Pa March 29, 2021, Khoti la Gagarinskiy ilo lili mu Msumba wa Sevastopol, Crimea, likati Mubali Viktor, wali na mulandu ndipo wakagwire jele vyaka 6 na hafu. Khoti lati lapeleka waka chigamuro, nyengo yeneyiyo Viktor, ŵakaluta nayo ku selo. Wachitenge apilu chigamuro ichi.

Viktor Stashevskiy

• Chaka cha kubabikira: 1966 (Kansk, ku Chigaŵa cha Krasnoyarsk, Russia)

• Mbiri yake: Mu 1983, wakasamukira ku Sevastopol, Crimea. Wakaleka usilikari mu 1993. Wakatorana na muwoli wake, Larisa, mu 2002. Ŵali na ŵana ŵasungwana ŵaŵiri. Wakakhorwa na umo nyenyezi kweniso mapulaneti ghali kulengekera kweniso umo ghali kukhalira ndipo wakakhumbanga kumanya vinandi vya Mlengi. Kusambira Baibolo kwamovwira kumanya kuti umoyo ngwakuzirwa. Wakabatizika na kuŵa Kaboni wa Yehova mu 2004

Pa June 4, 2019, ŵa Federal Security Service (FSB) ŵakasecha mu nyumba za Ŵakaboni ŵa Yehova 10 ku Sevastopol. Nyengo zinyake ŵakatoranga maora ghanayi kuti ŵamare kusecha. Panyengo iyo ŵa FSB ŵakasechanga, ŵakazomerezganga yayi ŵabali ŵithu na mbumba zawo kuti ŵamwe maji panji kuluta kukajovwira. Ŵa FSB ŵakawofyangaso ŵabali ŵithu kuti ŵaŵikenge minkhwala yakukanizgika mu nyumba zawo kuti ŵaŵape mulandu.

Ŵati wamara kusecha, Mubali Viktor Stashevskiy ŵakamukaka ndipo wakakagona mu jele. Wakapika mulandu wakuti ni “mulongozgi wa gulu ilo likuchita vinthu vyakofya.” Unenesko ngwakuti ŵakumupa mulandu chifukwa cha vigomezgo vyake vya chisopa, kuchita nthena nkhuswa wanangwa wake.

Viktor wakuti kuŵazga Baibolo nyengo zose na kughanaghanirapo kwamovwira chomene kuti waŵe na chikanga kweniso kuti wazizipizge mwachimwemwe. Iyo wakusanga nkhongono mu mazgu gha Themba Davide agho ghakusangika pa Salimo 62:5-8. Mu suzgo yake yose, Viktor wakuti : “Ubwezi wane na Yehova ngwakukhora chifukwa nyengo zose wakuŵa nane ndipo wali nane pafupi kuluska waliyose. Nkhukayika yayi napachoko kuti Yehova wakuwona suzgo lane na khumbo lane lakuti niŵe wakugomezgeka kwa iyo, ndipo panyengo yake yakwenelera wazamunivikilira chifukwa cha zina lake.”

Tikumanya kuti Yehova wakhozgenge na kutumbika Viktor, mbumba yake kweniso ŵabali na ŵadumbu ŵithu kuti ŵazizipizge nthambuzgo. Yehova walutilirenge kuwa chiphokwero chawo na nkhongono zawo.—Salimo 91:2.