SEPTEMBER 22, 2023
NKHANI ZA PA CHARU CHOSE
Ŵanthu Ŵakakondwa na Uthenga wa Ufumu ku Mpoto kwa Canada na United States
Mubali Mark Sanderson wakudumba nkhani yakujulira Nyumba ya Ufumu ku Iqaluit, Nunavut
Pa May 20, 2023, Mubali Mark Sanderson, uyo njumoza wa mu Wupu Wakulongozga, wakayowoya nkhani yakujulira Nyumba ya Ufumu yiphya ku Iqaluit, Nunavut, Canada. Pa nkhani iyi pakaŵa ŵanthu ŵakukwana 44 awo ŵakategherezga maso na maso ndipo ŵanyake 388 ŵakajoyina pulogiramu iyi kwizira pa vidiyokonferensi. Nunavut ntchimoza mwa vigaŵa ivyo vili na ŵanthu ŵachoko chomene pa charu chapasi. Chigaŵa ichi chili na ŵanthu ŵachoko awo ŵangakwana yayi 40,000 kweni ntchikuru masikweya kilomita 1,837,000. Nga umo tikayowoyera mu lipoti, ŵabali na ŵadumbu ŵithu ŵakatonda masuzgo ghanandi kuti ŵazenge Nyumba ya Ufumu iyi. Ŵabali ŵachikanga awo ŵakiza kuzakapharazga uthenga uwemi ku malo agha, ŵakazizipizga nyengo yakuzizima kweniso masuzgo ghanyake. Mu nkhani yakujulira Nyumba ya Ufumu Mubali Mark Sanderson wakayowoyamo ivyo ŵabali ŵakugomezgeka aŵa ŵakachita.
Vigaŵa vya kumpoto kwa Canada vikupanga 40 peresenti ya charu ichi, ndipo vikusazgapo Nunavut, vigaŵa ivyo vili ku Mpoto cha kumanjiliro gha dazi na Yukon
Mu 1976, Mudumbu Margaret Gallie wakenda mtundu wa makilomita 2,052 kufuma ku Montreal, Quebec, kuluta ku Iqaluit, Nunavut. Iyo wakaŵa Kaboni wakwamba kupharazga ku malo agha. Pamanyuma mu chaka chenechichi, Mubali Hans Pintar, uyo wakaŵa mulaŵiliri wadera pamoza na muwoli wake Minerva, ŵakaluta ku malo agha pa sabata yapadera na chilato chakukakhozga Mudumu Gallie na kupharazgira nayo lumoza mu uteŵeti.
Pamanyuma, mu 1983, kagulu ka Ŵakaboni ŵakujipeleka kakaluta ku Iqaluit. Chifukwa chakuti ŵakaŵikapo mtima, ŵakawovwira banja linyake ku malo agha kumanya unenesko, ndipo banja ili ndilo likaŵa lakwamba kubatizika kuŵa Ŵakaboni ŵa Yehova. Mu vyaka 20 vyakulondezgapo, ŵapharazgi ŵachikanga ŵakalutako ku malo agha kanandi waka na chilato cha kukapharazga uthenga uwemi. Mu 2008, kagulu kakakhazgikiskika ku Iqaluit. Ndipo kufika mu 2010, kagulu kachoko aka kakakura kuzgoka mpingo, ndipo ŵakachitiranga maungano ghawo mu holo ya sukulu iyo ŵakachitirangamo maseŵero ghakukhozga thupi. Ŵabali na ŵadumbu ŵakakondwa chomene apo mu October 2022, ŵakamba kuwungana mu Nyumba ya Ufumu yiphya iyo yikazengeka.
Kwa vyaka vinandi ŵabali ŵakujipeleka kukapharazga ku vigaŵa vyakusuzga kufikako ku mpoto kwa Canada
Padera pakupharazga ku Iqaluit, ŵapayiniya ŵapadera kweniso ŵabali na ŵadumbu ŵanyake ŵakapharazgaso mu vigaŵa vyakupambanapambana ku Nunavut. Yumoza wa iwo wakaŵa Mubali Joel Therrien na muwoli wake, Cheryl. Iwo ŵakasamukira ku Nyanja ya Baker iyo yili pa mtunda wa makilomita 1,329 kumanjiliro gha dazi kwa Iqaluit. Mubali Therrien wakayowoya kuti: “Nangauli ku malo agha kukuzizima, ghali kumphepete kweniso pakakhumbikwanga ndalama zinandi, kweni chikaŵa chakwenelera kukapharazgako. Vikaŵa vyakuwonekerathu kuti Yehova wakatumbikanga kuyezgayezga kwithu chifukwa ŵanthu ŵakategherezganga makora uthenga withu. Tikuwonga chomene kuti tikaŵa na mwaŵi wakupharazgira ŵanthu ŵa ku malo agha uthenga wa mu Baibolo.”
