Ungano wa Chigaŵa wa 2020 wakuti, ‘Sekelerani Nyengo Zose’! ukachitika mu nthowa yakupambanako na vyaka vyose kumasinda uku, mu mbiri ya Ŵakaboni ŵa Yehova. Pulogiramu yose ya ungano uwu yikang’anamurika mu viyowoyero vyakujumpha 500, ndipo ŵanthu ŵakawoneleranga uku ŵali ku nyumba zawo. Awo ŵakachitako ntchito yakung’anamura, ŵakayezgayezga kuchita ntchito iyi nangauli ŵakakumana na masuzgo ghanandi, nga nkhuchepa kwa vinthu vyakugwilira ntchito kweniso nyengo.

Mwanakazi munyake uyo wakovwirapo pa ntchito yakung’anamura mu chiyowoyero cha Chikikuyu ku Kenya wakati: “Chifukwa chakuti ŵanthu ŵakuzomerezgeka yayi kufuma panji kunjira ku maofesi ghithu, tikaŵa na ŵanthu ŵachoko waka ŵakuti tiŵagwiliskire ntchito mu mavidiyo. Kuti vinthu viŵeko makora, tikagwiliskirangaso ntchito ŵabali na ŵadumbu awo ŵakukhala mu vigaŵa vyakutali. Ndise ŵakukondwa chomene kuwona umo mzimu wa Yehova ukatovwilira.”

Awo ŵakuchita ntchito ya kung’anamura ku Korea kusazgapo na awo ŵakung’anamura mu Chiyowoyero cha Mawoko cha ku Korea, nawo ŵakasangana na masuzgo ghakuyana waka. Awo ŵakuchita kwendera kuti ŵakawovwirepo pa ntchito iyi, ŵakaŵa kuti ŵangiza yayi ku Beteli kuti ŵazakajambure mavidiyo.

Kuti ŵamarane na suzgo ili, ŵabali ŵakapanga waka ŵekha masitudiyo mu nyumba zawo. Ŵabali ŵanandi ŵakajipeleka kovwirapo pa vinthu ivyo vikakhumbikwanga pa kujambura mazgu gha mu mavidiyo. Chifukwa chakuti maungano gha dera ghose ghakayimiskika dankha, ŵabali ŵakaŵa na mwaŵi wakugwiliskira ntchito vinthu vinyake vya pa ungano nga makamera kuti ŵajambure pulogiramu ya ungano mu chiyowoyero cha mawoko.

Ku Venezuela, awo ŵakuchita mulimo wa kung’anamura ŵakasangana na suzgo la Intaneti. Ŵanyake ŵakaŵavya vyakugwilira ntchito vyakukwana. Kweni wose ŵakayezgayezga kuchita ivyo ŵangafiska kuti m’paka ŵafiske ntchito yawo. Mwachiyelezgero, ku chigaŵa chinyake awo ŵakung’anamura ŵakaŵika matiresi mu chipinda icho ŵakajambuliranga mavidiyo, kuti mazgu ghapulikikwe makora kwambura chiwawa.

Ku Juba, South Sudan, ŵakung’anamura mabuku ghithu mu Chizande. Yumoza wa awo ŵakagwirako ntchito yakung’anamura wakati: “Nkhati napulika kuti tijamburenge pulogiramu yose ya ungano wa chigaŵa, mu mtima nkhati, ‘Vingachitika cha! Tingakwaniska yayi kujambura pulogiramu iyo yili na vinthu vyakujumpha 90 vyakukhumbikwira kujambura mu myezi yiŵiri pera.’ Sono pakuti vyose vyachitika makora waka, nkhukhorwa kuti palije nadi chinthu icho chingatondeska Yehova kufiska khumbo lake. Nthowa zake zose izo wakuchitira vinthu ni zakuzizwiska!”—Mateyu 19:26.

Ungano wa Chigaŵa wa 2020 wakuti, ‘Sekelerani Nyengo Zose’! ntchawanangwa chapadera chomene chakufuma kwa Yehova, “uyo khumbo lake ndakuti ŵanthu ŵa mitundu yose ŵamanye makora unenesko na kuponoskeka.”—1 Timote 2:4.