Mu November 2021, Ŵakaboni ŵa Yehova pa charu chose ŵakagaŵira magazini gha Gongwe la Mulinda lakugaŵira la Na. 2 2021 mu viyowoyero vyakujumpha 300. Pa viyowoyero ivi, viyowoyero 7 kakaŵa kakwamba kufumiska magazini gha Gongwe la Mulinda, ndipo la Na. 2 2021 ndilo likaŵa lakwamba. Viyowoyero ivi ni: Chifaroese, Chihawaii Pidgin, Chiluxembourgish, Chimanipuri (Roman), Chiodia, Chipomeraniya, na Chikilewole cha ku Saint Lucia.

Mubali Nicholas Ahladis, uyo wakuteŵetera mu Dipatimenti Yakung’anamura ku likuru lithu, wakuti: “Ivyo vikuŵa mu mabuku ghithu vikufika pamtima munthu wa mtundu uliwose. Kweni ŵanyake awo ŵakuchita mulimo wa kung’anamura ŵalije vinthu vyakukwana vyakuti viŵawovwire pa mulimo wawo, ndipo ivi vikupangiska kuti chiŵe chakusuzga kung’anamura magazini yiliyose ya Gongwe la Mulinda. Makomiti gha Munthavi agho ghakusangana na suzgo lanthena ili ghangapempha ku Komiti Yakulemba ya Wupu Wakulongozga na kupempha kuti ghang’anamure waka vinthu vinyake ivyo ni vyakukhumbikwa chomene. Umu ndimo vikaŵira na magazini ya Gongwe la Mulinda la Na. 2 2021, lekani viyowoyero ivi navyo vikafumiska magazini iyi.”

Vinthu viwemi ivyo vikachitika mu vigaŵa vya viyowoyero ivi vikulongora uwemi uwo waŵapo chifukwa cha upharazgi wapadera uwu kweniso chifukwa cha kuŵikapo mtima kugaŵira mabuku ghakulongosora Baibolo ku ŵanthu ŵa viyowoyero vyakupambanapambana.

Tikukondwa chomene kumanya kuti Gongwe la Mulinda likafika ŵanthu ŵanandi pa upharazgi wapadera uwu. Tikumanya kuti upharazgi wanthena ukovwira kuti khumbo la Chiuta lifiskike, lakuti “ŵanthu ŵa mitundu yose ŵamanye makora unenesko na kuponoskeka.”—1 Timote. 2:4.