Maungano ghakupambanapambana agho ghakachitikira pa Intaneti ku Moldova, Russia, na Ukraine ghakaŵa ghakukumbukira kuti pajumpha vyaka 70 kufuma apo boma la Soviet likatumizgira Ŵakaboni ŵa Yehova 9,793 pa sitima ya pamtunda kuluta ku Siberia mu 1951.

Pa maungano ghanyake, ŵanthu ŵakaphalirikanga kuti ŵalute pa webusayiti ya 1951deport.org, iyo yikulongosora vya chakuchitika chakuchemeka Operation North. Webusayiti iyi yili kupangika na Ŵakaboni ŵa Yehova, ndipo yikusangika mu Chingelezi, Chirussia, na Chiyukireniya. Pa webusayiti iyi pakusangika vinthu vinandi vyakukhwaskana na ivyo vikachitikira Ŵakaboni awo ŵakatumizgika ku Siberia.

Dr. Lidia Padureac uyo ngwa ku Alecu Russo State University of Balti wakati: “Mu 1951, Boma la Soviet likatumizga Ŵakaboni ku Siberia kuti liŵalange na kuŵalekeska kuthandazga vigomezgo vyawo.”

Ndipouli, Dr. Nicolae Fustei, uyo ngwakufufuza vinthu vyakupambanapambana ku Institute of History wakati: “Operation North yikafiska yayi chilato chake. . . . Gulu la Ŵakaboni ŵa Yehova likamara yayi, ndipo ŵanthu ŵa chisopa ichi ŵakaleka yayi kuphalirako ŵanyawo ivyo ŵakugomezga, m’malo mwake ndipo ŵakamba kuchita nthena mwachikanga chomene.”

Dr. Virgiliu Birladeanu, uyo ngwakufufuza vinthu vyakupambanapambana ku Institute of History kweniso wakaŵa cheyamani wa ungano uwu, nayo wakayowoyapo vya Ŵakaboni awo ŵakatumizgika ku Siberia ndipo wakachezgapo nawo apo wakachitanga kafukufuku wake. Iyo wakati: “Nkhazizwa chomene kuwona kuti ŵakawonekanga kuti ŵali na mtende wa mu mtima kweniso ŵa chigomezgo; ŵakasunganga vyakusingo yayi chifukwa cha masuzgo agho ŵakasangana nagho mu boma la Soviet.”

Mubali Victor Dornicenco, uyo wakuteŵetera pa ofesi ya munthavi ya Moldova, wakalongosora umo ivyo vikachitika mu boma la Soviet vikuwelezgekeraso sono ku Russia. Iyo wakuti: “Chachitima ntchakuti, ŵandasambirepo kanthu. Mu 2017, boma la Russia likakanizga chisopa cha Ŵakaboni ŵa Yehova icho chili na ŵanthu 175,000 kweniso na mawupu ghawo ghose kwambura vifukwa vyakupulikikwa makora. Sankho na vinthu vyakubudika ivyo ŵanthu ŵakugomezga vyakukhwaskana na Ŵakaboni ŵa Yehova, vyapangiska kuti Ŵakaboni ŵaleke kuŵa na wanangwa uwo waliyose wakwenera kuŵa nawo, nga wanangwa wa kuyowoya maghanoghano ghako, kulondezga njuŵi yako, na wanangwa wa kusopa.”

Nga umo tikayowoyera kale mu nkhani yinyake, nkhwantha 5 na ŵanthu awo ŵakuwona vya wanangwa wa ŵanthu, pamoza na Mubali Yaroslav Sivulskiy, uyo wakwimira Wupu wa Ŵakaboni ŵa Yehova ku Europe, ŵakayowoyapo vyakukhwaskana na Operation North kweniso nthambuzgo iyo yikuchitika ku Russia. Pulogiramu yose ya ungano uwu yikaŵikika pa intaneti ndipo yikaŵa mu Chingelezi na Chirussia.

Nga umo tikayowoyera kale, ungano uwu ukachitikira pa Intaneti mu Chirussia pera.

