Kwanyengo yakwamba, chifukwa cha muliri wa Covid-19 Sukulu za Ŵapayiniya pa charu chose chapasi zikachitika kwizira pa videoconference mu chaka cha uteŵeti cha 2021. Kuti ŵalongore kuwonga chawanangwa chakufuma ku gulu la Yehova, ŵasambiri ŵakachita vyose ivyo ŵangafiska kuti ŵachiteko sukulu iyi. Nkhani zakulondezgapo izi, zikulongora umo Yehova wakawovwilira ŵapayiniya ŵanyake kuti ŵatonde masuzgo agho ghakaŵapo kuti ŵachiteko sukulu iyi.

Mudumbu Mieko Yoshinari wa ku Japan wachita upayiniya wanyengozose kwa vyaka 30. (Wonani chithuzi chakwamba.) Nangauli mudumbu uyu vikumusuzga kugwiliskira ntchito vinthu vya tekinoloje kweniso wakulaŵiska makora yayi, kweni wakaŵikapo mtima kuchitako sukulu iyi iyo yikachitikira pa videoconference. Iyo wakuti: “Nkhanozgekera kuti nane nkhazgorengepo ndipo nkhalemba fundo izo nkhafufuza mu malemba ghakurughakuru kuti nkhaleke kusuzgika pakuŵerenga. Yehova wakanovwira na kunikhozga chomene pa nyengo yose ya sukulu ya ŵapayiniya.”

Mudumbu Anita Kariuki, uyo wakukhala ku Thika, tawuni iyo yili kufupi na Nairobi, Kenya, wakuchita bizinesi yakutozga mawonekero gha ŵanthu. Kuti wachiteko sukulu ya ŵapayiniya, wakeneranga kujara bizinesi yake kwa sabata yose. Pakwamba Anita wakafipanga mtima, kweni wakagomezga chomene Yehova kuti wamovwirenge. Iyo wakuti: “Nkhaŵeyelera waka Yehova mu lurombo kuti wanovwire, ndipo nkhalutizga uteŵeti wane.” Ku umaliro wa sabata pambere sukulu yindambe, wakapanga ndalama zakukwana zakuti wangagulira vinthu vinandi vyakukhumbikwa. Nangauli wakakhumbikwirangaso ndalama zinyake pafupifupi madola 30 gha ku America, kweni wakajara bizinesi yake na kuchitako sukulu. Ŵati ŵamara kusambira vinthu vya pa Chitatu, munthu munyake uyo wakaŵa na ngongoli ya Anita wakamuchema na kumupa ndalama zake. Ndalama izi zikaŵa zakukwana ndendende na unandi wa ndalama izo Anita wakakhumbanga kuti wagulire vyose ivyo wakakhumbikwiranga!

Nyumba ya Mudumbu Laurenth Madrigales ku Yoro, Honduras, mukazura maji na vimathipa mafiti ghatatu chifukwa cha chimphepo cha Hurricane Eta na Iota. Panyengo iyo Laurenth wakaphalirikanga kuti nayo wachiteko sukulu ya ŵapayiniya, vikaŵa kuti katundu wawo munandi wasakazika ndipo ŵakasamapo dankha panyumba. Wakakondwa chomene kuti nayo wachemeka kuti wachiteko sukulu iyi, kweni wakafipanga mtima kuti banja lake lingakwaniska yayi kumara kunozga mu nyumba pambere sukulu yindambe. Laurenth wakuti: “Tikacheleranga mulenji chomene na kwamba kutozga mu nyumba na kulekezga usiku chomene. Tikachita ivi kwa mazuŵa ghanandi. Nkhavukanga chomene. Nkhajipulika kuti nilije nkhongono zakunozgekera sukulu ndipo nkhaghanaghananga kuti niŵaphalire waka ŵabali kuti nikwaniskenge yayi kuchitako sukulu ya ŵapayiniya.” Wakalomba kwa Yehova na kumuphalira umo wakajipulikiranga chifukwa cha umo vinthu vikaŵira kwa iyo. Kukati kwakhala mazuŵa ghachoko waka kuti sukulu yambe, wakazizwa chomene kuti Komiti ya Kovwira Para Kwachitika Soka yikajipeleka kunozga nyumba yawo. Ivi vikawovwira kuti waŵe na nyengo yakunozgekera sukulu kweniso chiŵe chamachitiko kuchitira sukulu mu nyumba yake.

