mapulani Ghakuzenga mu Tawuni ya Ramapo yili kuzomerezga mapulani gha umo tizengerenge ku chigaŵa ichi. Nangauli pali tunyake na tunyake uto ŵatiphalira kuti tigwilirepo ntchito kweni pakuti ŵatizomerezga vitovwirenge kuti tambepo ntchito iyi.

Chakukondweskaso chomene ntchakuti panyengo iyo Dipatimenti iyi yikakumananga na ŵanthu awo ŵali kuzingilizga malo agha, ŵanthu wose pamoza na ŵalara ŵawo mu chigaŵa ichi ŵakasuska yayi panji kudandawurapo na nkhani iyi kweni ŵakakolerana navyo. Mubali Keith Cady, uyo ngwa mukomiti ya vyakuzenga, wakati: “Patora myezi yinandi kuti tinozge na kukapeleka mapulani gha umo tizengerenge ku malo agha, ku Dipatimenti Yakuwona vya Mapulani Ghakuzenga kweniso kulondezga vyose ivyo vikakhumbikwanga. Chilato chithu chikaŵa chakuti tichite vyose ivyo vikakhumbikwanga kuti chikaŵaŵire chipusu kutizomerezga.” Dipatimenti Yakuwona vya Mapulani Ghakuzenga yikawona kuti tikaŵikapo mtima chomene kulondezga malango ghawo ntheura ŵakasuzga yayi kutizomerezga. Mubali David Soto uyoso ngwa mukomiti ya vyakuzenga wakayowoya kuti: “Vidumbirano vyose na Dipatimenti Yakuwona vya Mapulani Ghakuzenga ya mutawuni iyi vikatora maminiti ghachoko waka. Tikuwonga chomene dipatimenti iyi chifukwa chakulimbikira kwawo kweniso kukolerana kwawo. Tikulindilira mwakunweka kuzakagwiraso nawo ntchito zinyake munthazi umu.”

Pakuti sono ŵatizomerezga viwovwirenge kuti tambepo mulimo withu wakuzenga. Mubali Cady wakayowoyaso kuti: “Chikuru makuni agho ghali kuwiskika pa malo agha ghafumiskikapo, mbwenu mulimo pa malo agha ukwambikapo. Para ivi vyachitika, pazamukhumbikwira ŵanthu ŵakujipeleka ŵanandi kuti ŵambepo kugwira ntchito pa malo agha chaka chikwiza. Chikaŵa chakukondweska chomene kwa tose ise tikaŵapo apo ŵakatizomerezganga kuti tingambapo mulimo withu.”

Nga gulu, tikuwongaso chomene Yehova pakuti pasono ŵali kutizomerezga. Tikulomba kuti walutilire kutumbika wose awo ŵakunjizgikamo mu mulimo uwu kuti ‘ŵakhozge mawoko ghawo kuti ŵachite mulimo uwemi.’—Nehemiya 2:18.