Pa April 7, 2020, Ŵakaboni ŵa Yehova pa charu chose ŵakachita Chikumbusko cha nyifwa ya Yesu Khristu nangauli kuli muliri wa coronavirus. Nga umo Mubali Stephen Lett uyo ngwa mu Wupu Wakulongozga wakayowoyera kuti: “Pa charu chose chapasi palije nthenda yakofya iyo yingatitondeska kuwonga ivyo Yehova kweniso Yesu Khristu, ŵali kutichitira. Taŵikapo mtima kuti tichitenge Mugonero wa Fumu.” Nakuti ivi ndivyo vyachitika nadi chaka chino.

Nkhani iyi njakwamba pa nkhani izo zilongosorenge umo ŵabali na ŵadumbu ŵithu pa charu chose ŵakachitira Chikumbusko cha nyifwa ya Khristu mu nyengo ya muliri wa coronavirus. Mu nkhani iyi tiwonenge umo ŵabali ŵakachitira Chikumbusko ku likuru la Ŵakaboni ŵa Yehova, kweniso ku ofesi ya munthavi ya United States.

Kuti tilongore kuti tikupulikira dango la boma lakuti ŵanthu ŵanandi ŵaleke kuwungana pamoza, Wupu Wakulongozga ukawona kuti mbumba ya Beteli yose yiŵe na pulogiramu yimoza ya Chikumbusko. Nkhani ya Chikumbusko yikayowoyekera ku Warwick. Mubali Anthony Morris ndiyo wakayowoya nkhani. Ŵabali na ŵadumbu wose awo ŵakuteŵetera pa ofesi ya munthavi ya United States ŵakawonelera pulogiramu iyi mu vipinda vyawo. Nangauli kukaŵa ŵabali ŵachoko waka awo ŵakarya vimanyikwiro vya pa Chikumbusko, kweni Ofesi yikapeleka vimanyikwiro ku mbumba yose ya Beteli.

Awo ŵakuteŵetera pa Beteli ŵakaŵaso na mwaŵi wakujoyinana na mipingo yawo kwizira pa pulogiramu yinyake ya pa kompyuta. Kweniso ŵabali ŵanyake awo ŵakuteŵetera pa Beteli ndipo mbalara ku mpingo, ŵakapika mwaŵi wakudumba nkhani ya Chikumbusko kwizira pa pulogiramu ya pa kompyuta.

Ŵabali ŵanandi awo ŵakuteŵetera pa Beteli ŵakayowoya kuti pulogiramu ya Chikumbusko ya chaka chino yikaŵa yapadera chomene. Nangauli ŵakawungana lumoza na ŵanyawo yayi, kweni ŵakawona kuti ŵali pamoza na ŵabali na ŵadumbu pa charu chose kuti ŵalongore kuwonga chitemwa chapadera icho Chiuta withu Yehova, na Mwana wake wakutemweka Yesu Khristu, ŵali kutilongora.—Yohane 3:16; Mateyu 20:28.