Ŵakaboni ŵa Yehova ŵafumiska Mabaibolo mu viyowoyero 6 mu masabata ghaŵiri ghakulondezgana waka. Pa July 4, 2020, Baibolo la Malemba Ghakupatulika mu Mang’anamuliro gha Charu Chiphya likafumiskika mu Chibislama na Chioromo. Zuŵa lakulondezgapo pa July 5, Baibolo la Mang’anamuliro gha Charu Chiphya likafumiskika mu Chilativiya na Chimarathi, kweniso Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi likafumiskika mu Chibengali na Chikaren (S’gaw). Mabaibolo agho ghakafumiskika nga pa intaneti pera ndipo nkhani za kufumiska Mabaibolo agha zikajambulikirathu. Ŵapharazgi ŵakajoyina ku mapulogiramu ghapadera agha kwizira pa intaneti ndipo ŵakakondwa chomene kupokera vyawanangwa vyakufuma kwa Yehova ivi.

Baibolo lakunozgekaso la Mang’anamuliro gha Charu Chiphya likafumiskika mu Chibislama na Mubali Mark Sleger, uyo wakuteŵetera mu Komiti ya Munthavi ya Fiji. Ŵapharazgi ku Vanuatu ŵakajoyina ku pulogiramu iyi, ndipo yikaŵa ya mu Chibislama, kweniso mu chiyowoyero cha mawoko cha Chibislama.

Ntchito yakung’anamura Baibolo ili yikatora vyaka vyakujumpha vitatu ndipo pakaŵa magulu ghaŵiri ghakung’anamura Baibolo ili. Yumoza wa awo ŵakang’anamurako wakati: “Ŵabali ŵamulitemwa chomene Baibolo lakunozgekaso la Mang’anamuliro gha Charu Chiphya ili chifukwa ndipusu kweniso lili na mazgu agho tikuyowoya sono. Litovwirenge tose kuti tipulikiske makora unenesko.”

Tili na chigomezgo chose kuti Baibolo lakunozgekaso ili liwovwirenge ŵapharazgi ŵakujumpha 700 awo ŵakuyowoya Chibislama, para ŵakusambira paŵekha kweniso para ŵakupharazgira ŵanthu.

Mubali Delroy Williamson, uyo wakuteŵetera mu Komiti ya Munthavi ya Ethiopia, ndiyo wakadumba nkhani ya kufumiska Baibolo la Mang’anamuliro gha Charu Chiphya mu Chioromo. Ŵabali na ŵadumbu 12,548 ŵakajoyina ku pulogiramu yapadera iyi, kusazgapo ŵapharazgi 2,000 awo ŵakuyowoya Chioromo.

Chifukwa cha masuzgo ghanyake agho ghakaŵapo, Wupu Wakulongozga ukazomerezga kuti pulogiramu yakujambulika kale yiŵikike pa TV. Ŵapharazgi ŵakapikaso mwaŵi wakuti ŵangajoyina ku pulogiramu iyi kwizira pa foni.

Ŵanthu 5 awo ŵakang’anamurako Baibolo ili, ŵakatora vyaka 5 kuti ŵamare kung’anamura. Baibolo ili liwovwirenge chomene ŵabali na ŵadumbu awo ŵakuteŵetera mu chigaŵa chose icho ŵanthu ŵakuyowoya Chioromo.

Baibolo la Mang’anamuliro gha Charu Chiphya la Chilativiya likatora vyaka 12 kuti limare kung’anamurika. Mipingo yose ya Chilativiya kweniso ya Chirussia ku Latvia yikapempheka kuti yiwonelere pulogiramu iyi.

Mubali Jouni Palmu, uyo wakuteŵetera mu Komiti ya Munthavi ya Finland, ndiyo wakadumba nkhani ya kufumiska Baibolo ili. Iyo wakati: “Ndise ŵakukondwa chomene kufumiska Baibolo lipusu kweniso lakung’anamurika mu mazgu agho tikuyowoya sono, ilo liwovwirenge wose awo ŵakuyowoya Chilativiya. Tikugomezga kuti litovwirenge chomene kuŵa ŵakukondwa para tikusambira kweniso kughanaghanirapo Mazgu gha Chiuta.”

Pakuyowoya vya vigaŵa vinyake vyakufufuzira mazgu ghanyake ivyo vili mu Baibolo ili, yumoza uyo wakang’anamurako wakati, “Baibolo liphya ili ndipusu chomene kuligwiliskira ntchito ndipo litovwirenge chomene para tikusambira patekha kweniso para tikughanaghanirapo ivyo tasambira.”

Baibolo la Mang’anamuliro gha Charu Chiphya mu Chimarathi likafumiskika apo mipingo yose ya Chimarathi ku India yikaŵa na chakuchitika chapadera. Mubali Puneet Aggarwal, uyo wakuteŵetera mu Komiti ya Munthavi ya India, ndiyo wakadumba nkhani ya kufumiska Baibolo ili.

