Waliyose pa charu chose chapasi wakhwaskika na muliri wa COVID-19. Kweni Ŵakaboni ŵa Yehova ŵaŵikapo mtima chomene kupharazga mu nyengo ya Chikumbusko. Ivi vyapangiska kuti ŵanthu ŵanandi ŵajurenge pa webusayiti yithu kuti ŵapembuzgike kwizira mu Baibolo, kweniso kuti ŵamanye mwaluŵiro ivyo vikuchitika vyakukhwaskana na muliri uwu. Mu mwezi wa March, ŵanthu ŵanandi ŵakanjira pa webusayiti yithu kuluska mu mwezi wa February. Kweniso ŵanthu ŵanandi ŵakupempha kuti ŵasambirenge Baibolo kuluska kumasinda kose.

Apo muliri ukambanga, pachokopachoko ŵanthu ŵanandi ŵakamba kunjira pa webusayiti yithu. Mu February, ŵanthu pafupifupi 2 miliyoni ŵakanjiranga pa webusayiti yithu zuŵa lililose. Mu mwezi wa March, chiŵelengero ichi chikakwera chomene ndipo ŵanthu ŵakujumpha 3 miliyoni ŵakanjiranga pa webusayiti yithu zuŵa lililose. Kweniso, pa nyengo iyo pa webusayiti iyi pakaŵikika lipoti lakukhwaskana na matenda gha Coronavirus, chiŵelengero chikafika pa 4.5 miliyoni. Pa April 7, apo pakaŵa pa zuŵa la Chikumbusko cha mu chaka cha 2020, ŵanthu ŵakujumpha 7 miliyoni ŵakanjira pa webusayiti yithu. Ndipo ŵanandi ŵa iwo ŵakawonelera pulogiramu yapadera yakusopa kwa mulenji na nkhani ya Chikumbusko.

Mubali Clive Martin, uyo wakulaŵilira Dipatimenti ya MEPS Programming, ku likuru la Ŵakaboni ŵa Yehova Warwick, New York, wakuti, “Mu nyengo ya Chikumbusko ŵanandi ŵakunjira pa webusayiti yithu ya jw.org kuti ŵamanye uko kwamuchitikira Chikumbusko kweniso nyengo iyo chamuchitikira. Chifukwa chakuti chaka chino changuŵa chakusuzga kuti ŵanthu ŵanandi ŵakunweka ŵawungane pamoza na mpingo, tikaŵika nkhani yapadera ya 2020, na nkhani ya Chikumbusko pa webusayiti yithu mu viyowoyero vyakujumpha 500. Ŵanthu mamiliyoni ghanandi ŵakapanga dawunilodi panji kuwonelera nkhani izi. Chiŵelengero chikuru cha ŵanthu awo ŵakunjira pa webusayiti yithu, chikulongora kuti webusayiti iyi njakovwira chomene pa nkhani ya kupembuzga na kupeleka ulongozgi wa mu Baibolo ku Ŵakaboni ŵa Yehova kweniso ku ŵanthu ŵanyake wose.”

Ntchakuzizika yayi kuti ŵanthu ŵanandi awo ŵakunjira pa webusayiti iyi, ŵakufufuza nkhani za umo ŵangaŵira na umoyo uwemi, kweniso umo ŵangagegera matenda, na umo ŵangachitira kuti ŵaleke kusuzgika maghanoghano. Paliso ŵanyake ŵanandi awo ŵakufufuza nkhani za mu Malemba pa webusayiti iyi. Ŵakufufuza nkhani nga zakukhwaskana na chimanyikwiro cha mazuŵa ghaumaliro na nkhani ya ŵanalume ŵanayi awo ŵakwera pa mahachi, iyo yikusangika mu buku la Chivumbuzi chaputara 6.

Takondwaso chomene na chiŵelengero cha awo ŵakupempha kuti ŵasambirenge Baibolo pa Jw.org. Nyengo zose ŵanthu pafupifupi 250 zuŵa lililose ndiwo ŵakupempha kuti ŵasambirenge Baibolo. Kweni mu mwezi wa March chiŵerengero ichi chakakwera chomene. Zuŵa lililose ŵanthu pafupifupi 350 ndiwo ŵakapemphanga sambiro la Baibolo. Ndipo chiŵelengero cha ŵanthu awo ŵakapemphanga sambiro la Baibolo mu mwezi uwu chikafika pafupifupi 11,000. Pa zuŵa la Chikumbusko kweniso machero ghake, ŵanthu ŵakujumpha 1,000 ŵakapempha kwizira pa jw.org kuti ŵasambirenge Baibolo.

Yesu wakati mbakukondwa awo ŵakumanya njara yawo yauzimu. (Mateyu 5:3) Ndise ŵakukondwa kuti ŵanthu ŵanandi ŵakupenja wovwiri kwa Yehova na gulu lake kuti ŵapembuzgike mu nyengo zakusuzga izi.—2 Ŵakorinte 1:3, 4.