Pa June 25-26, 2022, kukachitika chinthu chapadera chomene pa ntchito yithu yakung’anamura mabuku, apo tikafumiska Mabaibolo 13 gha Mang’anamuliro gha Charu Chiphya mu viyowoyero vyakupambanapambana. Kumasinda uku, chiŵelengero chikuru chomene cha Mabaibolo agho ghakafumiskika zuŵa limoza, chikaŵa 6. Musi umu muli lipoti lakukhwaskana na chakuchitika chapadera ichi mu mbiri yithu.

Mubali Armando Ochoa, uyo ngwa mu Komiti ya Munthavi ya Central America wakafumiska Baibolo la Mang’anamuliro gha Charu Chiphya, Mateyu-Uvumbuzi mu Chitzeltal. Ŵanthu pafupifupi 1,400 ŵakawonelera pulogiramu ya kufumiska Baibolo ili. Baibolo ili likafumiskika la pa intaneti na lakuchita kupulinta.

Yumoza uyo wakang’anamurako wakati: “Para nkhukumbuka umo vikaŵira kumasinda, nkhuwona kuti Yehova watovwira chomene pa ntchito iyi. Nakuti nkhugomezga yayi kuti tafiska ntchito iyi. Tikumanya kuti vyose vyenda makora chifukwa cha wovwiri wa mzimu utuŵa wa Yehova.”

Mubali Carlos Moreno, uyo wakimira ofesi ya munthavi ya Colombia, wakafumiska Baibolo la Mang’anamuliro gha Charu Chiphya (Mateyu-Milimo) mu Chiwayuunaiki. Pulogiramu ya kufumiska Baibolo ili yikajambulikirathu, ndipo ŵanthu pafupifupi 2,000 ŵakawonelera ku Colombia na Venezuela. Baibolo ili likafumiskika la pa intaneti pera. Lakuchita kupulinta lambenge kusangika munthazi umu.

Mubali Christophe Coulot, uyo ngwa mu Komiti ya Munthavi ya Côte d’Ivoire, wakafumiska Baibolo la Malemba Ghakupatulika mu Mang’anamuliro gha Charu Chiphya mu Chibaoule. Pulogiramu ya kufumiska Baibolo ili yikajambulikirathu ndipo ŵanthu ŵakujumpha 12,000 ŵakawonelera. Likafumiskika la pa intaneti pera. Ghakuchita kupulinta ghambenge kusangika mu October 2022. Aka nkhakwamba kuti Baibolo la Mang’anamuliro gha Charu Chiphya lifumiskike mu chiyowoyero icho chikuyowoyeka mu chigaŵa cha ofesi ya munthavi ya Côte d’Ivoire pera.

Yumoza wa awo ŵakang’anamurako wakayowoyapo ivyo vikaŵawovwiranga kuti nkhongono zikwere apo ŵakachitanga ntchito yakung’anamura iyi, wakati: “Nanga tisangane na suzgo la mtundu wuli, tikaghanaghaniranga waka umo ŵabali na ŵadumbu kweniso ŵanthu ŵamukondwera chifukwa cha kupokera Baibolo mu chiyowoyero chawo. Kukumbuka fundo iyi, kweniso na wovwiri wa Yehova, mbwenu nkhongono zikakweranga kuti tilutizge ntchito iyi.”

Mubali Peter Bell, uyo ngwa mu Komiti ya Munthavi ya Britain, wakafumiska Baibolo la Mang’anamuliro gha Charu Chiphya, Mateyu-Uvumbuzi mu Chiwelsh. Pulogiramu iyi yikachitika zuŵa lenelilo ku Nyumba ya Ufumu yinyake ku Wales. Ŵanthu pafupifupi 2,057 ŵakajoyina ku pulogiramu iyi ndipo ŵakawungana mu Nyumba za Ufumu ku Wales na Argentina. Pulogiramu yati yamara waka, Baibolo ili likamba kusangika pa intaneti pera. Lakuchita kupulinta lambenge kusangika mu December 2022.

Yumoza mwa awo ŵakang’anamurako wakati: “Nizamuluwa yayi umo nkhajipulikira tati tang’anamura kakwamba zina la Yehova. Ukaŵa mwaŵi wapadera chomene kuwona na maso ghane zina la Yehova likuwezgekeramo mu malo ghose agho likwenera kuŵa.”

Mubali Marcelo Santos, uyo ngwa mu Komiti ya Munthavi ya Mozambique, wakafumiska buku la mu Baibolo la Mateyu mu Chimanyawa na Chitewe. Mapulogiramu ghaŵiri ghakufumiska mabuku gha mu Baibolo agha ghakachita kujambulikirathu. Mapulogiramu agha ghakaŵikika pa JW Stream. Ghakaŵikikaso pa TV na mawayilesi. Ghakafumiskika ghakujambura na gha pa intaneti. Ghakuchita kupulinta ghambenge kusangika mu September 2022.

