Pa July 2, 2023, buku la mu Baibolo la Makani Ghawemi Umo Wakalembera Mateyu likafumiskika mu viyowoyero viŵiri vya Chikurdish, ku Germany na ku Georgia. Ku Germany, buku ili likafumiskika mu Chikurdish Kurmanji, kweniso mu Chikurdish Kurmanji (Caucasus) ku Georgia. Ŵanthu pafupifupi 750 ŵakaŵapo pa ungano wakufumiskika kwa buku ili.

Mubali Dirk Ciupek, uyo ngwa mu Komiti ya Munthavi ya Central Europe, wakafumiska buku la Mateyu mu Chikurdish Kurmanji pa ungano uwo ukachitikira ku ofesi ya munthavi ya Central Europe ku Selters, Germany. Awo ŵakaŵapo pa ungano uwu ŵakapokera Baibolo lakuchita kupulinta. Kweniso la pa Intaneti likamba kusangika kuti ŵanthu ŵachite dawunilodi.

Pa ungano uwo ukachitikira ku Tbilisi, Georgia, Mubali Levani Kopaliani, uyo ngwa mu Komiti ya Munthavi ya Georgia, wakafumiska buku la Mateyu mu Chikurdish Kurmanji (Caucasus). Ŵabali na ŵadumbu ku Aparan, Armavir, na Yerevan, Armenia, ŵakajoyina pulogiramu iyi kwizira pa vidiyo konferensi. Awo ŵakaŵapo pa ungano uwu ŵakapokera Baibolo lakuchita kupulinta. Kweniso la pa Intaneti likamba kusangika kuti ŵanthu ŵachite dawunilodi.

Chikurdish Kurmanji na Chikurdish Kurmanji (Caucasus) ni viyowoyero ivyo vikuyana kweni vikupambanako kazunuliro ka mazgu ghanyake. Nangauli viyowoyero ivi mazgu ghanyake ghakuyana kazunuliro, kweni ghakupambana ng’anamuro lake. Ntheura awo ŵakang’anamuranga, ŵakakolerananga chomene mwakuti ŵang’anamure buku la Mateyu ili mwakupulikikwa makora mu chiyowoyero chawo. Munyake uyo wakang’anamurako buku ili wakayowoya vya uwemi wakuŵa na Baibolo ili, wakati: “Ŵanthu ŵanandi ŵa mtundu wa Kurd, awo ŵali na njara ya unenesko, Baibolo ili liŵawovwirenge chomene kumazga njara yawo yauzimu.”

Nase tikuwonga Yehova pamoza na ŵabali na ŵadumbu ŵithu awo ŵakuyowoya Chikurdish Kurmanji na Chikurdish Kurmanji (Caucasus), chifukwa wajura nthowa mwakuti ŵanthu ŵanandi ŵamumanye!—Mateyu 5:3.