Pakuti ŵachekuru ndiwo ŵali pangozi chomene yakutora nthenda ya coronavirus, ŵabali na ŵadumbu ŵithu awo mbachekuru ŵakupulikira ulongozgi wakufuma kwa ŵavyaumoyo wakuti ŵangafumangapo yayi panyumba pawo. Ndipouli, ivi vyapangiska kuti ŵaleke kuchita vinthu vyauzimu yayi. Ŵakugwiliskira ntchito nthowa zakupambanapambana za tekinoloje kuti ŵawunganenge na kupharazga.

Ku Rome, Italy, kuli mudumbu munyake uyo wali na vyaka 94, ndipo wakabatizika mu 1952. Pambere muliri uwu, undambe mudumbu uyu wakaŵa kuti wakutondeka kale kwenda chifukwa cha ulwari. Maungano wakachitanga kuwonelera pa JW Stream, ndipo wakaŵavya mwaŵi wakuchita maungano na mpingo wake. Kweni pakuti ŵalara sono ŵali kunozga ndondomeko yakuti maungano ghachitikenge kwizira pa pulogiramu yinyake ya pa kompyuta, mudumbu uyu sono wakuŵawona ŵabali na ŵadumbu ŵa mu mpingo mwake kweniso kutegherezga maungano.

Ku Spanish Fork, Utah, U.S.A., kuli mudumbu munyake zina lake Stephanie Aitken, uyo ngwakumangwa ndipo wakukhala ku malo ghakusungirako ŵachekuru. Pasono ku malo agha ŵakuzomerezga yayi ŵalendo kulutako. Mubali mulara munyake na muwoli wake, ŵakamovwira mudumbu muchekuru uyu kuti waŵe na pulogiramu ya pa kompyuta iyo yingamovwira kuti wawonelerenge maungano. Mubali uyu na muwoli wake ŵakamulongosoleranga mudumbu muchekuru uyu, mu chiyowoyero cha mawoko pa gilasi ilo lili pa mulyango wakunjilira mu nyumba yakusungiramo ŵachekuru. Mudumbu Aitken wakakondwa chomene wati wafiska kuŵika pulogiramu iyi mu tabuleti yake. Wakuwonga chomene chifukwa pasono wakuyowoyeskana na ŵabali na ŵadumbu ŵa mu mpingo mwake.

Pakuti ŵabali na ŵadumbu kusazgapo ŵachekuru ŵithu pa charu chose, ŵakugwiliskira ntchito tekinoloje mu nyengo zakusuzga izi, vikutikumbuska waka layizgo la Yehova lakuti ŵanthu ŵake ŵazamugwiliskira ntchito mwavinjeru “mkaka wa ŵamitundu.” (Yesaya 60:16) Tikumanya kuti nyengo zose Yehova waŵenge chilichose icho iyo wakhumba kuti wawovwire ŵateŵeti ŵake ŵa pa charu chapasi mu nyengo za suzgo.