Mubali Spencer Stash na muwoli wake, mbapayiniya ŵanyengozose ku Cleveland, Ohio, United States. Pambere sukulu yindambe, adada ŵa Spencer, a Robert, awo awoli ŵawo ŵali kufwa, ŵakaŵagoneka mu chipatala. Banja ili likamanyanga makora yayi usange lingachita sukulu. Adada ŵake a Robert, ŵakaŵachiska kuti ŵakwenera kuchitako sukulu iyi. Chachitima ntchakuti, kwati kwakhala mazuŵa ghaŵiri kuti sukulu yambe, adada ŵa Spencer ŵakatayika. Nangauli ŵakaŵa na chitima chomene, Spencer na Alexandra ŵakakhala waka zuŵa lakwamba la sukulu. Ŵakati ŵalomba, Yehova wakaŵapa nkhongono izo ŵakakhumbikwiranga kuti ŵachite sukulu. Spencer wakati ŵakajipulika makora kuti ŵachita ivyo adada ŵawo ŵakakhumbanga kuti ŵachite. Spencer wakatiso: “Tikulindilira mwakunweka kuti tizakaŵaphalire kuti tikakwaniska kuchitako sukulu ya ŵapayiniya kweniso kuti tizakaŵaphalireko vinyake mwa ivyo tikasambira. Wovwiri uwo ŵapayiniya ŵanyithu na ŵasambizgi ŵakatipa panyengo iyi, ndiwo tikakhumbikwiranga nadi.”

Mubali Jung Dae-sik wa ku South Korea, wakhala ku malo agho ŵakupwelelerako ŵachekuru kwa vyaka vyakujumpha 10. Wakugwiliskira ntchito kanjinga ka ŵanthu ŵakupendera chifukwa sitiroku yili kupangiska chigaŵa chinyake kuleka kugwira ntchito. Wakayezgapo kunjira sukulu za ŵapayiniya kumanyuma uku, kweni wakatondekanga kuŵapo mazuŵa ghose chifukwa cha suzgo la muthupi. Apo nayo wakachemeka kuti wachiteko sukulu ya ŵapayiniya kwizira pa videoconference, wakakondwa chomene. Iyo wakuti: “Nkhawonga chomene mwakuti nkhathiska na masozi wuwo. Kuŵavyenge ndondomeko yakuchitira sukulu iyi pa videoconference mphanyi ine nkhachitako yayi sukulu ya ŵapayiniya. Nkhakondwa chomene kuti nane nkhakwaniska kuchitako sukulu iyi.”

Mubali Eddy El Bayeh na muwoli wake, Cherise, ŵakukhala ku New South Wales, Australia. Cherise wakuti: “Nkhajipulikanga kuti nkhuluta panthazi yayi mu uteŵeti. Nkhaŵa na ndondomeko, kweni nkhamanyanga yayi umo ningachitira kuti nilimbikirenge mu uteŵeti.” Kweni sukulu ya ŵapayiniya ndiyo yikamovwira chomene. Iyo wakuti: “Nkhawona vigaŵa ivyo ningachita kuti nisazgireko uteŵeti wane nangauli nili na mpata uchoko.”

Eddy wakulongosora umo sukulu yikamukhozgera, iyo wakuti: “Vikaŵa nga kuti Yehova wanihaga ndipo iyo wanikora mu viŵegha na kuniphalira kuti: ‘Lutilira kuchita nthena! Nili nawe, nkhukutemwa, ndipo nikupwelelerenge!’”

Pali makilasi ghanandi agho ghachitikirengeso pa videoconference chaka chino. Tikukhozgeka chomene kuti Yehova wakulutilira kusambizga ŵanthu ŵake nangauli vinthu vili makora yayi mu charu. Ivi vikutikumbuska waka mazgu gha Yobu ghakuti: “Wonani! Chiuta ngwakukwezgeka mu nkhongono zake, ni msambizgi nju wali nga ndiyo?”—Yobu 36:22.

Vithuzi ivyo vili pasi apa vikulongora ŵasambizgi na ŵana ŵa sukulu mu vyaru vinyake awo ŵakapindura na sukulu ya ŵapayiniya iyo yikachitikira pa videoconference.