Nangauli tili mu nyengo ya muliri wa corona virus, kweni Ŵakaboni ŵa Yehova ŵakulutilira kufumiska Mabaibolo mu viyowoyero vyakupambanapambana. Pa June 28, 2020, Baibolo la Malemba Ghakupatulika mu Mang’anamuliro gha Charu Chiphya likafumiskika mu viyowoyero vinayi: Chiswati, Chitsonga, Chizulu, na Chitonga. Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi nalo likafumiskika mu Chikriol cha ku Belize na Chitotonac. Nangauli muliri wa COVID-19 wapangiska kuti ŵabali na ŵadumbu ŵaleke kuwungana pa malo ghamoza, kweni ŵakakondwa chomene, kuchita dawunilodi ma Baibolo agha pa intaneti. Ŵabali ŵakajambulirathu nkhani za kufumiska Mabaibolo agha, ndipo ŵapharazgi ŵakawonelera mapulogiramu agha kwizira pa pulogiramu yinyake ya pa kompyuta panji pa intaneti.

Mubali Geoffrey Jackson, uyo ngwa mu Wupu Wakulongozga, wakadumba nkhani ya kufumiska Baibolo la Malemba Ghakupatulika mu Mang’anamuliro gha Charu Chiphya mu Chiswati, na Baibolo lakunozgekaso la pa Intaneti la Malemba Ghakupatulika mu Mang’anamuliro gha Charu Chiphya mu Chitsonga na Chizulu. (wonani chithuzi). Ŵapharazgi ku South Africa na Eswatini ŵakajoyina kuti ŵawonelere pulogiramu yapadera iyi.

Mu chigaŵa cha ofesi ya Munthavi ya South Africa, ŵanthu pafupifupi 18.5 miliyoni, ŵakuyowoya Chiswati, Chitsonga, na Chizulu, pa chiŵelengero ichi pali ŵapharazgi ŵakujumpha 38,000.

Mubali Augustine Semo, uyo wakuteŵetera mu Komiti ya Munthavi ya Malawi, wakadumba nkhani ya kufumiska Baibolo lose la Malemba Ghakupatulika mu Mang’anamuliro gha Charu Chiphya mu Chitonga (Malawi).

Baibolo la Chitonga ili likatora vyaka vyakujumpha viŵiri kuti limare kung’anamulika. Yumoza mwa awo ŵakang’anamurako Baibolo ili wakati: “Chitonga chilipo mitundu patatu. Chitonga icho ŵanthu ŵa ku chigaŵa chinyake ŵakuyowoya chikupambana chomene na icho chikuyowoyeka ku chigaŵa chinyake. Ntheura tikaŵa maso chomene kuti tisankhe mazgu agho ŵanthu ŵa mu vigaŵa vyose ŵangapulika. Kweniso tili kugwiliskira ntchito mazgu ghamusi kuti tilongosore mazgu ghanyake agho ghangaŵa ghakusuzga kughapulikiska.”

Munyakeso uyo wakang’anamurako wakati: “Ŵapharazgi ŵamusuzgika yayi kuligwiliskira ntchito Baibolo ili para ŵakupharazga panji para ŵali pa maungano, chifukwa ndipusu kweniso ndakupulikikwa makora, ndipo ndakusuzga yayi kuŵerenga panji kulipulikiska.”

Mubali Joshua Killgore uyo wakuteŵetera mu Komiti ya Munthavi ya Central America wakadumba nkhani ya kufumiska Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi mu Chikriol cha ku Belize. Ŵanthu ŵakujumpha 1,300 ŵakajoyina na kuwonelera pulogiramu iyi.

Ŵanthu 6 ndiwo wakachitako mulimo wakung’anamura Baibolo ili, uwo ukatora myezi 16. Pakuyowoyapo za uwemi wa Baibolo ili, yumoza mwa awo ŵakang’anamurako wakati: “Sono ŵabali na ŵadumbu ŵithu ŵaŵenge na Baibolo ilo ndakung’anamurika makora kweniso lakugomezgeka. Liŵawovwirenge kuti ŵapulikiske makora fundo zinandi.”

Munyakeso wakati: “Apo tili mu nyengo ya muliri wa COVID-19 iyi, ŵabali na ŵadumbu ŵithu awo ŵakuyowoya Chikriol cha ku Belize ŵaŵenge na mwaŵi wa kuŵerenga Baibolo mu chiyowoyero chawo. Ichi chiwovwirenge kuti ŵaleke kwenjerwa chomene mwakuti ŵazakazizipizge makora viyezgo ivyo vikwiza kunthazi.”

Ku Belize, kuli ŵapharazgi 867 awo ŵakufuma mu mipingo 19 ya Chikriol cha ku Belize. Ŵapharazgi ŵanyakeso 58 ŵakuteŵetera ku chigaŵa icho ŵakuyowoya Chikriol cha ku Belize ku United States.

Mubali Jesse Pérez, uyo wakuteŵetera mu Komiti ya Munthavi ya Central America, ndiyo wakadumba nkhani ya kufumiska Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi mu Chitotonac. Ŵanthu pafupifupi 2,200 kufuma mu mipingo 50 ya Chitotonac mu chigaŵa cha ofesi ya munthavi, ya Central America ŵakajoyina ku pulogiramu iyi.

Mulimo wakung’anamura Baibolo ili ukatora vyaka vyakujumpha vitatu kuti umare. Baibolo ili liwovwirenge chomene pakupharazga makani ghawemi ku ŵanthu ŵakujumpha 250,000 awo ŵakuyowoya Chitotonac ku Mexico.

Munyake uyo wakang’anamurako Baibolo ili wakati, mwakupambana na Mabaibolo ghanyake gha mu Chitotonac, Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi “lili na mazgu agho ŵanthu ŵanandi ŵakuyowoya pasono. Ntheura chiŵenge chipusu kuti tilongosorenge makora nkhani zakupambanapambana za mu Baibolo ku ŵanthu awo tikuŵapharazgira.”

Munyakeso wakati: “Ŵabali na ŵadumbu ŵithu ŵakamba ni kale kudokera kuŵa na Baibolo nga ni ili. Nakuti sonosono apa, ŵapharazgi ŵanyake ŵangwamba kung’anamura mavesi ghanyake kufuma mu Baibolo la Chisipanishi kuya mu Chitotonac kuti ŵakadumbe makora chigaŵa icho ŵapika pa maungano gha mukati mwa sabata. Kweni sono ŵasuzgikengeso yayi para ŵapika nkhani iyo yafuma mu Malemba gha Chigiriki.”

Uwemi unyake wa Baibolo ili ngwakuti, lili na mazgu ghamusi agho ghakulongosora makora mazgu ghanyake agho ghali mu Baibolo ili. Mazgu agha ghakuŵa ghakumanyikwa ku ŵanthu wose awo ŵakuyowoya Chitotonac, ivi vipangiskenge kuti Baibolo ili liŵe lakovwira chomene ku wose ŵa chiyowoyero ichi.

Nase tikukondwa lumoza na ŵabali na ŵadumbu ŵithu awo ŵapokera Mabaibolo mu chiyowoyero chawo. Tikugomezga kuti chipulikano chawo chilutilirenge kukhozgeka apo ŵakugwiliskira ntchito ‘lupanga lwawo lwauzimu’ mu uteŵeti kweniso para ŵakusambira paŵekha.—Ŵahebere 4:12.