SEPTEMBER 7, 2023
NKHANI ZA PA CHARU CHOSE
Chimphepo cha Hurricane Idalia Chasakaza Vinthu Kumanjiliro gha Dazi kwa Cuba na ku Vigaŵa Vinyake Kumwera kwa United States
Pa August 29, 2023, chimphepo chankhongono cha Idalia chikasakaza vinthu kumanjiliro gha dazi kwa Cuba Pinar del Río province, ndipo chimphepo ichi chikiza na vula yikuru chomene. Chimphepo ichi chikaputanga chomene ndipo chikachimbiranga pa mtunda wa makilomita 200 pa ora limoza. Pa August 30, 2023, chimphepo cha Hurricane Idalia chikafika ku Keaton Beach, ku Gulf Coast of Florida, U.S.A. Paumaliro chimphepo cha Idalia ichi chikapangiska kuti kuŵe chimphepo chikuru, vula, kututuka kwa maji, kweniso kuzimwa kwa magesi mu vigaŵa vinandi vya Florida, Georgia, North Carolina, na South Carolina.
Umo Ŵabali na Ŵadumbu Ŵithu Ŵakhwaskikira
Cuba
Palije mubali panji mudumbu withu uyo wali kufwa
Mupharazgi yumoza walije pakukhala
Nyumba yimoza yili kunangikirathu
Nyumba 12 zili kunangika pachoko waka
United States
Palije mubali panji mudumbu withu uyo wali kufwa
Mupharazgi yumoza wali kupwetekeka pachoko waka
Ŵapharazgi 1,297 ŵalije pakukhala
Nyumba 4 zili kunangikirathu
Nyumba 12 zili kunangika chomene
Nyumba 61 zili kunangika pachoko waka
Nyumba ya Ufumu yimoza yili kunangika chomene
Nyumba za Ufumu zitatu zili kunangika pachoko waka
Ntchito Yakupeleka Wovwiri
Ku Cuba kweniso ku United States, ŵabali ŵalara na ŵalaŵiliri ŵa dera ŵakupeleka wovwiri wakwenelera na kukhozga ŵabali na ŵadumbu
Tili na chigomezgo chose kuti Yehova walutilirenge kovwira wose awo ŵakhwaskika na chimphepo cha Hurricane Idalia ichi.—Yesaya 63:9.
Wonaniso
IVYO ŴANTHU ŴAKUTEMWA KUFUMBA
Kasi Ŵakaboni ŵa Yehova Ŵakovwirapo Para Kwachitika Masoka?
Manyani umo ntchito yakovwira Ŵakaboni ŵa Yehova na ŵanthu ŵanyake yikwendera para kwachitika masoka.