Mu September 2023, Ŵakaboni ŵa Yehova pa charu chose ŵakaŵa na upharazgi wapadera kumanyiska ŵanthu vya Ufumu wa Chiuta. Pa upharazgi uwu, ŵakagwiliskiranga ntchito Gongwe la Mulinda Na. 2 2020, la mutu wakuti: “Kasi Ufumu wa Chiuta Ni Vichi?” a Vinthu vyakulondezgapo ivi vikulongora kuti pakachitika vinthu viwemi chifukwa cha upharazgi uwu.

Apo ŵakapharazganga, Mark na mwana wake munyamata wa vyaka 10, zina lake Flynn, ŵa ku Southport ku England, ŵakasangana na mwanakazi pa nyumba yakwamba. Mwakukondwa, mwanakazi wakapoka Gongwe la Mulinda kwa Mark ndipo wati wawona fumbo la pa chikopi, wakati: “Nkhugomezga yayi kuti mwahuno mwafika. Sono ndipo nkhukhumba chomene zgoro la fumbo ili kuluska kumanyuma kose.” Uku wakuthiska masozi, wakalongosora kuti mwana wake munyamata wafwa mwasonosono ndipo wakakhumbikwiranga kupembuzgika. Nyengo yeneyiyo, Mark wakamulongora ivyo Ufumu wa Chiuta ukulayizga pa nkhani ya chiwuka. Zgoro ilo mubali wakazgora likamufika pamtima ndipo wakapempha kuti ŵamulongosolere vinandi. Apo Mark na Flynn ŵakawelerako, mwanakazi na mwanalume wake, ŵakazomera kupoka buku la Mungakondwa na Umoyo Kwamuyirayira! ndipo sambiro la Baibolo likayambika.

Apo Mubali Frederick wakaŵa pa mzere ku chipatala chinyake ku Indonesia, wakambiska chidumbirano na mwanalume munyake uyo nayo wakaŵa pa mzere na mwana wake. Mubali Frederick wakamuphalira ivyo Baibolo likuyowoya kuti sonosono apa matenda na kusuzgika kuzamuŵavya. Mubali Frederick wati wapempha mwanalume uyu kuti waŵazge mazgu gha Yesu ghakuyowoya vya Ufumu wa Chiuta agho ghali pa Mateyu 6:9,10, wakamufumba kuti: “Kasi masuzgo ghazamumara wuli?” Mwanalume wakazgora mwakupulikikwa mwakora kuti: “Kwizira mwa Chiuta na Ufumu wake.” Mwanalume uyu wakafumba kuti, “Kasi Ufumu wa Chiuta ni vichi.” Kweni panyengo iyi dokotala wakachema zina la mwana wake kuti ŵanjire. Mwaluŵiro, Mubali Frederick wakamupa adiresi yake na Gongwe la Mulinda. Chakuzizika ntchakuti, machero ghake mwanalume yura na mwanakazi wake ŵakiza ku nyumba ya Mubali Frederick na kumuphalira kuti ŵakukhumba kumanya vinthu viwemi ivyo Ufumu wa Chiuta uzamuchita. Mwakukondwa, Mubali Frederick wakanozga vyakuti ŵalutilizge kudumbiskana.

Ŵadumbu ŵaŵiri ku Malawi ŵakapeleka Gongwe la Mulinda kwa fumu la mutu wakuti, “Kasi Ufumu wa Chiuta Ni Vichi?” Ndipo ŵakalongosora kuti sonosono apa Ufumu wa Chiuta uzamulamulira charu chose chapasi. Fumu yira yikafumba kuti, “Kasi mukung’anamura kuti zuŵa linyake nizamupokeka ufumu?” Pamanyuma pakuti ŵayilongosolera kuti Ufumu wa Chiuta ndiwo wekha ungamazga masuzgo gha ŵanthu, fumu iyi yikayowoya kuti: “Uwu ni uthenga uwemi chomene. Nangauli ndine fumu, kweni napulikiska kuti Ufumu wa Chiuta uzamuchitira ŵanthu vinthu ivyo ise mafumu tingafiska yayi.” Fumu iyi yikapemphaso ma Gongwe ghanyake 5 kuti yikagaŵire mafumu ghanyake. Yikayowoyaso kuti yikulindilira mwakunweka kuti ŵazakadumbiskaneso fundo zinandi zakukhwaskana na Baibolo munthazi.

