Mipingo yinandi pa charu chose yikuthemba vinthu vya tekinoloje kuti yichitenge maungano mu nyengo ya muliri iyi. Kweni ŵabali ŵithu awo ŵakukhala ku vigaŵa vya ku mizi uko intaneti njakusuzga, ŵakulimbikira chomene kuti ŵalutilire kuchita vinthu vyauzimu, uku ŵakulondezga malango agho ghali kuŵikika chifukwa cha muliri uwu wa COVID-19. Tiyeni tiwone viyelezgero vichoko waka vyakufuma ku Africa

Ŵabali na ŵadumbu ŵanandi ŵalije mwaŵi wa Intaneti, ntheura ŵangafiska yayi kugwiliskira ntchito Zoom. Sabata yiliyose, Ofesi ya Munthavi ya Malaŵi yikutumizga mavidiyo gha maungano ku ŵalara, ndipo yikuchita ivi kwizira pa foni. Para ŵalara ŵapokera mavidiyo agha ŵakughatumizga ku ŵapharazgi mu mpingo mwawo.

Ndipouli nthowa iyi njakusuzga ku mpingo wa Tcharo uwo uli na ŵapharazgi 28, ndipo uli ku chigaŵa cha mapiri kufupi na Nyanja ya Malaŵi, kumpoto kwa charu ichi. Pakuti mapiri ghakupangiska kuti ku chigaŵa ichi kuŵavye netiweki, mulara wakeneranga kwenda mtunda utali kuti wakasange netiweki yankhongono. Para wamara kupanga dawunilodi maungano wakendangaso mtunda utali, kuwelera uko wafuma kuti wakafike pa nyumba ya mupharazgi waliyose kuti wamupe maungano kwizira pa Bluetooth.

Mwasonosono apa, ŵalara ŵakakondwa chomene kumanya kuti ŵangasanga netiweki yankhongono pa Nyanja ya Malaŵi uko nkhufupi na uko kuli mpingo. Para ŵatora waka wato na kunjira mu Nyanja ya Malaŵi, ŵabali ŵakufiska kuchita Dawunilodi mavidiyo. Ivi vikovwira kuti ŵalara ŵaleke kuphyoka na mtunda.

Kuti “ŵendere” mipingo ya ku mizi iyo yili kumpoto cha kumanjiliro ghadazi kwa Mozambique, ŵalaŵiliri ŵadera ŵakudumba nkhani zawo pa mafoni. Pakuti ku chigaŵa ichi ni viŵi yayi kuti ŵanthu ŵajoyinane pa foni, ŵalaŵiliri ŵadera ŵakudumba nkhani zawo uku panthazi pawo pali mafoni ghanandi agho ghakulumikizika ku mafoni gha mbumba za ŵapharazgi ŵakupambanapambana.

Ŵapharazgi ŵanyake ŵakukhala ku mizi chomene uko netiweki kulije. Para ni nyengo ya maungano, ŵabali na ŵadumbu ŵakwenda kujumpha muthondo m’paka ŵakafike apo pali netiweki. Para ŵayisanga waka ŵakukhala pasi kuti ŵachite maungano.

Mubali Yohane Vinho, uyo ni mulaŵiliri wadera ku chigaŵa ichi, wakuti “ŵabali na ŵadumbu ŵanandi ŵakuŵikapo mtima chomene kuti ŵasange chandulo na maungano,” ivi vikuŵawovwira kuti ŵalutilire kuŵa wakukhora mwauzimu nangauli ŵali kutali chomene na ŵanyawo. Mulaŵiliri wadera munyake, Mubali Carlos Cortazão, wakuti: “Vikuŵa nga kuti tili waka na ŵabali ku Nyumba ya Ufumu, tikuzgorapo na kwimbira lumoza sumu. Tikuwona woko la Yehova apo wakulutilira kulyeska ŵanthu ŵake mwauzimu mu nyengo ya muliri iyi.”—Yohane 21:17.