Pa July 13, 2021, Khoti Lakuwona vya Wanangwa wa Ŵanthu ku Europe likaŵikira kumanyuma Mubali Rostom Aslanian pa mulandu uwo ukukhwaska charu cha Moldova na Russia. Mubali Aslanian wakachita apilu chilango cha kugwira jele icho wakapika na ŵamazaza ŵa ku Transnistria (Pridnestrovskaia Moldavskaia Republic) chifukwa chakuti wakakana kunjira usilikari chifukwa cha njuŵi yake. Chigamuro cha mulandu uwu chawovwira kuti ŵabali ŵithu ŵaŵe na wanangwa wa kusopa ku Transnistria.

Nangauli Transnistria chikumanyikwa kuti ntchigaŵa cha charu cha Moldova, charu cha Russia nacho chili kukolerana na charu ichi pa nkhani ya kuwona ndondomeko ya chivikiliro. Vyaru vyose ivi vili kulembeska mu wupu wa European Convention on Human Rights ndipo vikwenera kuchindika wanangwa wakuti munthu wangalondezga njuŵi yake.

Mu 2010, Mubali Aslanian wakachemeka kuti wakanjire usilikari kweni wakapempha kuti ŵamupe ntchito zinyake padera pa usilikari chifukwa cha ivyo wali kusambira mu Baibolo. Pa March 29, 2011, ŵakamukanira pempho lake, na kuyowoya kuti wali na mulandu, ndipo wagwire jele chaka chimoza. Mubali Aslanian wakagwira jele chaka chimoza icho wakapika, kweni wakachita apilu mulandu uwu ku Khoti Lakuwona vya Wanangwa wa Ŵanthu ku Europe.

Mu chigamuro chake, Khoti Lakuwona vya Wanangwa wa Ŵanthu ku Europe likati makhoti agho ghakeruzga mulandu uwu pakwamba, ghakaŵavya vifukwa vyakupulikikwa vyakudumulira kuti Mubali Aslanian wakagwire jele chifukwa cha kukana kunjira usilikari chifukwa cha njuŵi yake. Khoti ili likatiso boma la Russia likakhumbanga waka kulongora nkhongono zake ku Transnistria pa nkhani ya kulemba ŵasilikari, chuma, na ndyali. Ntheura m’malo mwa charu cha Moldova, boma la Russia, ndilo likasangika lakubuda pa mulandu uwu. Khoti Lakuwona vya Wanangwa wa Ŵanthu ku Europe, likadumura kuti ŵamazaza ŵakaswa wanangwa wa kusopa wa Mubali Aslanian apo ŵakati wagwire jele chaka chimoza chifukwa cha “kukana kunjira usilikari,” ndipo boma la Russia likwenera kumulipira pa chaka chimoza icho wakagwira jele.

Ndise ŵakukondwa chifukwa chakuti chigamuro ichi chawovwira ŵabali ŵithu ku Transnistria kuŵa ŵakuvikilirika na dango. Ivi vikutipangiska kuti tikhorwe na fundo yakuti Yehova wakulongora chitemwa chakugomezgeka kweniso wakupwelelera ŵanthu ŵake para ŵakutambuzgika.—Salimo 18:25.