Baibolo la Chimarathi likatora vyaka vitatu kuti limare kung’anamulika ndipo ŵanthu 6 ndiwo ŵakawovwirapo pa mulimo uwu. Yumoza uyo wakang’anamurako wakati: “Baibolo ili liwovwirenge chomene ŵapapi kweniso ŵapharazgi para ŵakusambizga ŵana ŵawo panji para ŵakusambizga ŵanthu awo ŵakukhumba kumanya unenesko wa mu Baibolo.”

Munyakeso uyo wakang’anamurako wakati: “Ntchakukhozga chomene kumanya kuti Baibolo ili likuwezgeramo zina la Chiuta lakuti Yehova, mu malo ghose agho likasangikanga mu Malemba ghakwambilira. Ŵanthu ŵamusanganga zina la Yehova pafupifupi peji lililose la Baibolo ili, ndipo zina la Yehova lipikenge uchindami wakwenelera.”

Ŵanthu ŵakujumpha 83 miliyoni ŵakuyowoya Chimarathi pa chigaŵa cha pakati ku India.

Baibolo la Mang’anamuliro gha Charu Chiphya Mateyu-Uvumbuzi la Chibengali likafumiskika na Mubali Ashok Patel, uyo wakuteŵetera mu Komiti ya Munthavi ya India. Ŵapharazgi ŵakujumpha 1,200 kufuma ku India na Bangladesh, ŵakajoyina ku pulogiramu iyi.

Ŵanthu ŵakujumpha 265 miliyoni ŵakuyowoya Chibengali, ndipo chiyowoyero ichi chili pa nambara 7 pa viyowoyero ivyo vikuyowoyeka na ŵanthu ŵanandi pa charu chose. Kuti ŵang’anamure Baibolo lipusu kweniso lakupulikikwa makora ku ŵanthu ŵanandi, ŵabali na ŵadumbu ŵakufuma mu vigaŵa vyakupambanapambana vya India na Bangladesh ŵakagwilira lumoza ntchito ya kung’anamura kwa vyaka vitatu.

Mu nkhani yake, Mubali Patel wakati: “Chibengali ntchimoza mwa viyowoyero vyakwambilira vya ku India ivyo Baibolo likasangikanga. Baibolo lose la Malemba gha Chigiriki likafumiskika mu 1801. Uwemi wa Baibolo lakwamba la Chibengali ukaŵa wakuti likaŵa na zina la Chiuta, lakuti Yehova. Kweni mu Mabaibolo ghanandi agho ghakung’anamurika mazuŵa ghano, ŵakuwuskamo zina la Chiuta na kuŵikamo la chithokozo lakuti ‘Fumu.’ Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi ndakung’anamurika makora kweniso lambura kusuzga kupulikiska.”

Yumoza uyo wakang’anamurako wakati: “Baibolo ili ntchilongolero chakuti Yehova wakutemwa nadi ŵanthu ŵa mtundu uliwose, ndipo wakukhumba kuti wose ŵasambire vya iyo kweniso mwana wake, Yesu Khristu.”

Mubali Hiroshi Aoki, uyo wakuteŵetera mu Komiti ya Munthavi ya Myanmar, ndiyo wakadumba nkhani ya kufumiska Baibolo la Mang’anamuliro gha Charu Chiphya Mateyu-Uvumbuzi mu Chikaren (S’gaw). Ŵanthu ŵakufuma mu mipingo 510 kweniso magulu 4, ŵakajoyina ku pulogiramu iyi.

Baibolo la Chikaren (S’gaw) likatora chaka chimoza kuti limare kung’anamurika. Yumoza wa awo ŵakang’anamurako wakati: “Ŵabali na ŵadumbu kweniso ŵanthu ŵa chiyowoyero ichi ŵakondwenge chomene para ŵakuŵerenga Baibolo ili la Chikaren (S’gaw), chifukwa lili na zina la Yehova mu malo ghose umo likwenera kuŵa kweniso lili kulembeka umo ŵanthu ŵakuyowoyera sono. Ndakupulikikwa makora, lakung’anamurika makora, kweniso lambura kusuzga kupulikiska. Tikuwonga Yehova chifukwa cha chawanangwa chapadera ichi, icho ntcha muchiyowoyero chithu, chitovwirenge kuŵa nayo paubwezi.”

Munyake uyo wakang’anamurako wakati: “Baibolo la Mang’anamuliro gha Charu Chiphya lili kulembeka umo taŵanthu tikuyowoyera sono, ntheura litovwirenge kuti tipulikiske umo ŵanthu awo ŵakuzunulika mu Baibolo ŵakajipulikiranga, kuwona umo vinthu vikaŵira kwa iwo, kweniso kuti tiyezge chipulikano chawo.”

Nase tikukondwa lumoza na ŵabali na ŵadumbu ŵithu awo ŵapokera Mabaibolo agha. Tikugomezga kuti Mabaibolo agha ghawovwirenge ŵapharazgi ŵa viyowoyero ivi kuti ŵalutilire kusendelera kwa Yehova na kuphalirako ŵanyawo unenesko wa mu Baibolo.—Yohane 17:17.