Mwasonosono apa, Chimphepo chakuchemeka Freddy chili kunanga chomene vinthu kumafumiro gha dazi kwa Africa. Chimphepo chakofya nga ichi chindachitikepo ku malo agha. Chimphepo ichi chikati chamba kuputa kukwambilira kwa February 2023, chikamba kunanga vinthu mu malo ghanandi. Pa February 21, 2023, chikasakaza vinthu ku Madagascar ndipo mazuŵa ghati ghajumphapo chikanangaso vinthu ku Mozambique na Malawi. Chimphepo ichi chikalutilira kukura ndipo chikafikaso ku Mozambique pa March 11, 2023. Vigaŵa vinandi vili kukhwaskika chomene ku Madagascar, Malawi, na Mozambique. Mu vigaŵa ivi chimphepo na chivula chankhongono vikapangiska kuti maji ghatutuke chomene na kuwiska nyumba ndipo ŵanthu ŵakujumpha 500 ŵali kufwa kusazgapo ŵabali na ŵadumbu ŵithu. Ŵanthu masauzandi ghanandi ŵali kuchimbira mu nyumba zawo.

Kufika pa March 27, 2023, tikapokera viŵelengero vyakulondezgapo ivi. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero cheneko chikwenera kuŵa chakupambana na ichi, chifukwa ŵabali ŵachali kuwona vinthu ivyo vyanangika ndipo mu malo ghanyake ngakusuzga kufikako.

Madagascar

• Ŵapharazgi 256 na mbumba zawo ŵakusoŵa pakukhala

• Nyumba 8 zili kuwirathu

• Nyumba 29 zili kunangika chomene

• Nyumba za Ufumu zitatu zili kunangika

Malawi

• Chachitima ntchakuti ŵapharazgi 8 ŵali kufwa, ndipo ŵanyake 6 ŵandasangike m’paka sono

• Ŵapharazgi ŵatatu ŵakapwetekeka

• Pafupifupi ŵapharazgi 4,300 na mbumba zawo ŵakusoŵa pakukhala

• Nyumba 821 zili kuwirathu

• Nyumba 174 zili kunangika

• Nyumba za Ufumu 20 zili kunangika

Mozambique

• Chachitima mupharazgi yumoza wali kufwa ndipo yumoza wandasangike m’paka sono

• Ŵapharazgi 880 pamoza na mbumba zawo ŵakusoŵa pakukhala

• Nyumba 248 zili kuwirathu

• Nyumba 185 zili kunangika

• Nyumba za Ufumu 7 zili kunangika

• Malo ghanandi agho ghali kukhwaskika ngakusuzga kufikako pasono

• Makomiti Ghakovwira Para Kwachitika Masoka ghakupeleka malo ghakukhala, chakurya kweniso maji ku awo ŵali kukhwaskika

• Ku Mozambique, ku chigaŵa cha Gaza, ŵali kunozga malo ghakusungirako ŵapharazgi 167 na ŵa mu mbumba zawo awo ŵakabisama pa malo gha ungano. Ndipo ŵanji ŵanandi ŵakukhala mu nyumba za Ufumu kweniso ku nyumba za ŵanthu ŵanyake

• Pafupifupi nyumba 16 zili kunozgekaso

• Ŵabali wa mu Komiti ya Munthavi, ŵalaŵiliri ŵadera, na ŵalara, ŵakwendera mbumba za ŵabali na kuwona ivyo ŵakukhumbikwira kweniso kuŵapembuzga

Nangauli ŵakumana na masuzgo ghose agha, kweni ŵabali na ŵadumbu ŵithu ŵakulutilira kuchita maungano na kukhozgana yumoza na munyake. Tili na chigomezgo chose kuti Yehova waŵapenge “nkhongono zakuluska zakawiro” na kuŵawovwira kuzizipizga.—2 Ŵakorinte 4:7.