Mubali Joel Therrien na Mubali Joseph Utatnaq pa ungano wa chigaŵa wa mutu wakuti ‘Lutilirani Kuzikira’! ku Winnipeg, Canada, pa August 25, 2023
Joseph Utatnaq njumoza mwa ŵanthu awo ŵakukhala kufupi na Nyanja ya Baker ndipo wakazomera uthenga wa Ufumu. Iyo wakazomera kusambira Baibolo na Mubali Therrien ndipo wakabatizika mu 2021. Pasono Mubali Utatnaq ndiyo ni mupharazgi yekha uyo waliko ku Nyanja ya Baker. Wakati wamanya kuti pulogiramu yakujulira Nyumba ya Ufumu ku Iqaluit yamuchitika mu mwezi wa May 2023, iyo wakaŵikapo mtima kuti wakasangikepo. Kwa iyo aka kakaŵa kakwamba kuwungana na ŵabali kweniso ŵadumbu maso na maso mu Nyumba ya Ufumu kufuma waka apo wakabatizikira. Iyo wakuti: “Nkhakondwa chomene kuwona Nyumba ya Ufumu iyo yikaŵa kuti yamara kuzengeka. Ŵanandi awo ŵakajipeleka kuzenga Nyumba ya Ufumu iyi ŵakaŵa ŵanthu ŵa mu chigaŵa chithu yayi, ndipo ŵakaŵa kuti ŵandazgoŵere nyengo ya ku malo agha. Chikaŵa chakuwonekerathu kuti ŵakajipeleka kuchita ntchito iyi chifukwa chakuti ŵakutemwa Yehova kweniso ŵazengezgani ŵawo.”
Pasono ku malo agha kuli ŵabali na ŵadumbu ŵakukwana 178 ndipo ŵali mu mipingo yinayi ku mpoto kwa charu ichi. Pa mipingo iyi, umoza uli ku Nunavut, yiŵiri yili ku mpoto cha kumanjiliro ya dazi ndipo umoza uli ku Yukon. Vigaŵa ivi vikupanga pafupifupi 40 peresenti ya charu cha Canada. Nangauli kumpoto kwa charu cha Canada ichi kukuzizima chomene kweniso kuli vigodobu na malibwe mwakuti chikuŵa chakusuzga kupharazgira ŵanthu ŵa ku malo agha, kweni tikuwonga chomene ŵabali na ŵadumbu awo ŵakujipeleka kukapharazga makani ghawemi ku malo agha.—Milimo 1:8.
VIGAŴA VYAKUSUZGA KUFIKAKO KU ALASKA, U.S.A.
Pachanya kumalyero: Nyumba ya Ufumu ku Haines, Alaska. Pasi kumalyero: Ŵabali na ŵadumbu ku Haines ŵawungana mu Nyumba ya Ufumu yiphya
Alaska ntchigaŵa chikuru chomene ndipo chili ku mpoto kwa United States. Ntchikuru masikweya kilomita 1,723,000, mwakuti chigaŵa cha Texas chinganjiramo kaŵiri. Ku Alaska kuli ŵanthu pafupifupi 730,000. Uthenga wa Ufumu ukafika kakwamba ku Alaska kukwambilira kwa 1897, ndipo pasono kuli ŵapharazgi pafupifupi 2,400 awo ŵali mu mipingo 30 na magulu 8. Mu msumba ukuru wa Alaska wakuchemeka Anchorage, muli mipingo 10 na magulu 5 mu viyowoyero vyakupambanapambana kusazgapo Chihmong (White), Chikorea, Chirussia, Chisamoa, na Chiyupik cha ku Central Alaska, icho ntchiyowoyero cha ku malo agha. Mu misumba yinyake nga ni Fairbanks, Juneau, na Wasilla, namo muli mipingo na magulu mu viyowoyero vyakupambanapambana. Kweniso uthenga uwemi ukupharazgikaso mu vigaŵa vinyake vyakusuzga kufikako nga nkhu misumba yichokoyichoko ya Bethel, Wrangell, na Haines.
Mubali Kenneth Cook, Jr., wakudumba nkhani yakujulira Nyumba ya Ufumu ku Haines, Alaska
Mu August 2014, ŵapayiniya ŵapadera ŵaŵiri, Mubali Sebabi Leballo na Dustin Watson, ŵakachemeka kuluta ku Haines, chigaŵa icho chili ku Alaska, mtunda wa makilomita 825 kumwera kumafumiro gha dazi kwa Anchorage. Mu chaka chimoza ŵakachitiskanga masambiro gha Baibolo 40 na ŵanthu ŵakunweka ŵa mu chigaŵa ichi. Ndipo ŵanyake mwa ŵanthu aŵa ŵakakura mwauzimu na kubatizika. Mu 2018, mpingo uchoko ukakhazikiskika ku Haines ndipo ŵabali na ŵadumbu ŵakawungananga ku layibulare ya ku malo agha. Mu 2021, ŵakagura nyumba na kuyizgora kuŵa Nyumba ya Ufumu. Pamanyuma mu September 2022, Mubali Kenneth Cook, Jr., uyo njumoza wa ŵa mu Wupu Wakulongozga, wakadumba nkhani yakujulira Nyumba ya Ufumu iyi. Pa nkhani iyi pakaŵa ŵanthu 48, ndipo ŵanthu 86 ŵakajoyina pulogiramu iyi kwizira pa vidiyokonferensi. Pasono mpingo uwu uli na ŵapharazgi 21, ndipo ukupharazga makani ghawemi ku Haines na malo ghanyake ghakutali.
Mubali Dustin Watson (kumazere) na Mubali Sebabi Leballo (kumalyero) ŵati ŵafika ku Haines, Alaska, mu 2014
Mubali Leballo ŵati wategherezga nkhani yakujulira Nyumba ya Ufumu ku Haines mu 2022, wakayowoya kuti: “Apo nkhiza kuno vyake 8 ivyo vyajumpha, chikaŵa chakusuzga kughanaghana kuti ku malo agha kungaŵa mpingo na Nyumba ya Ufumu. Ntchakukhozga chomene kuwona kuti nanga ni mu vigaŵa vyakutali Yehova wakovwira ‘ŵanthu ŵa mitundu yose’ kusambira vya iyo.”—1 Timote 2:4.
