Kufika pa October 26, 2022, vikaŵa kuti ŵabali 106 na ŵadumbu ŵanayi ŵali mu jele, panji ŵakusungika dankha mu jele chifukwa waka chakuti ŵakachitanga vinthu vyakusopa ku Russia na Crimea. Mubali Dmitriy Dolzhikov, wa vyaka 44, ndiyo wakaŵa Kaboni wa nambara 100 kujalirika mu jele. Dmitriy wakakakika pa September 8, 2022. Wakupika mulandu wakuti nayo wakuchitako milimo ya gulu ilo likuchita vinthu vyakofya chifukwa chakuti wakaluta ku maungano gha Chikhristu kweniso kuphalirako ŵanji vya chigomezgo chake. Ŵakaboni ŵa Yehova pafupifupi 350 ŵali kujalirikapo mu jele kwamba waka apo ŵakakanizgira milimo yithu mu 2017.

Ŵapolisi ŵakamukaka Dmitriy pamanyuma pakuti ŵasecha nyumba yake ku Chigaŵa cha Chelyabinsk. Pati pajumpha mazuŵa ghaŵiri, wakatumizgika ku jele lakusungirako awo mulandu wawo underuzgike ku Chigaŵa cha Novosibirsk, mtunda wa makilomita 1,500 kufuma ku nyumba kwake.

Dmitriy wali mu selo lumoza na ŵanyake 12. Muwoli wake Marina, wakuzomerezgeka yayi kuluta kukamuwona Dmitriy, kweni ŵakuyowoyeskana waka mu makalata.

Marina wakati: “Wati wakakakika waka, usiku nkhagonanga yayi, pachokochoko waka mbwenu tulo twamara. Ŵabwezi ku mpingo withu ŵakanichema kuti nkhakhale dankha na iwo, ivi vikanikhozga chomene.”

Marina wakuti Dmitriy wali makora waka ndipo ngwakukondwa. Iyo wakuti: “Yehova wakumupwelelera.”

Ŵabali ŵithu ŵakapika mulandu chifukwa cha dango ilo boma la Russia lili kuŵika pa nkhani ya kuchita vinthu vyakofya. Yumoza wawo ni Mudumbu wa vyaka 57, zina lake Anna Safronova, ndipo pasono nthena wakugwira jele la vyaka 6. Ichi ntchilango chikuru chomene icho chili kupelekeka kwa yumoza wa ŵadumbu ŵithu.

Kukakika kwa Dmitriy, ntchimoza mwa vinthu vyakulengeska ivyo boma la Russia likuchitira Ŵakaboni ŵa Yehova, ndipo boma ili likulutilira kuchita ivi nangauli pajumpha vyaka 5 kweniso mawupu ghanandi ghalisuskapo pa nkhani iyi. Apo Khoti Likuru ku Russia likakanizganga milimo yithu mu 2017, ŵamazaza ŵa ku Russia ŵakati ŵajarenge waka mawupu gha Ŵakaboni ŵa Yehova, ndipo ŵaŵalekeskenge yayi kuchita vinthu vyakukhwaskana na kusopa. Kweni ndivyo ŵamazaza aŵa ŵakuchita yayi. Kufika pasono, ŵamazaza ŵajulira Ŵakaboni ŵa Yehova pafupifupi 700, milandu yakukwana 308. Kweniso nyumba 1,851 za Ŵakaboni ŵa Yehova zili kusecheka.

Tikulutilira kumulombera Dmitriy kweniso ŵabali na ŵadumbu ŵithu wose awo ŵakutambuzgika chifukwa cha chipulikano chawo. Tikumanya kuti Yehova walutilirenge kuŵapa nkhongono izo ŵakukhumbikwira kuti ŵalutilire kuzizipizga.—Mateyu 24:13.