Apo mudumbu munyake wakaŵa mu basi ku Puebla, Mexico, wakapempha dada munyake usange ŵangadumbiskana uthenga wa mu Baibolo wakupa chigomezgo. Mwanalume uyu wakazomerezga ndipo mudumbu wakaŵerenga mazgu gha yesu gha pa Mateyu 6:9,10. Mwanalume wakafumba kuti, “Kasi Ufumu wa Chiuta ni vichi? Nindaŵerengepo Baibolo panji kudumbiskanapo na Ŵakaboni ŵa Yehova”. Mudumbu wakazgora fumbo lake mwakumuwoneska Gongwe la Mulinda pa foni. Mwanalume wakamba kufumba mafumbo ghanandi, ndipo mudumbu wakamulongora umo wangagwiliskira ntchito JW Library app kuti wasange mazgoro gha mafumbo ghake. Kweni mu foni yake mukaŵavya malo ghakukwana kuti wapange dawunilodi vinthu vinandi, mbwenu wakamba kuwuskamo vinthu vinyake ndipo wakayowoya kuti, “Kusambira mazgu gha Chiuta ndicho ntchinthu chakuzirwa chomene.” Apo ŵakakhiranga galimoto, wakaŵa kuti wamalizga kuŵerenga Gongwe la Mulinda kweniso ŵakaŵa kuti ŵamara kudumbiskana sambiro lakwamba mu burosha la Mungakondwa na Umoyo Kwamuyirayira! ndipo paumaliro wakazomera kuti wambe kusambira Baibolo. Mwanalume yura wakamuwonga mudumbu withu mwakuwerezgawerezga, ndipo wakayowoya kuti ngwakukhumbisiska kwiza ku maungano ku Nyumba ya Ufumu ya Ŵakaboni ŵa Yehova.

Apo ŵakapharazganga nyumba na nyumba ku New Zealand, Mubali Ben wakalongosolera mama munyake kuti Ufumu wa Chiuta sonosono apa uzamupumuzga wose awo wakusuzgika na vyakuŵinya. Mwanakazi yula wakayowoya mwakukondwa kuti, “Mwachita makora chomene kwiza. Usiku wajumpha uwu nkhasuzgika chomene kugona chifukwa cha kwenjerwa na vyamunthazi.” Masozi ghakamba kufuma apo, Mubali Ben wakamuŵelengera lemba la Chivumbuzi 21:4, na kumulongosolera umo Ufumu wa Chiuta uzamumazgira ulwari na nyifwa. Mwakukondwa, wakapokera Gongwe la Mulinda, ndipo wakayowoya kuti ngwakukhumbisiska kuliŵerenga kuti wasambire vinandi.

Ku msasa wakusungirako ŵanthu ku South Sudan, ŵanthu ŵanandi ŵakaŵa ŵakukhumbisiska kuti ŵasambire vyakukhwaskana na Ufumu wa Chiuta. Nakuti kwa maora ghaŵiri pera, mabuku ghakukwana 1,000 kusazgapo Gongwe la Mulinda ghakagaŵilika. Yumoza wa awo wakaŵasanga ku msasa wakayowoya kuti: “Apa nkhanira mwiza panyengo yake. Ivi ndivyo takhumbikwiranga nadi.” Ndipo munyake wakayowoyaso kuti: “Tawonga chomene chifukwa cha kutighanaghanira. Tikumanya kuti mukufuma kutali kweni chonde muzakizeso.”

Ŵadumbu ŵaŵiri ku Taiwan ŵakakumana na mwanalume munyake uyo wakaŵa na chitima chomene chifukwa cha ngozi ya moto iyo yikachitika mwasonosono ku Hawaii. Yumoza mwa ŵadumbu aŵa wakamulongora mwanalume uyu chithuzi cha mu Gongwe la Mulinda chakulongora umo paradiso wazamuŵira pa charu chapasi. Mwanalume uyu wakayowoya kuti: “Chingazakaŵa chinthu chakukondweska chomene usange charu chapasi chingazakaŵa nga umo chikuwonekera pa chithuzi apa. Mu charu chakuzura na vinthu viheni ichi, ntchiwemi na chakukondweska kupulika uthenga wakupembuzga kweniso wakupeleka chigomezgo nga uwu.”

Ukaŵa mwaŵi ukuru chomene kuti tose pa charu chapasi tikachitako upharazgi wapadera uwu kuphalira ŵanthu kulikose kuti Ufumu wa Chiuta ndiwo ungatipa chigomezgo chanadi na kutipembuzga.—Ŵaroma 15:4.

Pasi apa pali vithuzi vya ŵabali na ŵadumbu ŵakufuma mu vyaru vyakupambanapambana awo ŵakachitako mulimo wapadera wakupharazga uwo ukachitika pa charu chose