Chifukwa cha muliri wa COVID-19, chikaŵa chakusuzga kuti ŵabali na ŵadumbu awo ŵali ku vipatala panji mu nyumba zakupweleleramo ŵachekuru ŵachite Chikumbusko. Kanandi ŵakuzomerezgeka yayi kufuma mu malo agha ndipo ŵanthu ŵanyake nawo ŵakuzomerezgeka yayi kuzakaŵawona. Nangauli vili nthena, ŵalara ŵakachitapo kanthu kuti ŵabali na ŵadumbu ŵithu aŵa ŵachiteko, chakuchitika chapadera chomene ichi.

Mudumbu Lee Jeom-soon wa vyaka 91, na Mudumbu Kwon Ae-soon wa vyaka 88, ŵakaŵikapo mtima kuti ŵachiteko Chikumbusko pamoza na mwanakazi munyake wakunweka wa vyaka 96, mu Msumba wa Naju. Yumoza wa madokotala gha ku nyumba za kupwelelerako ŵachekuru izi ni Kaboni wa Yehova. Pamanyuma pakuti dokotala uyu wachita Chikumbusko ku mpingo wake, wakalutaso uko wakugwira ntchito. Kura, wakawovwira ŵadumbu ŵachekuru aŵa pamoza na mwanakazi wakunweka kuti ŵawonelere pulogiramu ya Chikumbusko pa jw.org. Mubali uyu wakaŵapaso vimanyikwiro vya pa chikumbusko.

Mubali Choi Jae-cheol wakukhala mu Msumba wa Uijeongbu, ndipo wakugwira ntchito pa nyumba yinyake apo ŵakupwelelera ŵachekuru. Pa nyumba iyi pali ŵabali na ŵadumbu ŵachekuru 14. Nangauli kuli muliri, kweni mubali withu wakachitapo kanthu kuti ŵabali na ŵadumbu ŵachekuru awo ŵakukhala pa nyumba iyi, pamoza na ŵakunweka ŵachite Chikumbusko kwizira pa pulogiramu yinyake ya pa kompyuta. Ŵakunweka ŵanyake awo ŵakachita Chikumbusko ŵakazomera kwamba kusambira Baibolo.

Mudumbu Kim Tae-sun wakukhala ku Cheonan ndipo wali na vyaka 59. Mudumbu uyu ŵakamusanga na kansa vyaka 5 ivyo vyajumpha. Mwasonosono apa ŵamugoneka ku chipatala chifukwa wakapulikanga ulwilwi ukuru. Mudumbu Tae-sun ŵali kumugoneka mu chipinda chimoza na Mudumbu Kim Jeong-mi. Mudumbu Kim Jeong-mi wali na vyaka 69 ndipo nayo ŵali kumusanga na kansa. Ŵadumbu ŵithu aŵa ŵakuŵazomerezga yayi kufuma mu chipatala chifukwa chakuti kuli muliri. Ndipouli ŵabali ŵalara ŵakaŵawovwira ŵadumbu aŵa kuti nawo ŵachite Chikumbusko pamoza na mipingo yawo kwizira pa Pulogiramu yinyake ya pa kompyuta.

Ŵadumbu ŵaŵiri aŵa ŵakalemba kalata yakuŵawonga ŵalara. Iwo ŵakati: “Tawonga chomene chifukwa cha kutovwira kuti nase tichite Chikumbusko na kuchezgapo na ŵabali na ŵadumbu ŵithu panyengo iyi apo ise tikulwara kweniso kuli muliri wa COVID-19.”

Mudumbu Mieko Fujiwara uyo wakukhala ku Mie Prefecture, Japan, wali na vyaka 70 ndipo ŵakamugoneka mu chipatala. Pakuti pa chipatala ichi palije Wi-Fi, chikaŵa chakusuzga kuti mudumbu withu wajoyinane na mpingo wake pa pulogiramu ya pa kompyuta kuti wachite Chikumbusko. Kweni pambere Chikumbusko chindachitike, mubali mulara munyake pamoza na muwoli wake ŵakamutumizgira pa foni yake nkhani ya Chikumbusko iyo yikajambulikirathu. Ivi vikamovwira kuti wachite Chikumbusko uku wali mu chipatala.

Mudumbu Yuki Takeuchi wali na vyaka 102, ndipo wakukhala ku nyumba yinyake yakusungirako ŵachekuru mu Msumba wa Zama, Kanagawa Prefecture. Pambere Chikumbusko chindachitike, mwana wake mwanakazi pamoza na mfumu wake ŵakamutumira chingwa na vinyo. Pamanyuma wakachita Chikumbusko pa foni pamoza na mwana wake na mukweni wake.

Mubali Mimura, uyo ni mukweni wake, wakati: “Amamavyara ŵakabatizika mu 1954 ndipo ŵandakhalepo ku Chikumbusko. Nangauli Chikumbusko cha chaka chino chachitika mwakupambanako na vyaka vyose, kweni ŵakakondwa chomene kuti nawo ŵakachita Chikumbusko chaka chino.”

Tikugomezga kuti Yehova wakawona ivyo ŵapharazgi aŵa ŵakachita, kweniso kuyezgayezga uko ŵalara ŵakalongora pakuŵawovwira kuti nawo ŵachiteko Chikumbusko.—Ŵahebere 6:10.