Chivula chankhongono icho chikamba kulokwa chomene pa July 13 m’paka pa 17, 2021, chikapangiska kuti milonga yinandi ku Belgium, Germany, Luxembourg, na Netherlands yizure chomene, ndipo paumaliro maji ghakatutuka na kukoma ŵanthu. Pasono ŵachali kufufuza kuti ŵamanye vinthu ivyo vyasakazika. Soka ili ndimoza mwa masoka ghakofya chomene agho vyaru ivi vyakumanapo nagho mu vyaka 100 ivyo vyajumpha.

• Palije uyo wali kupwetekeka chomene panji kufwa

• Ŵapharazgi pafupifupi 304 ŵakasama mu nyumba zawo

• Nyumba pafupifupi 100 zikanangika chomene

• Nyumba pafupifupi 242 zikanangika pachoko waka

• Nyumba za Ufumu 11 zikanangika

• Pakimikika Makomiti ghanayi Ghakovwira Para Kwachitika Soka; yimoza ku Belgium, ghaŵiri ku Germany na Luxembourg, na yimoza ku Netherlands

• Pasono Makomiti agha ghakulongozga ntchito ya kunozga na kutozga nyumba izo zakhwaskika, nga nkhuwomizga na kuwuskamo mathipa, kweniso kunozga vinthu ivyo vyanangika

• Makomiti agha pamoza na ŵalara ŵakunozga ndondomeko ya kusangira pakukhala na maji ghawemi ghakumwa awo ŵachimbira mu nyumba zawo

• Ŵalaŵiliri ŵa dera ŵa mu vigaŵa ivi ŵakukhozga ŵabali na ŵadumbu awo ŵakhwaskika na soka ili

• Maungano agho ghakuchitikira pa Intaneti ghakulutilira kuchitika kwambura chakujandizga. Ŵabali ŵa mu Komiti ya Munthavi ŵakupembuzga na kukhozga ŵapharazgi awo ŵakhwaskika

• Wovwiri wose ukupelekeka mwakulondezga nthowa zakujivikilira ku muliri wa COVID-19

Ŵabali ŵalara mu mpingo unyake ku Netherlands ŵakamovwira mudumbu munyake muchekuru kuti wafumemo mu nyumba yake. Kufuma apo, ŵabali ŵakayimbira foni mwana wa mudumbu uyu, uyo ni Kaboni wa Yehova yayi, na kumuphalira kuti amama ŵake mbakuvikilirika. Mwana wa mudumbu uyu wakaphalira amama ŵake kuti: “Muli mu mpingo uwemi chomene. Nakuti ŵakumughanaghanirani kweniso kumupwelelerani!”

Gulu linyake la awo ŵakuzimwiska moto ku Belgium likawona umo ŵabali ŵithu ŵakachitiranga ntchito yawo yakovwira para kwachitika soka. Gulu ili likalumba ŵabali ŵithu chifukwa ŵakavwara vyakujivikilira kweniso ŵakachitanga vinthu mwakukolerana. Mwakuyana waka, gulu la ŵakuzimwiska moto ku Germany likaŵalumba ŵabali chifukwa ŵakalondezga makora ulongozgi uwo likaŵaphalira. Yumoza wawo wakati: “Viŵenge kuti kulikose kukuŵa gulu lanthena mphanyi vinthu vikwenda makora chomene.”

Ŵabali na ŵadumbu awo ŵakhwaskika ŵakuwonga chomene gulu la Yehova chifukwa cha wovwiri uwo ŵapokera. Iwo ŵakuwongaso Wupu Wakulongozga chifukwa chakuchiska ŵanthu ŵa Yehova kuti nyengo zose ŵanozgekerengethu masoka ghachilengiwa. Chikuru chomene, ŵakuwonga Yehova, uyo wakupangiska ŵanthu ŵake kuti ‘ŵakhalenge mwakufwasa, ndipo ŵaleke kuyungwa chifukwa cha kopa soka.’—Zintharika 1:33.