Mubali Femi Durodola na muwoli wake Yana, ŵakawuka 5 koloko mulenji apo mubali mulara munyake wakaŵayimbira foni. Yana wakuti: “Mubali uyu wakati: ‘Kufipa mtima yayi, imwe nozgekani waka. Ŵasilikari ŵa ku Russia ŵakwiza ku Kyiv!’ nkhati napulika waka nthena, munthumbo mukati waka songonu!”

Banja ili, ilo likaŵa kuti latorana waka mwasonosono, likanozgeka, kumwa khofi kaumaliro mu nyumba yawo, na kuŵerenga lemba la zuŵa la dazi ilo. Lemba lake likaŵa lakuti: “Musangenge nkhongono chifukwa cha kukhala mwakufwasa na kugomezga.” (Yesaya 30:15) Kufuma apo, Femi wakalomba kwa Yehova kufuma pasi pa mtima. Femi, uyo ngwa ku Nigeria, na Yana uyo kwake nkhu Ukraine, ŵakatora vikwama vyawo vya pangozi na kuleka chilichose icho ŵakaŵa nacho na kuchimbilira ku Netherlands.

Ivi ndivyo vikachitikira ŵabali na ŵadumbu ŵanandi awo ŵali kusankha kuchimbira ku Ukraine pamanyuma pakuti boma la Russia lawukira charu cha Ukraine pa February 24, 2022. Ku Ukraine kuli Ŵakaboni ŵa Yehova pafupifupi 130,000. Kufika pasono, Ŵakaboni ŵakujumpha 36,000 ŵali kusama dankha mu nyumba zawo ndipo ŵanyake ŵakujumpha 16,000 ŵali kuchimbilira ku vyaru vinyake. Ŵanandi awo ŵachimbira ŵakuleka nyumba zawo, ntchito na mipingo iyo ŵakawunganangako. Apo nkhondo yikaŵa mukati, ŵanalume ŵa ku Ukraine ŵa vyaka vya pakati pa 18 na 60 ŵakazomerezgekanga yayi kufuma mu charu ichi. Ndipouli, ŵanalume awo ŵakaŵa ŵenekaya ŵa vyaru vinyake ŵakazomerezgekanga kufuma.

Awo ŵasankha kuchimbira ŵakuyegha waka vinthu vichoko waka, ndipo ŵakukwera sitima za pamtunda panji mabasi na kwenda ulendo wakusuzga kuti ŵakasange malo ghakuvikilirika, nakuti nyengo zinyake ŵakumanyanga yayi uko ŵamufikira. Chipulikano chawo mwa Yehova ndicho chikuŵawovwira kuti ŵafumemo mu misumba iyo yasakazikirathu na nkhondo, ndipo ŵakumanya yayi usange ŵamuweraso uko ŵaluta.

Yana wakuti: “Tikaleka chilichose icho tikaŵa nacho. Tikayegha waka tunthu tuchoko waka. Ivyo vikachitika apa vikatikumbuska fundo yakuti chinthu chakuzirwa chomene mbubwezi wako na Yehova.”

Apo wakaŵa ku nyumba yake ku Kyiv, Mudumbu Lilia Antoniuk wakapulikanga kulira kwa alamu yakuchenjezga kuti kukwiza mabomba kweniso kulira kwa kuphulika kwa mabomba. Msewu wose ukazura waka na magalimoto ghakotcheka na viswaswa vyakufuma ku nyumba na mabuliji agho ghakabwanganduka.

Lilia na mwana wake mwanakazi wa vyaka 17 zina lake Oleksandra, ŵakasankha vya kuchimbira mu charu ichi. Kwa mazuŵa ghanandi, ŵakenda pa sitima ya pamtunda iyo yikazura na ŵanthu kuluta ku Poland. Ŵakaŵa na chakurya chichoko chomene, ndipo ŵakimilira kwa maora ghanandi. Ŵadumbu aŵa mitima yawo yikamba kuŵa m’malo ŵati ŵafika ku Przemyśl, Poland.

Lilia wakuti: “Tikati tawona waka ŵabali awo ŵakaŵa na vikhwangwani vyakulembeka ‘JW.ORG’, tikamanya kuti vyose viŵenge makora.” Ŵadumbu aŵa ŵakaŵatolera ku Nyumba ya Ufumu uko ŵakasanga malo ghakuthukira, ŵakaŵapa chakurya, ndipo ŵakapumurako dankha pambere ŵandalute ku nyumba izo ŵakaŵanozgera.

