Ŵawukirano ŵithu pa charu chose ŵakuŵikapo mtima kuti ŵalutilire kuchita vinthu vyauzimu kweniso kuti ŵapharazge na kukhozga Ŵakhristu ŵanyawo munyengo ya muliri wa coronavirus.

Ku New Zealand, ŵanthu ŵakuŵika vidoli kweniso vithuzi mu mawindo kuti ŵana ŵaviwonenge para ŵakujumpha pa nyumba zapafupi izo zili mu chigaŵa chawo. Kweni ŵana ŵa Ŵakaboni ŵa Yehova mu mipingo yakupambanapambana ŵakupanga mapositara agho ŵakujamburapo Kalebi na Sofiya na kulembapo mazgu ghakuti “Niwonelerani pa jw.org.”

Emilia, wa vyaka 9 wakukhala ku Switzerland, ndipo chivikiliro chake cha muthupi ntchakukhira. Iyo wakaŵalembera makalata awo ŵakukhala ku nyumba zakupwelelerako ŵachekuru chifukwa pasono ntchakuzomerezgeka yayi kukaŵawona. Mu makalata agho wakalemba, wakajamburamoso Nowa na chingalaŵa. Wakalongosora kuti nyengo yinyake Nowa na banja lake ŵakakhalanga kwa ŵekha, kweni ivi vikawovwira kuti ŵaŵe ŵakuvikilirika. Ntheura wakaŵachiska kuti “ŵakwenera kukhala mukati nga ni Nowa.” Para muliri uwu wamara, Emilia wakukhumba kuti wazakalute ku malo agha kuti wakachezge na ŵanthu awo ŵakukhala uku.

Ŵanthu ŵakazgora makalata agho Emilia wakalemba, ndipo nayo wakaŵalemberaso. Mutolamakani munyake wakapulika vya Emilia ndipo wakamulemba mu nyuzipepala.

Peyton na Ella Kempf, ŵadumbu ŵawukirano awo ŵakukhala ku Ontario, Canada, ŵakulutilira kuchezga na ŵabali na ŵadumbu ŵa mpingo wawo pa nyengo yakusuzga iyi. Adada ŵawo a Jared, ŵakulongosora kuti: “Panyengo yakusopa kwa mbumba, ŵana ŵithu ŵakutovwira chomene kusanga ŵanthu awo tikukhumba kuŵajoyina.” Amama ŵawo a Jessica, ŵakati: “Tikukhumba kuŵasambizga ŵana ŵithu ŵasungwana kuti ntchakuzirwa kuti ŵabali na ŵadumbu ŵithu, ŵa mu banja lithu kweniso ŵabwezi ŵithu, ŵamanyenge kuti tichali kuŵakumbuka.”

Kweniso ku Colorado, U.S.A., mwana wa vyaka 9 zina lake Stella wakapangana na amama ŵake kuti ŵachezgenge na ŵabali kweniso ŵadumbu ŵachekuru ŵa mu mpingo wawo. Ŵakalemba mazina ghawo na kuyowoya nawo pa foni.

Ŵabali ŵaŵiri, Jonathan na Sean McKampson, ŵa vyaka 12 na 15, ŵakuteŵetera pamoza na ŵapapi ŵawo mu mpingo wa chiyowoyero cha Chitchayinizi ku Arizona. Iwo ŵakulutilira kupharazgira ŵanthu mwa kuŵalembera makalata mu Chitchayinizi. Ŵakulemba makalata agha mulenji uliwose pambere ŵandalute ku sukulu. Pakuti ŵachali kusambira Chitchayinizi, pakutora nyengo kuti ŵamalizge kulemba makalata agha ndipo vikukhumba kuŵikapo mtima. Ndipouli, ŵakuyezgayezga kuti ŵapharazgire ŵanthu awo ŵakuyowoya Chitchayinizi.

Ŵana 6 ŵa vyaka vyapakati pa viŵiri mpaka 15 nyengo zose ŵakalutanga kunyumba izo ŵakusungirako ŵachekuru cha kumanjiliro gha dazi kwa Michigan, pamoza na amama ŵawo kweniso mudumbu mupayiniya. Kweni chifukwa cha muliri wa coronavirus, ŵalara ŵaboma ŵali kukanizga kulutako ku malo agha. Ntheura pasono ŵapapi ŵakutumizga ku malo agha mavidiyo agho ghakulongora ŵana ŵakwimba sumu za Ufumu panji ŵakuŵazga mavesi gha mu Baibolo. Yumoza wa awo ŵakugwira ntchito kunyumba za kupwelelerako ŵachekuru, ŵakaphalira dada wa ŵana aŵa kuti vidiyo yinyake iyo ŵakatuma, yikawovwira yumoza wa awo ŵakukhala ku malo agha kuti waleke kufipa mtima chomene na ivyo wakawona pa TV vyakukhwaskana na ŵanthu awo ŵakafwa na coronavirus.

Tikugomezga kuti Yehova wakutumbika ŵawukirano aŵa, awo ŵakuŵikapo mtima kulongora chitemwa ŵazengezgani ŵawo kweniso kulumba Yehova mwakuyezga kusanga nthowa ziphya zakupharazgira.—Salimo 148:12, 13.