Ŵapapi ŵanandi awo Mbakaboni ŵakugwiliskira ntchito Nkhani za pa JW kuti ŵakhozge chipulikano cha ŵana ŵawo.

Takehara, uyo ni mama ku Japan, wakuŵerenga na kudumbiskana na mwana wake munyamata Naoki wa vyaka 12, Nkhani za pa JW. Iwo ŵakupulinta vithuzi vya ŵabali na ŵadumbu awo ŵakuzunulika mu nkhani izi na kuvibatika pa chiliŵa. Fumiko wakuti: “Tikuŵazunuranga mazina ghawo mu lurombo. Tikukhozgeka chomene kumanya kuti Yehova wakuŵapa chimwemwe ŵanthu ŵake nanga ni apo ŵali mu jele. Visko vya ŵabali aŵa vikulongora kuti ŵali na chimwemwe. Viyelezgero viwemi vya ŵabali aŵa vikovwira mwana wane kuti walutilire kuŵa wakugomezgeka kwa Yehova nanga ni para wali ku sukulu.”

Mubali Kilanko Zannou, uyo ni dada wa ŵana ŵaŵiri ku Côte d’Ivoire wakuti: “Zuŵa lililose nkhuwonanga nkhani izo zaŵikikapo pa jw.org.” Kanandi Kilanko wakugwiliskiranga ntchito malipoti agho ghakuŵapo pa nyengo ya kusopa kwa mbumba. Iyo wakuwona kuti mbumba yake, kusazgapo na mwana wake munyamata wa vyaka 7, Matthias, ŵasambira vinandi kufuma ku ŵabali awo ŵakuzizipizga mwachikanga nthambuzgo izo ŵakukumana nazo.

Pakwamba Matthias wakachitanga wofi kupharazgira ŵanyake ŵa ku sukulu. Kilanko wakulongosora kuti: “Tikati tamalizga kusopa kwa mbumba, Matthias wakayowoya mwakukondwa kuti: ‘Sono ningachitaso wofi yayi kupharazga!’”

Mubali Holmes Simatupang, uyo ni dada ku Indonesia, wakaŵerenga lumoza na ŵana ŵake ŵaŵiri nkhani yakulongosora vya Ŵakaboni ŵawukirano awo ŵakaŵalekeska sukulu chifukwa cha kukana kusindamira ndembera.

Mubali Simatupang wakuti: “Ŵana ŵithu wose ŵaŵiri nawo ŵakusangana na masuzgo ghakuyana waka ku sukulu kwawo. Kanandi waka ŵasambizgi ŵawo na ŵanyawo ŵakuŵachichizga kuti ŵasindamire ndembera, kwimba sumu ya fuko, na kuchitako vinthu vinyake vya chisopa. Ivi vikapangiska kuti kwa tumazuŵa ŵana ŵithu ŵachitenge wofi kuluta ku sukulu.

Holmes wakulutizga kuti: “Tikati tadumbiskana nkhani ziŵiri zira pa kusopa kwa mbumba, pasono ŵana ŵithu ŵangayowoya mwachikanga chifukwa icho ŵakulekera kuchitako vinthu vyose ivi. Pasono ŵakufipaso mtima chomene yayi kuti ŵangalekeskeka sukulu.”

Mudumbu Lady Nery Passos wa ku Brazil wakuti: “Apo mwana withu munyamata, Pedro, wakaŵa na vyaka 5 panji 6, wakasanganapo kale na chiyezgo cha kukondwelera mazuŵa ghakubabikira ku sukulu kwawo.” Kuti wamovwire mwana wake, wakaghanaghanirapo vya ŵabali na ŵadumbu ŵanandi awo ŵakuzunulika mu Nkhani za pa JW, awo ŵakanozgekerathu umo ŵangachitira para ŵasangana na viyezgo. Iyo wakulongosora kuti: “Pa nyengo ya kusopa kwa mbumba tikayezgeleranga vyakuchitika vyanadi, ivi vikamovwira kuti wamanye ivyo wangachita para ku sukulu kwawo ŵakukondwelera mazuŵa ghakubabikira.” Nakuti ivyo ŵakachitanga apa vikamovwira Pedro kuti waŵe wakunozgeka kuvikilira vigomezgo vyake.

Nkhani za pa JW zikutikumbuska waka umo Yehova wakukhozgera kweniso kupwelelera ŵateŵeti ŵake ŵakugomezgeka. Tili na vifukwa vinandi vyakugomezgera kuti para tasangana na viyezgo ‘tizuzgikenge na mzimu utuŵa na chimwemwe chikuru’ kuti tizizipizge.—Milimo 13:50-52.