Lilia uyo pasono wali ku Germany wakuti: “Tikajipulika kuti Yehova wakutipwelelera ndipo chipulikano chithu chikakhozgeka. Nkhumuwonga chomene Yehova chifukwa cha chitemwa chake kweniso chifukwa cha ŵabali na ŵadumbu awo mbakunozgeka kutovwira mu nyengo zakusuzga.”

Mudumbu Anastasiia Kovalyova wakalongosora umo ŵasilikari ŵa ku Russia ŵakawukira msumba wa Zaporizhzhia kufuma muchanya. Wakawona waka moto chee! Kufuma mu vimashini vikuru vyakuponyera mabomba ndipo kukapulikikwanga chiwawa chikuru cha kuphulika kwa mabomba. Chifukwa chakuti mabomba agha ghakalutiliranga kuphulika, vikapangiska kuti muphwa wake na muvyara wake awo mbana ŵachoko ŵa vyaka 7 na vitatu ŵachite wofi chomene, ndipo mbumba iyi yikasankha vya kusamuka waka. Anastasiia wakuti: “Pakuti tikatondeka kunyamura vinthu vinandi, tikaŵavya malaya na vinthu vinyake vyakukhumbikwa. Kweni ŵabali ŵakatipa chilichose. Tikaŵa na chilichose chakukhumbikwa kuluskaso na ivyo tikakhazganga.” Anastasiia, mulamu wake Anya, pamoza na ŵana ŵakachimbilira ku Germany ndipo ŵakenda nthowa ya ku Poland.

Mudumbu Anastasiia Shchukina na amama ŵake, Mudumbu Olha Lysenko, ŵakabisamanga mu kachipinda kapasi ako kakaŵa kakuzima chomene para ŵapulika waka alamu yakuchenjezga kuti kukwiza mabomba. Ŵadumbu aŵa mbapayiniya ndipo ŵakateŵeteranga ku dera lakusoŵa mu tawuni yichoko ya Brailiv, Vinnytsia Oblast. Vikaŵasuzga chomene kuti ŵasankhe kufumako ku chigaŵa ichi, kweni paumaliro ŵakasankha kufumako ŵati ŵawona kuti vinthu vyafika paheni. Ŵakayegha waka vyakukhumbikwira pera, ndipo ŵakapuvya tulo na kwenda pa sitima ya pamtunda kwa mazuŵa ghaŵiri. Mudumbu Olha ndiyo wakasuzgika chomene pa ulendo uwu chifukwa wali na vyaka 58 kweniso wali makora viŵi yayi mu thupi. Ŵakafika ku Rzeszów, Poland, 2 koloko mulenji. Ŵabali na ŵadumbu ŵanyake ŵakaŵa kuti ŵali kale kwenekuku kuti ŵaŵapokelere. Anastasiia wakuti: “Nangauli kukaŵa cha ku matanda kucha kweni ŵabali ŵakatilindiliranga. Tikuwonga chomene Yehova kweniso ŵabali na ŵadumbu.”

Mu msumba wa Sumy, Mubali Andrzej Chyba, uyo ngwa ku Poland na muwoli wake Elizabeth, wa ku Britain, ŵakabisama mu kachipinda kapasi ka mubali munyake pamoza na ŵanyawo 5. Ndege za nkhondo zikapulikikwanga kuti zikujumpha, kweniso kulira kwa futi na mabomba. Ŵabali ŵakakhozgeka chifukwa cha kuwonelera vidiyo yakuti, A Yehova, . . . Ine Nkhuthemba Imwe, iyo yikulongosora ivyo Themba Hezekiya likachita apo Ŵaasiriya ŵakiza kuzakawukira Yerusalemu.

Andrzej, uyo pasono wali ku Poland pamoza na muwoli wake, wakuti: “Ŵabali ŵatitumira Malemba ghakukhozga kanandi waka, mwachiyelezgo ŵakatichiska kuti tiŵazge lemba la Salimo 27.”

Tikugomezga kuti Yehova waŵatumbikenge ŵabali ŵithu awo ‘ŵataya vinthu vyawo vyose’ apo ŵakulindilira waka munthazi umo muzamuŵavya nkhondo.—Ŵafilipi 3:8.