Mu myezi yichoko waka iyo yajumpha, Baibolo la Malemba Ghakupatulika mu Mang’anamuliro gha Charu Chiphya likafumiskika mu viyowoyero vitatu mu vilembo vya braille: Chigerman, Chikoreya, na chiyowoyero cha ku Ukraine. Ghakuŵelengera pa intaneti ghakamba kusangika pa jw.org. Mabaibolo gha mu Chikoreya na chiyowoyero cha ku Ukraine ngakuti awo ŵakugwiliskira ntchito mashini ghakulembera vilembo vya braille ŵangaŵazga na mawoko. Apo Baibolo la Chigerman ndakuti munthu wangaŵazgira pa sikirini.

Nangauli ŵanthu awo ŵakuleka kulaŵiska ŵakugwiliskira ntchito mabuku ghakuchita kujambura na mashini ghakovwira pakulemba manosi, kweni ŵanandi ŵakutemwa kuŵa na mabuku ghenecho kuti ŵaŵazgenge. Mabaibolo gha vilembo vya braille gha mu Chigerman ghali kupangika kale ndipo ghatumizgika ku ŵapharazgi. Apo gha mu Chikoreya ghatumizgikenge mu myezi yikwiza iyi. Chifukwa cha nkhondo iyo yikuchitika ku Ukraine, tikumanya makora yayi apo titumizgirenge Mabaibolo gha vilembo vya braille ku ŵapharazgi mu charu ichi.

Kuti tipange Baibolo la vilembo vya braille tikulemba mazgu ghose agho ghali mu Baibolo la Mang’anamuliro gha Charu Chiphya na maliferensi ghose mu vilembo vya ŵanthu ŵambura kulaŵiska (braille). Vinthu vyakuwoneka na maso nga ni mapu na vithuzi, vyose tikwenera kuvisintha kuti viŵe mu nthowa iyo munthu wambura kulaŵiska wangavipulikiska.

Mudumbu munyake uyo ngwambura kulaŵiska ndipo wakukhala ku Germany wakati: “Nkhuluwa yayi ivyo naŵazga mu vilembo vya braille. Vikovwira chomene kuluska kutegherezga waka. Nakutiso vyanovwira kuti nimutemwenge chomene Yehova na kumugomezga.”

Mabaibolo ghose gha vilembo vya braille ghakupulintika ku Wallkill, New York, U.S.A., mwakugwiliskira ntchito mashini agho ghakupulinta vilembo ivi. Mashini agha ghakudinda tumadoti twa vilembo vya braille pa mapepara ghapadera, ndipo kufuma apo mapepara agha tikughaŵika pamoza na kupanga mavoluyumu agho ghakutumizgika ku maofesi gha munthavi kuti ghalute ku ŵapharazgi. Baibolo lose la vilembo vya braille la Mang’anamuliro gha Charu Chiphya likupangika na mavoluyumu ghakujumpha 30 ndipo ghangakwana pa shelufu ya mamita pafupifupi ghaŵiri.

Yumoza wa awo ŵakapangako Baibolo la mu chiyowoyero cha Chikoreya wakati: “Para tikughanaghanira waka vyandulo ivyo ŵabali na ŵadumbu ŵambura kulaŵiska ŵamusanga chifukwa cha Baibolo ili, tikumuwonga chomene Yehova.”

Tikugomezga kuti Mabaibolo gha Mang’anamuliro gha Charu Chiphya mu vilembo vya braille agha ghawovwirenge chomene ŵabali na ŵadumbu ŵithu ŵambura kulaŵiska apo Yehova wakuŵakhutiska na “vinthu viwemi.”—Salimo 107:9.