Pa March 8, 2022, Construction Project Committee (CPC) ku Ramapo yikapokera uthenga wakuzirwa chomene kufuma ku ŵamazaza ŵakuwona vya mapulani mu tawuni ya Tuxedo. Uthenga uwu ukaŵa wakuŵazomerezga kuti ŵangambapo ntchito ya kunozga na kusazgirako msewu wakulutira uko kuzamuŵa maofesi ghithu ku Ramapo. Chinyakeso ntchakuti, ŵabali ŵithu ŵakulutilira kulindilira waka kuti ŵamazaza ŵakuwona vya mapulani mu tawuni ya Ramapo ŵaŵazomerezge kwamba ntchito yakuzenga maofesi ghithu pa malo agha. a

Mubali Robert McRedmond, uyo ni mulaŵiliri wa Construction Project Committee (CPC), wakati: “Tikati tamba waka kugwilirapo ntchito pa mapulani gha maofesi agha, tikawona kuti msewu wakulutira ku malo agha ukwenera kunozgeka. Na umo ŵatizomerezgera kunozga msewu uwu, mbwenu chiŵenge chipusu kuti tilembe ntchito ŵanthu ŵanyake mwakuti ŵasazgireko na kunozga makora msewu uwu ivyo vizamovwira kuti magalimoto ghazakaleke kusuzgika kwenda. Ntchito iyi yikuchitika na ŵanthu awo tili kuŵalemba ntchito ndipo yimalenge kuumaliro wa chihanya chaka chino. Ŵabali ŵakujipeleka ŵakugwira kale ntchito yakunozga buliji ilo pakujumpha msewu wakulutira ku malo agha.”

Mubali Gary Stradowski, uyo wakuteŵetera mu komiti ya vyakuzenga wakuti: “Takondwa chomene kuti ŵatizomerezga. Takhala pachoko kuti ŵatizomerezge kwambapo ntchito yose yakuzenga pa malo agha. Para tazomerezgeka waka, mbwenu makampani gha vyakuzenga ghambengepo ntchito ya kunozga malo agha cha kuumaliro wa 2022. Para ndimo vyenderenge, awo ŵajipeleka kovwirapo pa mulimo uwu ŵazamwamba kugwira ntchito cha mukatikati mwa 2023.”

Tili ŵakukondwa chomene chifukwa cha kupulika umo vinthu viliri pasono ndipo tikulomba kuti Yehova walutilire kulongozga ntchito iyi.—Zekariya 4:6.