Mwasonosono apa Ŵakaboni ŵa Yehova ŵafumiska JW Stream–Studio, iyo ni webusayiti yiphya yakovwira kuti ŵapharazgi ŵawonelerenge ungano wadera uwo ukuchitika nyengo yeneyiyo na mulaŵiliri wa dera. Pa 6 na 7 March 2021, maungano gha dera 340 ghakawoneskeka kwizira pa webusayiti iyi. Ŵanthu ŵakujumpha 500,000 ŵakawonelera mapulogiramu agha.

Pati pajumpha nyengo yichoko waka muliri wati wamba, Komiti Yakusambizga ya Wupu Wakulongozga yikaphalira Dipatimenti ya Broadcasting kuti yipange webusayiti iyo yingawovwira kuti ŵalaŵiliri ŵa dera ŵachitiskenge nyengo yeneyiyo maungano gha mu dera mwawo. Chilato chikaŵa chakuti ŵapange webusayiti iyo yingawovwira kuti ŵanthu masauzandi ghanandi ŵawonelere nyengo yeneyiyo ungano uwo ukuchitika.

Dipatimenti ya Broadcasting yikatuma kagulu kachoko waka ka ŵabali na ŵadumbu kuti kagwire ntchito iyi. Apo ntchito yikaŵa mukati, kagulu ka ŵabali na ŵadumbu aka kakasangananga na masuzgo ghakupambanapambana.

Mwachiyelezgero, webusayiti yikeneranga kuŵa yambura kusuzga kugwiliskira ntchito chifukwa ni wose yayi awo ŵakuvimanya makora vinthu vya tekinoloje. Yikenerengaso kuŵa yakuti yingagwira ntchito nanga vingaŵa kuti Intaneti yikwenda pachokopachoko. Dipatimenti ya Broadcasting yikagwiraso ntchito lumoza na Dipatimenti ya Makompyuta ya ku likuru lithu kuti yiŵe na makompyuta ghakukwana kugwiliskira ntchito pakovwira kuti ŵanthu ŵaleke kusuzgika chifukwa cha unandi wa awo ŵakugwiliskira ntchito webusayiti.

Alex Hernandez uyo ngwa mu Dipatimenti ya Broadcasting wakati: “Ntchito ya kupanga webusayiti yakuti ŵanthu ŵanandi ŵagwiliskire ntchito pa kuwonelera ungano wadera, yikaŵa yakukondweska, ndipouli yikaŵa yipusu yayi. Tikaŵa na ŵanthu ŵachoko awo ŵakumanya kupanga mapulogiramu gha pa kompyuta, ndipo ŵanandi kakaŵa kakwamba kuti ŵapange webusayiti iyo ŵanthu ŵangawona ivyo vikuchitika nyengo yeneyiyo.”

Vinthu vyakwambilira vya pa webusayiti ya JW Stream–Studio vikamalizgika mu May 2020. Pati pajumpha waka myezi 5, mu October 2020, Dipatimenti ya Broadcasting yikamba kuyezgelera umo webusayiti iyi yigwilirenge ntchito na wovwiri wa ŵalaŵiliri ŵa dera ŵa mu vyaru 6. Ivi vikawovwira kuti Dipatimenti ya Broadcasting yimanye masuzgo agho ghakuŵapo na umo yingaghamazgira pambere deti lake lakufumiskikira lindakwane. Timu ya ŵabali na ŵadumbu 17 yikaŵa mukati kovwira kumazga masuzgo agho ghakasangika apo mapulogiramu ghakwambilira ghakawoneskekanga pa webusayiti iyi.

Alex wakulutizga kuti: “Nyengo yiliyose para tasangana na suzgo, tikayimanga dankha na kulomba. Para tasanga nthowa ya umo tingamazgira suzgo ilo, tikakhorwanga kuti Yehova wakutovwira nadi.”

Ŵabali na ŵadumbu ŵanandi ŵakuyowoya kuti ŵakuwonga chomene chifukwa cha webusayiti iyi.

Mubali Jairo Espinosa wa ku Colombia wakuti: “Tikuwona kuti pulogiramu ya ungano wadera kwizira pa JW Stream–Studio yatikhozga chomene ndipo yatovwira kuti tijipulikenge kuti tili pafupi chomene na ŵabali na ŵadumbu ŵithu. Kweniso, kumanya waka kuti pulogiramu iyi yikuchitika nyengo yeneyiyo, kukatovwira kuti tiŵikengeko mahara chomene ku nkhani izo zikayowoyekanga. Tikakhumbanga yayi kuti fundo yiliyose yitijumphe, nakuti tikakondwa chomene na pulogiramu iyi!”

Mudumbu Magaly Reymundo wa ku United States wakuti: “Nkhumanya kuti uthenga ukuyana waka kwali pulogiramu yachita kujambulikirathu, kweni nkhakondwa chomene kuwona visko vya ŵabali awo nkhuŵamanya kale ŵakuyowoya nkhani nyengo yeneyiyo.”

Kufuma apo, JW Stream–Studio yikafumiskikira, pawoneskeka maungano gha dera ghakujumpha 800. Tikuwonga chomene Yehova chifukwa cha kutipa chinthu chinyake chakutovwira kulutilira kuŵa ŵakukhora mwauzimu kweniso kuŵa ŵakukolerana na ŵabali na ŵabali ŵithu.—Salimo 133:1.