Pa April 25, 2020, Mubali Mark Sanderson, uyo ngwa mu Wupu Wakulongozga, wakapharazga vya kufumiskika kwa Baibolo la Mang’anamuliro gha Charu Chiphya lakunozgekaso mu Chikolowesha na Chisebiya mu vidiyo iyo yikajambulikirathu. Baibolo la Chisebiya likafumiskika mu vilembo vya Roman na Cyrillic.

Kuti tilongore kupulikira malango agho boma lili kuŵika mu nyengo ya muliri iyi, mipingo ku Bosnia and Herzegovina, Croatia, Montenegro, na Serbia yikawungana pamoza yayi apo Mabaibolo agha ghakafumiskikanga. M’malo mwake ungano ukachitika kwizira pa pulogiramu yinyake ya pa kompyuta ndipo ŵabali na ŵadumbu 12,705 ŵakawonelera ungano uwu.

Mubali withu munyake uyo wakawonelerako ungano uwu wakati “Baibolo lakunozgekaso ili ntchinthu chapadera chomene kwa iyo ndipo wakujipulika nga kuti Yehova wakuyowoya nayo mwakudunjika.” Mubali munyakeso uyo ni mulara mu mpingo wakati: “Para nkhuŵerenga Baibolo lakunozgekaso ili mu chiyowoyero chane, ndipo nkhupulikiska nadi kuti Yehova wakunitemwa kweniso wakunipwelelera. Sono para naluta kukakhozga ŵanji ku mpingo, namuŵalongosoleranga mwakupulikikwa makora kuti Yehova wakuŵatemwa chomene kweniso mbakuzirwa kwa iyo.”

Mulimo wakung’anamura Mabaibolo agha ukamba mu 1996. Ndipo mu July 1999, Baibolo la Malemba Ghakupatulika mu Mang’anamuliro Gha Charu Chiphya Mateyu-Uvumbuzi likafumiskika mu Chisebiya na Chikolowesha. Vyaka 7 vikati vyajumpha, mu 2006, Baibolo lose mu viyowoyero viŵiri ivi likafumiskika.

Tili na chigomezgo chose kuti Baibolo la Mang’anamuliro gha Charu Chiphya la mu Chikolowesha na Chisebiya ilo ndakung’anamulika makora kweniso lambura kusuzga kulipulika, lilutilirenge kovwira wose awo ŵakuliŵerenga kuwona kuti “mazgu gha Chiuta ngamoyo.”—Ŵahebere 4:12.