Nkhwantha 14 zakufuma mu vyaru 6, pamoza na Mubali Ivan Riher uyo ngwa ku ofesi ya munthavi ya Ukraine, ŵakayowoya nkhani mwakudumura. Pakufufuza kwawo, nkhwantha zinyake zikachezga na Ŵakaboni awo nawo ŵakatumizgika ku Siberia. Pa ungano uwu ŵakalongoraso mavidiyo ghakudumura agho ghakalongoranga nkhwantha izi zikuchezga na Ŵakaboni aŵa.

Dr. Tomasz Bugaj, uyo ngwakusanda mbiri yakale kweniso wakufufuza vinthu vyakupambanapambana ku Institute of Culture Sciences pa University of Silesia ku Poland, wakati: “Nangauli ŵakasuzgikanga chomene, Ŵakaboni ŵa Yehova ŵakalutilira kulongora nkharo yiwemi kweniso kukhozgera ivyo ŵakugomezga. Iwo ŵakaghanaghanapo yayi vyakuti ŵaswe waka fundo izo ŵakwendera na chilato chakuti ŵasange ntchito, chakurya panji kukhala umoyo uwemi.” Dr. Bugaj wakati Ŵakaboni mbanthu ŵapadera chomene chifukwa ŵakaleka yayi vigomezgo vyawo ndipo ŵakalutilira kuchita vinthu vyakukhwaskana na kusopa kwawo mu nyengo yose ya Chikomyunizimu.

Purofesa Liudmyla Fylypovych, uyo ngwachiŵiri kwa pulezidenti wa Ukrainian Association of Religious Studies, wakalongosora kuti pasono Ŵakaboni ŵa Yehova ku Ukraine ŵakung’anamura mabuku ghakulongosora Baibolo mu viyowoyero 36. Wakadidimizgaposo umo ntchito yawo yakupharazga yikovwilira ŵanthu ŵanandi na awo Mbakaboni yayi. Iyo wakuti: “Ŵakaboni ŵakovwira chomene pa masuzgo ghakupambanapambana agho ŵanthu ku Ukraine ŵakukumana nagho.” Mwachiyelezgero, iyo wakati Ŵakaboni ŵakupharazgira ŵanthu awo mbambura kulaŵiska kweniso ŵambura kupulika mwakuti nawo ŵamanye uthenga wa mu Baibolo na kwamba kujiwona kuti mbakuzirwa.

Pulogiramu yose ya ungano uwu yikaŵikika pa intaneti ndipo yikaŵa mu Chingelezi, Chirussia, na Chiyukireniya.

Purofesa Fylypovych wakaphalira awo ŵakaŵa pa ungano uwu kuti: “Ŵakaboni ŵa Yehova ŵakalongora umo ŵakuchitira kuti ŵazgoŵere para vinthu vyasintha pa umoyo wawo. Nakuti ŵakamba kuwona masuzgo ghawo kuŵa mwaŵi wakuti ŵaphalireko ŵanyawo vinthu ivyo ŵakugomezga. . . . Mu nyengo ya Soviet, ŵanthu ŵakaŵachindikanga Ŵakaboni ŵa Yehova chifukwa ŵakalutilira kulondezga fundo izo ŵakwendera.”

Purofesa Igor Kozlovskyy, uyo ni pulezidenti wa Center of Religious Science Research and International Spiritual Relations ku Ukraine, wakati: “Kuti timanye makora mbiri yithu, tikwenera kukumbuka ivyo vikachitika kale. . . . Tikwenera kudumbiskana chomene vyakukhwaskana na Ŵakaboni ŵa Yehova awo ŵakatumizgika ku Siberia. Nkhani yawo yikwenera kuŵa mu mbiri ya charu cha Ukraine.” Iyo wakatiso: “Ni udindo wa awo ŵakusanda vyakukhwaskana na chisopa kovwira ŵanthu kuti ŵaleke kuŵayowoyera viheni Ŵakaboni ŵa Yehova na visopa vinyake kweniso kuti ŵaleke kugomezga mautesi ghakupambanapambana agho ŵanthu ŵakuŵayowoyera.”

Pulogiramu ya ungano uwu yikaŵikika pa intaneti ndipo yikaŵa mu Chingelezi na Chiyukireniya.