Buku ili ndakwamba mu Baibolo kung’anamulika mu Chimanyawa, ndipo mabuku ghachoko waka gha mu Baibolo ndigho ghali kung’anamulika mu Chitewe. Ŵanthu awo ŵamuŵazga na kutegherezga mabuku agha, ŵamupindura nagho chomene.

Mubali Marcelo Moyano, uyo ngwa mu Komiti ya Munthavi ya Peru, wakafumiska Baibolo la pa intaneti la Mang’anamuliro gha Charu Chiphya mu Chiquechua (Ancash), Chiquechua (Ayacucho), na Chiquechua (Cuzco). Iyi ni mitundu yikuruyikuru yitatu ya Chiquechua iyo yikuyowoyeka ku Peru. Pulogiramu ya kufumiska Mabaibolo agha yikajambulikirathu ndipo ŵanthu ŵakujumpha 7,000 ŵakawonelera. Ghakuchita kupulinta ghambenge kusangika mu October 2022.

Nangauli mitundu ya viyowoyero vya Chiquechua yikafuma kumoza, kweni viyowoyero ivi vikupambana chomene kuyana na chigaŵa icho ŵanthu ŵali, ndipo ŵanthu ŵanandi ŵangalipulikiska yayi Baibolo para tingafumiska waka mu chiyowoyero cha mtundu umoza pera cha Chiquechua. Awo ŵakachitako mulimo wa kung’anamura mu viyowoyero ivi, ŵakasankha mazgu ghapusu ghakuti ŵanthu ŵa mu chigaŵa icho ŵakaleke kusuzgika kupulikiska.

Mubali Kenneth Cook, uyo ngwa mu Wupu Wakulongozga, wakafumiska Baibolo la Mang’anamuliro gha Charu Chiphya mu Chindebele na Chisesotho (South Africa). Mubali uyu wakafumiskaso Baibolo lakunozgekaso la Mang’anamuliro gha Charu Chiphya mu Chisesotho (Lesotho). Ŵanthu ŵakujumpha 28,000 ŵakawonelera pulogiramu yakujambulikirathu iyi, ndipo yikawoneskeka mu Nyumba za Ufumu zakusankhika waka kweniso nyumba za ŵabali zinyake mu charu chose ichi. Pulogiramu yati yamara waka, Mabaibolo agha ghakamba kusangika pa intaneti ndipo ghakuchita kupulinta ghambenge kusangika mu December 2022. Aka nkhakwamba kuti Baibolo lose la Mang’anamuliro gha Charu Chiphya lifumiskike mu Chindebele na Chisesotho (South Africa).

Pakuyowoyapo vyakukhwaskana na Baibolo la mu Chindebele, yumoza uyo wakang’anamurako wakati: “Baibolo ili ni thumbiko lapadera ku ŵanthu wose awo ŵakuyowoya Chindebele chifukwa lili na zina la Yehova mose umo likwenera kuŵa. Kamuŵa kakwamba kuti ŵamanye zina la Chiuta mwa kuchita kuŵerenga ŵekha kufuma mu Baibolo lawo.”

Mubali Shingirai Mapfumo, uyo ngwa mu Komiti ya Munthavi ya Zimbabwe, wakafumiska Baibolo lose la Mang’anamuliro gha Charu Chiphya mu Chindebele (Zimbabwe) kweni la pa intaneti pera. Lakuchita kupulinta lambenge kusangika mu July 2022. Pulogiramu iyi yikachita kujambulikirathu ndipo ŵanthu ŵakujumpha 8,700 ŵakachita kuwonelera mu Nyumba za Ufumu ku Zimbabwe.

Nangauli pali kale Mabaibolo ghanyake mu Chindebele (Zimbabwe), kweni Baibolo ili likulongosora mwakupulikikwa makora unenesko wa mu Baibolo. Mwachiyelezgero, pa Yohane 17:3, Mabaibolo ghanyake gha Chindebele ghakuti Yesu Khristu ni “Chiuta Waunenesko.” Kweni Baibolo la Mang’anamuliro gha Charu Chiphya likulongora makora mphambano iyo yilipo pakati pa Yehova Chiuta na Yesu Khristu. Yumoza uyo wakang’anamurako wakati: “Kuyowoya unenesko, Baibolo ili lili na mazgu agho ŵanthu ŵakugwiliskira ntchito zuŵa na zuŵa.”

Ndise ŵakukondwa kuwona kuti ŵanthu awo ŵakupenja unenesko pa charu chose ŵali na mwaŵi wakusanga Mazgu gha Chiuta, ivi vikovwira kuti ŵatore “maji gha umoyo kwawanangwa” mu chiyowoyero chawo.—Chivumbuzi 22:17.