Ŵabali na ŵadumbu ŵithu mu vyaru vinandi ŵasintha nthowa za umo ŵakachitiranga vinthu vyauzimu chifukwa cha muliri uwo wakhwaska charu chose chapasi. Nakuti mu vigaŵa vinandi, ŵabali ŵakuwungana mu Nyumba za Ufumu yayi pasono, kweni ŵakugwiliskira ntchito mapulogiramu ghanyake gha pa kompyuta. Pa chifukwa ichi, ŵabali ŵanandi ŵasinthaso nthowa za umo ŵangawovwilirapo pa ntchito yakupharazga ya pa charu chose. Ndipo ŵakupeleka vyawanangwa vyawo kwizira pa intaneti.

Ŵakaboni ŵa Yehova mu vyaru vyakujumpha 112, ŵakugwiliskira ntchito chigaŵa cha donate.pr418.com, kuti ŵapeleke vyawanangwa vyawo kwizira pa intaneti. Iwo ŵakugwiliskira ntchito debit card panji credit card.

Pakuti pasono ntchakusuzga kuti ŵabali ŵapeleke vyawanangwa vyawo ku Nyumba ya Ufumu, ŵabali ŵanyake ŵapanga ndondomeko yakuti mwezi uliwose ŵapelekenge vyawanangwa vyawo pa donate.pr418.com. Mudumbu Susan Cohen, uyo wali na vyaka 74, ndipo wakukhala ku United States, nayo wakupeleka vyawanangwa mu nthowa yeneyiyi. Iyo wakuti: “Nthowa iyi njipusu chomene; usange ine nkhufiska, mbwe waliyose wangafiska. Nakuti ndine wakukondwa kuti nichali kovwirapo pa ntchito ya kupharazga ya pa charu chose.”

Pakwamba, Mubali Eduardo Paiva uyo wakukhala ku Brazil, wakawonanga kuti kupeleka vyawanangwa kwizira pa donate.pr418.com yikaŵa waka nthowa yinyake iyo munthu wangapelekera vyawanangwa. Iyo wakuti: “Pasono nkhuwona kuti nthowa iyi njiwemi chomene chifukwa yikovwira kuti tilutilire kovwirapo pa ntchito ya pa charu chose nanga vinthu vingasuzga uli. Para tikugwiliskira ntchito nthowa iyi, tikulongora kuti ndise ŵakuwonga kweniso ŵachitemwa mu mazuŵa ghaumaliro agha.”

Mubali Gajus Glockentin, uyo ni mulaŵiliri wa Treasurer’s Office ku likuru la Ŵakaboni ŵa Yehova ku Warwick, New York, wakuti: “Ntchakukhozga chomene kuwona kuti ŵabali mbakukhumbisiska kovwirapo pa ntchito ya Ufumu. Tikuwonga chomene ŵabali chifukwa cha vyawanangwa ivyo ŵakupeleka ndipo tikuviwona mwakupepuka yayi. Tilutilirenge kuwona umo ntchito yithu yikwendera pa charu chose, kweniso kusintha vinthu vinyake mwakuti tigwiliskire ntchito mwakwenelera vyawanangwa ivi. Nangauli chifukwa cha masuzgo ghanyake, ŵabali ŵanyake ŵachepeska unandi wa vyawanangwa ivyo ŵakupeleka, kweni mbakukhumbisiska nipera kovwira gulu la Yehova.”—2 Ŵakorinte 9:7.