MARCH 13, 2024
NKHANI ZA PA CHARU CHOSE
Buku la Baibolo la Mateyu Lafumiskika mu Chiyowoyero cha Mawoko cha ku Australia
Pa March 2, 2024, Mubali Hideyuki Motoi, wa mu Komiti ya Munthavi ya Australasia, wakafumiska buku la Baibolo la Mateyu mu Chiyowoyero cha Mawoko cha ku Australia, icho chikuchemekaso kuti Auslan, pa ungano wapadera uwo ukachitika pa Nyumba ya Ufumu ku Brisbane, Australia. Paungano uwu pakaŵa ŵabali na ŵadumbu 159. Ndipo ŵabali na ŵadumbu ŵanyake ŵakukwana 377 ku Australia, New Zealand, na Samoa nawo ŵakajoyina ku pulogiramu iyi kwizira pa videoconference. Buku ili likati lafumiskika, nyengo yeneyiyo likamba kusangika pa jw.org kweniso pa JW Library Sign Language app kuti ŵanthu ŵapange dawunilodi.
Ŵanthu pafupifupi 20,000 awo ŵakukhala ku Australia, New Zealand, Samoa, na Tonga ŵakuyowoya Chiyowoyero cha Mawoko cha ku Australia panji chiyowoyero chinyake chakuyanako. Ŵakaboni ŵa Yehova ŵakamba kung’anamura mabuku ghakulongosora Baibolo mu Chiyowoyero cha Mawoko cha ku Australia mu 2001, ndipo ŵakamba na burosha la Para Uyo Mukutemwa Wapotera. Ofesi yakung’anamulirako mabuku yikakhazikiskika ku Brisbane mu April 2023. Mazuŵa ghano, ŵabali na ŵadumbu pafupifupi 350 ŵakuteŵetera mu mpingo umoza wa chiyowoyero cha mawoko kweniso mu magulu 18 mu chigaŵa chose cha ofesi ya munthavi.
Ili ni buku lakwamba la mu Baibolo ilo lili kung’anamurika mu Chiyowoyero cha Mawoko cha ku Australia. Mudumbu munyake uyo wakapokako buku ili wakayowoya kuti: “Nkhakhwaskika chomene nati nawona umo Yesu wakayowoyeranga mwachitemwa kweniso mwalusungu mu upharazgi wake wa pa Phiri. Pakuwona umo viliri mu Chiyowoyero cha Mawoko cha ku Australia, nkhajipulika nga kuti Yesu wakayowoyanga na ine.”
Mudumbu munyake wambura kupulika uyo wakuteŵetera mu mpingo wa chiyowoyero cha mawoko ku Brisbane wakati: “Buku la Mateyu mu Chiyowoyero cha Mawoko cha ku Australia linovwirenge chomene kuti niŵe na mikhaliro nga gha Yesu na kuŵa waluso pa mulimo wakupharazga. Tikumuwongani Yehova!”
Tili ŵakukondwa chomene apo buku la Baibolo la Mateyu lafumiskika mu Chiyowoyero cha Mawoko cha ku Australia, ndipo tikugomezga kuti liwovwirenge ŵanthu ŵanandi kuti ŵasange chipata chifinyi icho chikulongozgera ku umoyo.—Mateyu 7:13, 14.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Ŵakaboni ŵa Yehova Ŵali na Baibolo Lawo?
Kuŵerenga Mabaibolo ghakupambanapambana kungamovwirani pakusambira. Pali fundo zitatu izo zikupangiska kuti Baibolo la Mang’anamuliro gha Charu Chiphya kuŵa liwemi chomene para mukusambira.
UMO VYAWANANGWA VINU VIKUGWILIRA NTCHITO
Kupanga Buku Lakuzirwa Kuluska Ghose
Pali vinandi ivyo vikunjizgikamo kuti ting’anamure Mabaibolo gha Mang’anamuliro gha Charu Chiphya, kupulinta, na kughapanga kuti ghaŵe mabuku.
IVYO ŴANTHU ŴAKUTEMWA KUFUMBA
Kasi Ŵakaboni ŵa Yehova Ŵakugomezga Tesitamenti Lakale?
Kasi vigaŵa vinyake vya Baibolo ni vyakovwira yayi mazuŵa ghano? Kasi ni fundo na ulongozgi wuli wakuzirwa uwo Ŵakhristu ŵangawusanga mu Malemba Ghachihebere?