Pajumpha vyaka pafupifupi vitatu kwambura kuchita maungano gha dera maso na maso, ndipo kwambira mu January 2023, tambengeso kuchita maungano agha pa charu chose. Kweniso kufuma waka mu nyengo iyi, mu vyaru vinandi sukulu zakusambizga Baibolo zili kwambako kuchitika maso na maso. Uwu mbukaboni wakuti Yehova watumbika vyakuchitika vyapadera ivi.

Ŵapharazgi pafupifupi 200 ku Villahermosa, Tabasco State, Mexico, ŵakovwira kutozga Malo gha Ungano kunozgekera ungano wa dera. Ŵanyake ŵakenda mtunda utali pafupifupi maora 6 kuti ŵafike pa malo agha. Mudumbu munyake wakalongosora kuti: “Pajumpha nyengo yitali chomene kufuma apo tikawonera ŵabali na ŵadumbu ŵanandi kuti ŵawungana pamoza. Ntheura tikakhumba yayi kuti mwaŵi wa nthena uwu utijumphe.”

Pa ungano wa dera ku Crownsville, Maryland, U.S.A., mudumbu munyake wakati: “Nkhakondwa chomene. Nkhaliranga chifukwa cha chimwemwe nati nafika pa ungano. Nakuti twakupuputira twane tose tukamara kweni ungano ukaŵa kuti undambe. Nkhakhumba yayi kuti chinyake chinitondeske kuŵapo pa ungano uwu.”

Mu maofesi ya munthavi ghakupambanapambana, ŵanandi mbakukondwa chomene kuzakanjira Sukulu ya Ŵapharazgi ŵa Ufumu na Sukulu ya Ŵalaŵiliri ŵa Dera na Ŵawoli Ŵawo maso na maso. Mubali Giovanny Cabezas, uyo ni msambizgi wa sukulu yakusambizga Baibolo ku Palm Coast, Florida, U.S.A., wakati: “Nkhakondwa chomene nati napulika kuti sukulu zakusambizga Baibolo zambengeso kuchitika maso na maso. Agha ni malo ghawemi chomene ku ŵasambizgi, ŵasambiri, kweniso ku wose awo ŵakujipeleka kuchita khumbo la Yehova.”

Mu January 2023, mudumbu Satoko Nakata pamoza na mfumu wake ŵakanjira sukulu ya Ŵalaŵiliri ŵa Dera na Ŵawoli Ŵawo. Iyo wakati: “Chikaŵa chiwemi chomene kuti maungano kweniso sukulu ya ŵapayiniya vikachitikanga kwizira pa Zoom mu nyengo ya muliri. Ndipouli, chikaŵa chakusuzga kuchezga na ŵanji panji kuŵapulika kuti ŵakuseka na kwimba. Kunjira sukulu iyi maso na maso chaŵa chakukondweska chomene ndipo ntchawanangwa chakufuma kwa Yehova. Pakuŵa ŵasambiri, tikuyowoyeskana na kuseka lumoza, kukondwa pamoza, na kwimba sumu lumoza mwachimwemwe. Nkhumuwonga chomene Yehova kweniso Wupu Wakulongozga.”

Tikukayika yayi kuti Yehova wakukondwa kuwona ŵanthu ŵake ŵali pamoza kumusopa mu unenesko na kusambizgika na iyo. Nase tikukolerana na mazgu agho wakayowoya Themba Davide, apo wakati: “Apo ndipo nimuwonganinge mu mpingo ukuru. Nimulumbaninge pakati pa mizinda ya ŵanthu.”—Salimo 35:18.