Pa October 9, 2022, Baibolo lakunozgekaso la Malemba Ghakupatulika mu Mang’anamuliro gha Charu Chiphya likafumiskika mu Chisamoa. Mubali Geoffrey Jackson uyo ngwa mu Wupu Wakulongozga ndiyo wakafumiska Baibolo ili mu pulogiramu iyo yikachita kujambulikirathu. Ŵapharazgi ŵa ku American Samoa, Australia, New Zealand, na Samoa ŵakawonelera pulogiramu iyi. Nkhani yakufumiska Baibolo ili yati yamara waka, nyengo yeneyiyo ŵanthu ŵakapokera Mabaibolo ghakuchita kupulinta ndipo lakuŵerengera pa intaneti nalo likaŵa kuti ŵanthu ŵangapanga dawunilodi.

Ŵakaboni ŵa Yehova ŵakamba kupharazga ku Samoa mu 1931, ndipo mpingo wakwamba ukapangika mu 1953 ku Apia. Baibolo lakwamba la Mang’anamuliro gha Charu Chiphya mu Chisamoa likafumiskika mu 2009. Ŵakaboni pamoza na ŵanthu awo Mbakaboni yayi, ŵakakondwa chomene kupokera Baibolo lipusu ili kweniso lambura kusuzga kulisanga.

Pakuyowoya vya Baibolo lakunozgekaso ili, awo ŵakuchita mulimo wa kung’anamura ŵakawoneseska kuti ŵagwiliskira ntchito mazgu ghapusu agho ŵanthu ŵakuyowoya pasono, ndiposo kuti liŵe launenesko. Yumoza uyo wakang’anamurako wakati: “Ŵanthu awo ŵakuyowoya Chisamoa ŵakuchindika chomene Baibolo. Kukumbuka fundo iyi, kukatovwira kuti tigwiliskire ntchito mazgu ghapusu na ghambura kusuzga kupulikiska. Na wovwiri wa Yehova, pasono tili na Baibolo lakunozgekaso mu Chisamoa ilo litovwirenge chomene.”

Tili na chigomezgo chose kuti Baibolo ili liwovwirenge ŵanthu awo ŵakuligwiliskira ntchito kuti ŵasange chandulo na maghanoghano gha Chiuta withu, Yehova.—Salimo 139:17.